2Kuruntuc 1

1Gena ‘ya Buuluc cuuda Yaccu Kiṭɔ ba yom Jwaŋa Tolan, ɔci mod ikin Timutawuc kiewɔn worga neen neeni. Worga neeni ooddi kaniica Jwaŋa Tolanti ban Kuruntuc i Ma Kiṭɔ maka pwadin ban Akeeyaji warda. 2Dala yom pwani ɔci coodi pwani bala ɛkkɛti te Wey ikin Jwaŋa Tolan ɔci Ciɛggɔn ikin Yaccu Kiṭɔy. 3Dala Jwaŋa Tolan Wey ikin ɔci Ciɛggɔn ikin Yaccu Kiṭɔ yomgɛn pwada a pwani ɛkkɛti, ɔci dala ɛkkɛn ɛkkɛ ‘wontɛ coodi pwanno. 4Ɛkɛ a mena ikin muntinji te yom yoñ ikin waakiday. A ɔŋŋi aŋka ikin da yaakinti maka yomgɛn yeyin muntinji te munna ikin munnintiji Jwaŋa Tolany. 5Acaan bala ba ne ikin ñoowin iki Kiṭɔ te taab ɛkɛyɛ, ikin da yomgɔ pwada te Kiṭɔ te munna neeni daŋkun. 6Kan ɔɔn taamnɔnyɛ, aŋka ɛkkɛ yomgɔ pwaddi, ɔci yɔɔdɛ Juaŋo. Ɔci kan ɔɔn yomgɔ pwaniyɛ, aŋka ɛkkɛ da yomgɔ pwaddi. Naŋka neeni bɛya te tiekin ɛkkɛ yomgɔ tieŋni te taab bɛɛn ikinti waakida neeniy. 7Ɔci paŋŋa poŋɔn ɔɔn te ɛkkɛyɛ, tɛɛna tɛɛno, acaan ŋeejɔn ɔɔn ba ñoowin ɛkkɛ ñoowin iki ɔɔn te taab neeniyɛ, ɛkkɛ daŋkun ñootin iki ɔɔn te yom pwanno. 8Hay modg ɔɔn, ɔɔn buagɔn dala naŋka bɛɛn ɔɔnti yaayan ban Ecya neeni ŋeeddɛ ɛkkɛ. Naŋka neeni cyɛŋŋa cyɛŋi ɔɔnti ne tolan, ɔci ɔɔn beelnɔn te kɛɛn coodi tɛɛtin moki. 9Ɔɔn waakɔ poccin iñɔ bala ba ne ɔɔn wankɔnti ma te lien no. Yeti naŋka neeni bɛɛn a ɔɔn aŋka naa ɔɔn poŋdɔn te waak ɔɔn pookɔ bɛɛ, yeti dala ɔɔn poŋdɔn te gena Jwaŋa Tolan mena maka tuun jɔɔŋdɛ ñaalɔy. 10Ɛkɛ ɔɔn wɛɛnɔn bora te nona yaayanti, ɔci ɛkɛ ɔɔn wɛɛdɔn bora moki. Ɔci paŋi ɔɔn ḍuannɔn aŋa ɛkɛti ka ɛkɛ ɔɔn wɛɛdɔn bora moki. 11A ɔŋŋi ɛkkɛ daŋkun ɔɔn magdintɔ te cɔŋŋo, aŋka maka coŋin gɔkti a pwatcin te gena yuarŋɔn ɔɔn te cɔŋi maka coŋin neeni. Ɔci Juaŋ bieŋɛ tandɛ ɔɔnti, ɔci maka coŋin gɔkti a pwatcin ɛkɛti te ɔɔn. 12Naŋka noŋɔn ɔɔn waakɔ bala a ɔŋŋi, jwali yomg ɔɔn te naŋka naŋŋɔn ɔɔn ṭɛɛrji wɛnniyɛ, ɔɔn noŋŋɔn te yoma ḍiɛran ɔci te pwani Jwaŋa Tolan, yeti te ñing tɛɛn war ma baan budan bɛɛ, yeti ɔɔn noŋŋɔn te yom pwani Jwaŋa Tolan, ɔci noŋŋɔn ne tolan aŋa ɛkkɛti nɔñji. 13Ɔɔn kiedɔn gena parɛ gɛɛl ɛkkɛti bɛɛ, gena waka ɛkkɛ yaaktɛti paŋŋɛn ɔci jitkɛn yuartɛy. ‘Ya baal poŋ ka ɛkkɛ waka neeni jitkɛn yuartɛ ne pwadan. 14Bala ba ɛkkɛ waak jitkɛn yuarnɛ ne ḍiɛran dokiyɛ, ɛkkɛ yaaktɛti noŋdɛ waakɔ te ɔɔn bala ba ne ɔɔn noŋɔn waakɔ te ɛkkɛ, ne oŋŋa Ciɛggɔn Yaccu Kiṭɔ bɛɛdɛy. 15Acaan naŋka neeni ŋeej ‘ya ne pwadanyɛ, ‘ya buaga ka bɛɛd ḍieŋŋa ɛkkɛti te ñamu aŋka ɛkkɛ yomgɔ ñɔya ñɔɔn ne tolan. 16’Ya buaga ka ḍieŋŋa ɛkkɛti ne ‘ya gorda oodda ban Macɛdɔɔnya ɔci dɔɔkta ɛkkɛti moki te ban Macɛdɔɔnya, ɔci ɛkkɛ ‘ya ‘yeettatɛ pɔɔjɔ ne ‘ya oodda ban Yahuudiyay. 17’Ya yomu ŋoodan ne ‘ya buagati noŋa naŋka neeniyɛ? Gena ‘ya buaga ka ɛkɛ naŋdi neeniyɛ, naŋdi ‘ya ba naŋka ṭɛɛrji wɛnni aŋka ‘ya gɔkca ka “Ɛɛ” ɔci “A’a” te oŋŋa ne cyɛɛlɔ? A’a, ɔɔn noŋɔn a ɔɔn bɛɛ. 18Awarɛ, te yenti Jwaŋa Tolan mena ooki jyek ɛkɛ waakɛn bɛɛ neeniyɛ, jwali ɔɔn ɛkkɛtiyɛ, a “Ɛɛ” ɔci “A’a” bɛɛ. 19Acaan Yaccu Kiṭɔ Kaci Jwaŋa Tolan ɛkɛ a mena ɛkkɛ lalkɛ ɔɔny. Ɛkkɛ lalkɛ ɔɔn i Cila ɔci Timutawuc, ɔci jwali ‘ya a “Ɛɛ” ɔci “A’a” bɛɛ. Yeti jwalla a “Ɛɛ” aŋka bala Juaŋti oŋkanda. 20Acaan jwalla ḍuaññɛ Jwaŋa Tolan balkɛ jwalla a “Ɛɛ” te Kiṭɔ, a ɔŋŋi aŋka ɔɔn gɔkɔn ka dala bala a ɔɔn te ɛkɛ te pwani Jwaŋa Tolan neeni. 21Yeti Jwaŋa Tolan ɛkɛ a mena ɔɔn yɔɔnnɔn iñɔ iki ɛkkɛ Kiṭɔtiy, ɔci ɛkɛ ikin ‘wonnin kanŋa byeŋkɔti. 22Ɛkɛ ikin naŋŋin te mañ ɛkɛ, ɔci ikin ‘wonnin Boŋ ɛkɛ yomgɔti ba gena mwoki ikin lakun. 23Yeti ‘ya gɔkca te yenti Juaŋ aŋka ɛkkɛ waakɔ aga lɔɔn bɛɛ. Gena te jyeka neeni aŋka ‘ya bɛɛna ban Kuruntuc men bɛɛ neeni. 24’Ya gɔkka ɔŋŋi aŋka ɛkkɛ myettin te waka ɛkkɛ jyeddɛ bɛɛ, yeti ɔɔn kanŋɔn iki ɛkkɛ te yom ñɔɔn ɛkkɛ, acaan ɛkkɛ yɔdgɛ ne tɛyan te jyeni ɛkkɛ.

will be added

X\