1Timatawuc 5

1I Timutawuc, gɔṭṭi i myettin te kanŋa i kaniicaji ‘wota. Tieŋŋa, kan men a mena tolanyɛ, naa i gɔk ṭey ɛkɛ ne pɛñan bɛɛ. Dala i gɔkca ɛkɛti ne maalan ṭɔɔlɛ bala ba ne ɛkɛ agi wey ɛkkɛ ɔɔn. Ɔci ‘uaya ḍyɛrinyɛ, dala i gɔkca ɛkkɛnti bala ba ne ɛkkɛn akki modg ɛkkɛ ɔɔn. 2Moonga ḍwaŋinyɛ, dala i gɔkca ɛkkɛnti ne maalan ṭɔɔlɛ bala ba ne ɛkkɛn akki mɛyi ɛkkɛ ɔɔn. Ɔci moonga ḍyɛrinyɛ, dala i gɔkca ɛkkɛnti ne maalan ṭɔɔlɛ bala ba ne ɛkkɛn akki kowi ɛkkɛ ɔɔn. Naa paŋŋa yaayan gɛɛl bala iti bɛɛ. 3Moonga ciekyɛ, kan mena gɔṭi ɛkkɛn baawiyɛ, dala i ɛkkɛn maga. 4Moonga ciekyɛ, kan ɛkkɛn balki kɛɛgin ɛkkɛn kɛɛgin a kɛɛginyɛ, dala ŋeettan ɛkkɛn ne pwadan a dala ɛkkɛn moki mɛyi ɛkkɛn, ɔci walla moki ṭyerg ɛkkɛn, ɔci a ɔɔn pwatcin. Dala kɛɛgin moki ma ɛkkɛn a ɔɔn acaan ɛkkɛn magɛ mɛyyɛn a ɔɔn te ñamu daŋkun, ɔci a ɔɔn pwatcin Jwaŋa Tolanti daŋkun. 5Ɛŋa cieñyɛ, ɔci kan ɛkɛ bala ciyi parɛ acaan menga bala gɔṭi ɛkɛ bɛɛyɛ, ɛkɛ yomɛ bala Juaŋti ne pwadan, ɔci ɛkɛ bala cɔki Juaŋti oŋkanda te oŋ jiñɛ, ɔci te ween jiñɛ. Ɛkɛ tooci Juaŋti te waka ɛkɛ buagitiy. 6Yeti ɛŋa cieñyɛ, kan ɛkɛ bala lieṭi waak ne coŋɔn te ḍwaŋ ɛkɛ parɛyɛ, ɛŋa cieñ neeni ɛkɛ bala ba mena tuuta doki. 7Dala i ɛkkɛn myetka ‘wota te jiek jitkɛn daŋkun te gwali moonga ciek neeni aŋka naa ma wookti Ma Kiṭɔ te naŋki ɛkkɛn bɛɛ. 8Acaan kan men gɛɛl moki ma ɛkkɛn, mɛyyɛn ɔci ṭyerkɛn bɛɛyɛ, a ɔɔn bala ba ɛkɛ yookɔn te jyek Juaŋ doki. Ɔci a ɔɔnyɛ, naŋki ɛkɛ yaayɛ ne pɛñan te naŋki maka ciyi budan te jyek Juaŋy. 9Moonga ciekyɛ, kan ɛkkɛn yuongɛn a ma baan ne ḍoogɔ (60) men bɛɛyɛ, ɔci kan ɛkkɛn ‘uaya ɛkkɛn ḍɛɛkɛ te baaṭi tiiyɛyɔ ne ciṭin bɛɛyɛ, naa yeng ɛkkɛn olja worga kiewi i yeng moonga ciekji, aŋka i ɛkkɛn maga te bilk Juaŋ bɛɛ. 10Ɔci moonga yeng ɛkkɛn olja worgajiyɛ, gena moonga guaktan ma agi naŋki ɛkki pwadgɔy. Kan ɛkkɛn kɛɛgin ɛkkɛn gwalɛ ne pwadanyɛ, ɔci kan ɛkkɛn yomgɛn pwadɔ maka wɛlgtiyɛ, ɔci kan ɛkkɛn moki noŋi Ma Kiṭɔti ne pwadan te yoma pwadanyɛ, ɔci kan ɛkkɛn moki maka balki taab magɛyɛ, ɔci kan ɛkkɛn buagɔn noŋdi ne pwadan mati oŋkandayɛ, dala i moonga neeni aŋka yengɛn olja worgaji. 11Moonga ḍyɛrin, moonga ciekyɛ, naa yeng ɛkkɛn olja worga kiewi i yeng moonga ciekji bɛɛ. Kan ɛkkɛn poŋi jyek ḍɛɛn oŋkanda ne tolanyɛ, ɔci paŋŋa neeni bala ñamu ɛkkɛn yomgɛnti oŋkanda ɔɔn. Ɔci a ɔɔnyɛ, ɛkkɛn jyek Kiṭɔ daltan ɔci ḍɛɛtan ma moki. 12Ɔci a ɔɔn jyeka naŋɛ ɛkkɛn i Kiṭɔ te ñamuyɛ, bɛɛtan ɛkkɛn jitin, ɔci acaan a ɔŋŋiyɛ, jiek bɛya ɛkkɛn wyetkɛnti. 13Ɔci moki, moonga ḍyɛrin moonga ciekyɛ, ɛkkɛn ma gɛɛg ciyi budan waakɛn pɛñɔ te kanŋa, ɔci ɛkkɛn ati ḍɔki a ḍwaŋi lɔṭi ma waakɛn oorg maka pookɛn jitin. Ɔci ɛkkɛn bala nɔɔti jiek amaam budan. Ɛkkɛn ani nwati jiek pwatcin bɛɛ. 14A ɔŋŋiyɛ, ‘ya gɔk yomuti ka dala moonga ḍyɛrin moonga ciekyɛ, dala ɛkkɛn ḍɛɛtan mako, ɔci dala ɛkkɛn jietti kɛɛgin, ɔci dala ɛkkɛn woŋgɛn tiittan ma ɛkkɛnti oorg ɛkkɛn jitin. Ɔci a ɔɔnyɛ, maka yookɔn te jyek Juaŋ neeni yaakinti wooki ikin te genga moki bɛɛ. 15Acaan moonga ciek gɛɛg jyetcin ɔntɔ te kaniicaji doki, ɔci ɛkkɛn bala booti Jwaŋa Yaayanti doki. 16Yɔɔddi i myettin lakun ‘wota! Ma Kiṭɔ maka ‘uay ɔci maka moong kan ma ɛkkɛn gɛɛg a moonga ciekyɛ, dala ɛkkɛn ɛkkɛn magtan. Naa moonga ciek balki ma ɛkkɛn neeni bɛya a taab kaniicati bɛɛ. Dala kaniicayɛ, moonga ciek anin baaki maka gɔṭi ɛkkɛn neeni aŋka magdɛ ɛkɛ, acaan ɛkkɛn ma ɛkkɛn baawo. 17Cyekin kaniica maka noŋi kanŋa ɛkkɛn ne tolanyɛ, ɔci maka loṭi ma ne pwadan mokiyɛ, dala i noŋja ne pwadan ɛkkɛnti ba kanŋa ɛkkɛn. 18Acaan worga Juaŋ gɔki agi, “Kan yaan bala olni i wɔɔci jana deeki ma pok aŋka deyi pok iyɛ, naa ɛkɛ ḍyɛga tukɛti bɛɛ.” Ɔci worga moki gɔki agi, “Mena noŋi kanŋayɛ, dala ɛkɛ omdi bilk ba kanŋa ɛkɛ.” 19Kan men gɛɛl gɔki agi ciɛggɔn kaniica neeni baalɔ noŋi ne yaayanyɛ, naa i jyedda budan men bɛɛ. Kan ma gɛɛg ɛkɛ yuarki ne yyɛɛwɔ walla ne ḍoogɔyɛ, dala i oŋ jyedda gɔrca jyek ɛkɛ oŋo. 20Kan men noŋi nɔji awarɛyɛ, kan i buagi gɔkca ṭey ɛkɛyɛ, dala i gɔkca ɛkɛti maka pookɛn ñomgɛnti waakɛnda aŋka ɛkkɛn buatti nɔjja neeni yaayɛ awarɛ. 21Timutawuc, ‘ya gɔkka iti Juaŋ ñamɛti ɔci Yaccu Kiṭɔti ɔci malɛɛkan pwadin ñomgɛnti daŋkun, ka dala i noŋja ba jyeka i myennin ‘ya neeni. Ɔci ne i noŋdi a ɔɔnyɛ, dala i noŋja ma waakɛndati ba bolja ne cyɛɛlɔ. Dala i yomu bala ɛkkɛnti waakɛnda. 22Kan i buagi noŋja mena wɛɛyi ma gɛɛlyɛ, naa i ɛkɛ naŋa ne pɛñan ñamu doki budan bɛɛ. Kan i men gɛɛl naŋa ɔci kan ɛkɛ noŋi ne pwadan bɛɛyɛ, jyeka neeniyɛ, bɛya aŋa i wyeñuti dɔki. Naa nɔji bala i ḍwaŋuti bɛɛ. 23Naa i mot pieg pookɛn bɛɛ. Dala i motca mooy ne ḍiɛran ṭɔɔlɛ acaan kon i balki taab, ɔci aŋka dala i waru pwada acaan i waru yaayɛ a ñaccu gɔ moki waru yaayɛ acaan taab bala i konuti neeni. 24Ma gɛɛgyɛ, naŋki ɛkkɛn naŋka yeyin niin te waakɛn a lyɛlta, ɔci nɔji ɛkkɛn neeni ɛkkɛn eedɛ non godan. Ɔci maka pookɛn gɛɛgyɛ, ɛkkɛn coki naŋki ɛkkɛn waakɛn. Jyek ɛkkɛn ootan bora bɛɛ. Yeti jyek ɛkkɛn bɛya bora ne baaṭi dɔki te oŋ godan Jwaŋa Tolan. 25Ɔci jyek naŋka pwadin bala a ɔɔn daŋkun. Jyek naŋka pwadin gɛɛgyɛ, ŋeettan ma waakɛnda, ɔci jyek naŋka pwadin gɛɛgyɛ, bɛya bora ne pɛñan bɛɛ, bɛya bora ne baaṭi dɔki.

will be added

X\