2Kuruntuc 3

1Ɔɔn jɔɔttɔn te jiɛt waakɔ pookɔ moki? Walla ɔɔn buagɔn kiedɔn worgan ɛkkɛti aŋka mieti ɛkkɛ te waak ɔɔnɔ? Walla moki ɔɔn buagɔn ɛkkɛ kieddɛ worgan mieti te ɔɔnɔ? A'a. 2Ɛkkɛ woodgɔ agɛ kiikan ɔɔn, ɔci balgɛ ɔɔn yomgɔti aŋka ŋeettan ma waakɛnda ɔci paktan ma waakɛnda. 3Gena Kiṭɔ kieñi kiikan neeni, ɔci cuuññɛ ɛkɛ te ɔɔny, oŋ yeti te ñɔɔn galam bɛɛ, yeti te Boŋ Jwaŋa Tɛɛti, ɔci moki te kiikan guonanti bɛɛ, yeti te kiikan men baan yomɛti. 4Ɔɔn balkɔn jwalla awarɛ te Kiṭɔ Juaŋ ñamɛti. 5Ɔɔn yaakɔnti poŋɔn te genga te waak ɔɔn pookɔ aŋka noŋɔn kanŋa neeni bɛɛ. Oŋ yeti war tɛɛn ɔɔn bɛya te Juaŋti. 6Gena ɛkɛ ɔɔn naŋŋɔn aŋka ɔɔn yaakɔnti kanŋa jyeka naŋŋɛ Juaŋ wonkɛn neeniy. Oŋ yeti te jyek ganuun a kiigin bɛɛ, yeti te Boŋ Jwaŋa Tolan. Jyek ganuun jyeka a kiigin etti lieno, yeti Boŋ Juaŋ aŋka etti tɛɛtin. 7Pɔy ganuun kiinɛ Juaŋ a kiin gwoyi ṭɔlgɛn ŋotkɛnti pɔya ñamu neeniyɛ, ɛkɛ eccin lieno. Yeti ɛkɛ balki pwani Juaŋ ne tolan. Ɔci pwanna neeni bala galdan Muuca ñingɛti ne tolan, ɔci ma Icrayiil yaakɛnti gɔrti Muuca woŋgɛti te wɔɔka wanna bɛɛ. Acaan pwanna neeni bala galdan ne yaajan ɛkkɛn ciɛrɛ ñingɛnti. Yeti te wɔɔka wannayɛ, pwanna neeni ati ooddi baadi doki, 8pwani kanŋa Boŋ Juaŋ aŋka tol tol nɔñji. 9Kan kanŋa jiek oldɛ ma wyetkɛnti ɛkɛ pwatcinyɛ, kanŋa etti yɔɔt neeni aŋka pwatcin ne tolan nɔñji. 10Pwanna ñamu tolan neeniyɛ, kan ɛkɛ poortinti i pwani jyeka naŋŋa Juaŋ ŋoyɔ neeniyɛ, ɛkɛ a genga moki bɛɛ. Ɛka ñamu neeni pwani ɛkɛ bala moki bɛɛ, bawwin doki. 11Oŋ kan naŋka ñamu naŋka bawwin neeni balki pwani ne tolany, oŋ pwani jyeka naŋŋɛ Juaŋ wonkɛn jyeka baadi bɛɛ neeni bala a ɔki? Pwanna neeni aŋka bala ñamu ne yaajan nɔñji. 12Ne jyenna kɛɛyin ɔɔn baali ɔɔntiyɛ, ɔɔn waakɔ tɛɛcin ne tolan. 13Ɔɔn balgɔn ba Muuca mena kwomi woŋgɛ te bworŋ aŋka naa ma Icrayiil pwanna ati ɔci bawwin neeni yuartan bɛɛ. 14Oŋ yeti paŋi ɛkkɛnyɛ, aŋi wyeñ boojo, ɔci ne acca neeniti ɔɔnyɛ, kan jyek ganuun jyeka te baaṭi paktan mayɛ, ɛkkɛn men wyetkɛn niin a uulgin ba wyeña te baaṭi wanna ɔɔn, ɛkkɛn jyeka awarɛ neeni jitkɛn yuartan bɛɛ. A ɔɔnyɛ, bala ba ɛkkɛn meni bala kwomi ñingɛn te bworŋa kwomki ɛkkɛn wyetkɛn te baaṭi bworŋa kɛki ɛkkɛn wanna meni ɔɔn. Yeti kan men jyeddi Yaccutiyɛ, ɛkɛ oŋ jyeka awarɛ neeni jitkɛn yuartɛji oŋo. Ɔci a ɔɔn bala ba bworŋa neeni warɛ uunnɛ ɔntɔ oŋo. 15Ɔci acca men ɔɔnyɛ, ne ɛkkɛn pokki ganuun Muucayɛ, ɛkkɛn jiek jitkɛn yuartanji bɛɛ. Ɛkkɛn men bala yomgɛn niin a uulgin bala ba ne bworŋa kwomki ɛkkɛn wyetkɛn wanna baali kɛki ɛkkɛn men ɔɔn. 16Bala ba jyeka kiigin worga Juaŋji gɔki agi, “Muuca bworŋ uunnɛ ɔntɔ te woŋgɛti ne ɛkɛ warɛ yallɛ Ciɛggɔntiy.” 17Accayɛ, “Ciɛggɔn” a Boŋ Juaŋo, ɔci ne Boŋ Ciɛggɔn baaliyɛ, ikin ḍɔɔggɔ wɔkɔ. 18Ɔci ikin maka woŋgɛn a kwomgin te bworŋa neeni bɛɛyɛ, ikin balkin pwani Ciɛggɔn. Ɔci ikin waakɔ aaŋŋin balkin ba ɛkɛ te pwani ɛkɛ pwanna tolan pwanna bɛya te Ciɛggɔnti, mena a Boŋ Juaŋy.

will be added

X\