2Kuruntuc 10

1Gena ‘ya Buuluc toocca ɛkkɛti te war ‘ya. ‘Ya a mena gɔk ɛkkɛti ka ‘ya waru dɔwwa iñɔ ne ‘ya balgin iki ɛkkɛy, ɔci ‘ya waru koobba ñaalɔ ne ‘ya baawa ɛkkɛtiy. 2’Ya toocca ɛkkɛti te yom pwani Kiṭɔ, aŋka ɛkkɛ ‘ya tindati wyeñu yaaya ne ‘ya bɛɛda aŋan bɛɛy. Çeej ‘ya ne pwadan ma gɛɛg gɔki agi ɔɔn noŋjɔn ba naŋka iñɔ baanji wɛnni neeni. ‘Ya noŋdin iki ɛkkɛn ne yaayan. 3Ikin ciyin iñɔ baanji wɛnni awarɛ, yeti ikin noŋin ṭwaŋ te wara ṭɛɛrji baanji wɛnni bɛɛ. 4Waka noŋin ikin ṭwaŋ neeni a waka iñɔ baanji wɛnni bɛɛ, yeti ɛkkɛn a wak war tɛɛn Jwaŋa Tolan. Ikin noŋin ṭwaŋ te ɛkkɛn. Ikin nonka tɛyan yaatin iki tyewwin jyeka a jomgin nuutin jitin. 5Naŋki waakɔ naŋka kooki ŋeejin ma Juaŋ ŋeettiti neeni oortin iñɔ. Paŋi waakɛnda muktinyɔ ɔci naŋtin tieŋdi jyek Kiṭɔ. 6Ɔci ne naŋka ɛkkɛ noŋɛ ba jyek Kiṭɔ neeni cwamnɛ ɛkkɛ dokiyɛ, ɔɔn waakɔ ywaŋŋɔn doki aŋka jiek oldɔn maka bɛɛyi jiek neeni wyetkɛnti. 7Ɛkkɛ gɔṭɛ waka niin te waaka bora neeni. Menga bala poŋi te war ɛkɛ, a ɛkɛ a men Kiṭɔ? Pwatcin, dala ɛkɛ poŋdi moki te war ɛkɛ, acaan ɔɔn daŋkun agɔn Ma Kiṭɔ ba ɛkɛ ɔɔn. 8Kan ‘ya noŋ waru ne tolan te jyeka ɔɔn ‘wonnɔnti Ciɛggɔn aŋka ɛkkɛ kooptɛ ɔɔn ñaalɔ neeniyɛ, ‘ya waru a lɔɔn te naŋka wanna bɛɛ. Ɔɔn ‘wonnɔn ɛkɛ jyeka neeni aŋka ɛkkɛ jietɛ ma jitin bɛɛ. 9’Ya buaga naa bala ba ne ‘ya kiewa worgan neeni aŋka ɛkkɛ poddɛ bɛɛ. 10Menga kɔŋji gɔkti agi, “Worgan Buuluc jiekɛn pɛñɔ ɔci tɛɛcin, yeti ne ɛkɛ balgin iki ikinyɛ, ɛkɛ warɛ tɛɛcin bɛɛ, ɔci jyek ɛkɛ a genga bɛɛ.” 11Mena gɔki a ɔɔn wannayɛ, dala ɛkɛ ñingɛ ñiektɛ te waka kiidɔn ɔɔn te worgan ne ɔɔn longɔn ɔntɔ, ɔci te waka naŋdɔn ɔɔn ne ɔɔn balgɔn ɛkkɛtiyɛ, ɛkkɛn bala bolja ne cyɛɛlɔ, a kɛɛptin bɛɛ. 12Ɔɔn poṭṭɔn waak ɔɔn ɔci walla balgɔn ba maka noŋi waakɛn oltan ñamu wanna bɛɛ. Poca gɔrtɛ! Wyeñ booj ɛkkɛn bala a ɔki. Ɛkkɛn waakɛn kooptan ñaalɔ pookɛn, waakɛn poortanti pookɛn te bolja bala ɛkkɛntiy. 13Oŋ yeti ɔɔnyɛ, ɔɔn noŋɔn waakɔ te gena loonan te kanŋa ɔɔnti bɛɛ, yeti ɔɔn ningɔn te kanŋa Juaŋ ɔɔn ‘wonnɔnti naŋdɔn ɔɔn ɛkkɛti, ɔci nona yɔɔnnɔn ɔɔn te kanŋa ɔɔn ‘wonnɔnti Juaŋy. 14Ne ɔɔn bɛɛnɔn ɛkkɛtiyɛ, naŋki wari ɔɔn ati ne loonan ‘yeeccin bɛɛ, yeti ɔɔn bɛɛnɔn dɛnnɔn ɛkkɛti te jyek Kiṭɔ jyeka wonkɛn jyeka pwadin neeni. 15A ɔŋŋiyɛ, ɔɔn noŋdɔn waakɔ te kanŋa naŋɛ maka pookɛn ‘yeettɔn bora te nona yɔɔnnɛ Juaŋ aŋka naŋdɔn ɔɔn neeni bɛɛ. Yeti ɔɔn poŋɔn ka jyeni ɛkkɛ ‘uotti ñamu, ɔci ɔɔn yaaktɔnti noŋdɔn kanŋa tolan ɛkkɛti oŋkanda te nona ɔɔn yɔɔnnɔnti Juaŋtiy. 16Ɔci ɔɔn jyeka wonkɛn jyeka pwadin eedɔn bonka lonin ban ɛkkɛ ŋoyɛti aŋan aŋka naa ɔɔn noŋdɔn waakɔ te kanŋa naŋɛ maka pookɛn te jyeka lali ɛkkɛn bɛɛ. 17Bala ba jyeka a kiigin worga Juaŋji ne gɔkki agi, “Kan mena buagɔn noŋi warɛyɛ, dala ɛkɛ noŋdi warɛ te naŋka naŋŋi Juaŋy.” 18Ciɛggɔn poŋi te mena maŋdɛ ɛkɛy, oŋ yeti ɛkɛ poŋi te mena mooŋi war ɛkɛ parɛ bɛɛ.

will be added

X\