1Timatawuc 4

1Ɔɔn myennɔn Boŋ Jwaŋa Tolan ne pwadan agi ne ninka bɛya ne ṭɛɛr noŋɛ wyeñɛ baldiyɛ, ma kaniica gɛɛg jyeka awarɛ neeni daltan. Ɔci ɛkkɛn jyeddi ɔci bootti amaam jyeka ɛkkɛn laltɛti jɔkin yeyin a jyeka a jomgin neeniti. 2Maka loṭi ɛkkɛn te jyeka pookɛn neeniyɛ, ɛkkɛn noŋi ba ɛkkɛn akki maka pwadin ɔɔn, yeti ɛkkɛn a maka pwadin bɛɛ. Ɛkkɛn jomi jieko, ɔci ɛkkɛn yaakinti paŋi jyeka pwadin bɛɛ. 3Maka neeniyɛ, ɛkkɛn dɛyi ma te jyek ḍɛɛwin, ɔci ɛkkɛn moki dɛyi ma te waka amtan ma gɛɛg. Yeti waka neeni aŋŋɛ Juaŋ ɔci ‘wonnin ɛkɛ ikin. A ɔŋŋiyɛ, ikin maka jyeti Juaŋti, maka jyeka awarɛ neeni ŋeecɔn ɛkkɛnyɛ, ikin gɔktin a pwatcin Juaŋti te waka neeni. Ɔci ma Juaŋ yaakinti omi waka neeni te yoma pwadan. 4Waka aŋŋɛ Juaŋyɛ, ɛkkɛn pwadɔ waakɛnda. Kan men gɛɛl gɔkti a pwatcin Juaŋti te waka neeniyɛ, ɛkɛ yaakinti omdi waka neeni waakɛnda, 5acaan waka neeni pwadgin te jyek Juaŋ ɔci te cɔŋŋa neeni. 6Kan i Ma Kiṭɔ nɔɔtka jyeka neeni jitkɛnyɛ, a ɔɔnyɛ, i noŋ kanŋa ne pwadan Yaccu Kiṭɔti, bala ba ne i pyeṭi waru te jyek jyeni, ɔci te jyeka boonni i a jyek lalla awarɛ neeni. 7Dala i waru uutca ɔntɔ ne loonan te jyeka jiɛtan ma a jyeka jitkɛn baaw budan wanna, naa i tieŋja ɛkkɛn bɛɛ. Dala i waŋu tiicca oŋkanda te yom i aŋka i noŋja naŋki Jwaŋa Tolan. 8Kan i waŋu tiicca te war i aŋka ɛkɛ tɛy tɛyyɛ, a ɔɔn pwatcin. Yeti jyek tiit yomgɔ te coodi Juaŋ aŋka bala ñamu. Acaan jyek tiit yomgɔyɛ, ɛkkɛn etti waka pwadin iñɔ baanji ṭɛɛrji wɛnni acca, ɔci moki ne baaṭi daŋkun. 9Jwali ṭɔɔlɛ gɛɛl bala ne cyɛɛlɔ. Jwalla neeni gena jwalla awarɛ. Ma yaakinti jyeddi jwalla neeniti waakɛnda. 10(Ikin kanŋin ne tolan ne taab baali ikinti ɔɔn.) Ɔci jwalla neeni gɔki agi, “Ikin kɛɛyin naŋki Jwaŋa Tolan mena ciyi tɛɛti yuonginday. Ɛkɛ a Mena Yuoci ma waakɛnday. Ɛkɛ a Mena Yuoci maka jyeddi ɛkɛti nɔñji ne tolan.” 11Gɔṭṭi Timutawuc kaci ‘ya, naa i mwonna te myetkin ma te jyeka i myennin ‘ya worgaji neeni bɛɛ, ɔci walla te lalla neeni bɛɛ. 12Naa ma lɛɛrti i waru agi i agji gaciic ne i a mena ḍiɛran bɛɛ. Dala i gɔk te lɛmma pwadan, ɔci noŋja naŋka pwadin aŋka maka jyeti Jwaŋa Tolanti neeni lɔkti ba naŋki i neeni, ɔci moki ba anna ani i ma neeniyɛ, ɔci ɛkkɛn moki lɔkti. Ɔci moki ba jyenna i jyetti Juaŋti neeniyɛ, ɔci ɛkkɛn moki lɔkti. Ɔci ba coodi i coodda pwadan neeniyɛ, ɔci ɛkkɛn moki lɔkti. 13Dala i pokca worga Juaŋ mati, ɔci dala i ṭey ma, ɔci lorca ma oŋkanda ne ‘ya bɛɛda iti ɔɔn. 14Dala i waŋu tiicca te naŋka i ‘wonniti Juaŋ te oŋŋa cyekin kaniica byeŋkɛn tañkiti itiy. Ɔci te oŋŋa wannayɛ, ɛkkɛn bala gɔki te Boŋ Juaŋ te jyek naŋka bɛya ne ŋoyɔ itiy. 15Dala i waŋu tiicca te kanŋa i neeni. Dala i ñingu juaddi te ɛkɛ, aŋka dala i ŋeetti ma waakɛnda i baal ‘uocca ñamu gɔ moki ‘uoci ɔɔn. 16Dala i waŋu tiicca te coodi i, ɔci te lali i daŋkun. Ɔci a ɔɔnyɛ, i waru maga paru, ɔci i yaaktiti maka pookɛn, maka tyeŋi jyek i maga daŋkun.

will be added

X\