2Kuruntuc 2

1A ɔŋŋiyɛ, ‘ya yomu muŋi ka naa ‘ya bɛɛd ḍieŋŋa ɛkkɛti moki aŋka ɛkkɛ yomgɔ yiegdi bɛɛ. 2Kan ‘ya ɛkkɛ yaadin yomgɔti oŋ a menɛ ‘ya ywaŋda yomutiy, pari ɛkkɛ maka yaañi ‘ya yomgɛnti neeni bɛɛ? 3A ɔŋŋi aŋka ‘ya kiena worga neeni ɛkkɛti te ñamu wanna. A ɔŋŋiyɛ, ne ‘ya bɛɛdayɛ, ‘ya yomu yaaya te ɛkkɛ maka ‘ya ywaŋka yomuti neeni bɛɛ, acaan ɛkkɛ waakida ŋeejin ‘ya ne pwadan. A ɔŋŋiyɛ, yom ñɔɔn ‘ya aga yom ñɔɔn ɛkkɛ waakida. 4Acaan ne ‘ya ɛkkɛ kieŋnin worgayɛ, ‘ya yomu wiak ne tolan, ɔci ‘ya yomu ñɔni warɛ, ɔci pieg bala wɔyi ‘ya ñinguti. Yeti ‘ya noŋi a ɔɔn aŋka ɛkkɛ yaadin ‘ya yomgɔti bɛɛ, yeti aŋka ŋeeddɛ ɛkkɛ te anna ana ‘ya ɛkkɛ ne tolan neeni. 5Kan menga eccin yom yoñ mengatiyɛ, ‘ya yomu yaaya bɛɛ. Ɛkɛ ɛkkɛ yaaññɛ yomgɔti pookɔ. ‘Ya gɔk a ɔɔn acaan ‘ya buaga naa ‘ya naŋka neeni, ‘uotkati ɛkɛ wyeñɛti bɛɛ. 6Mena noŋi a ɔɔn wanna kan maka coŋin jiek duakcɛ ɛkɛ wyeñɛtiyɛ, yɔmjin doki. 7A ɔŋŋiyɛ, dala ɛkkɛ ɛkɛ bɔɔktɛ ɔci ywaŋdɛ yomɛti aŋka naa ɛkɛ bwandɛji yom yoñ bɛɛ. 8A ɔŋŋiyɛ, ‘ya gɔkka ɛkkɛti ne pɛñan, dala ɛkkɛ ɛkɛ lɛɛrtɛ ani ɛkkɛ aŋka ŋeeddɛ ɛkɛ ɛkkɛ anɛ ɛkɛ. 9Worga kiewan ‘ya ne ŋoyɔ neeniyɛ, ‘ya poci ɛkkɛ a poccin buaga gɔrca ne ɛkkɛ agɛ maka tieci jiek te waak waakɛnda boki no. 10Mena bɔɔktɛ ɛkkɛyɛ, ɛkɛ bɔɔka ‘ya daŋkun. Kan genga bala aŋka ɛkɛ bɔɔka ‘ya, oŋ ɛkɛ bɔɔkan ‘ya Kiṭɔ ñamɛtiyɛ, ɛkɛ bɔɔkan ‘ya te ɛkkɛ 11aŋka naa Jwaŋa Yaayan ikin naŋtin ñin acaan ikin paŋi ɛkɛ kuolin ñin bɛɛ. 12Ne ‘ya bɛɛna ban Trɔwacti aŋka lor ma te jyek Kiṭɔ jyeka wonkɛn jyeka pwadinyɛ, Ciɛggɔn pɔy tukɛ pɔŋnɛ te kanŋa aŋan. 13Yeti paŋi ‘ya warɛ ḍiemnɛ iñɔ bɛɛ, acaan mod ɔɔn Tituc mɔkcan ‘ya aŋan bɛɛ. A ɔŋŋiyɛ, ‘ya bana neeni daljan ɔntɔ, ɔci ‘ya ati ban Macɛdɔɔnya. 14Ɔɔn gɔktɔn a pwatcin Juaŋti, acaan ɛkɛ a mena ɔɔn ‘wonnɔn bɔnnin te Yaccu Kiṭɔ te war tɛɛn aŋka ŋeejin ɛkɛ ŋeettiti ma eedɔn ɔɔn noon warda bala ba piinŋan pyeni milany. 15Acaan ɔɔn agɔn pyen Kiṭɔ pyena milan maka uniti ɔci maka tuwati. 16Pyena neeni etti lien maka yienti, yeti ɛkɛ a pyena etti tɛɛtin maka unitiy. Oŋ a menɛ yɔmjin te kanŋa neeniy? 17Acaan ɔɔn balgɔn ba maka coŋin yieyɔn jwali Juaŋ a yied bɛɛ. Yeti ɔɔn balgɔn ba maka yɔɔññɛ Juaŋo. Ɔɔn gɔkɔn te Juaŋ te yoma awarɛ Juaŋ ñamɛti te Yaccu Kiṭɔ ba maka kanŋan Kiṭɔtiy.

will be added

X\