1Timatawuc 2

1Gɔṭṭi, ‘ya gɔkka iti, jwalla bala ñamu te jyeka pookɛn waakɛndayɛ, gena jyek cɔŋŋo. Dala ɛkkɛ cɔktɛ Juaŋti te maka pookɛn waakɛnda. Dala ɛkkɛ toottɛ Juaŋti aŋka ɛkɛ yomɛ pɔktɛ ɛkkɛnti. Ɔci ne ɛkkɛ cɔktiyɛ, dala ɛkkɛ gɔktɛ a pwatcin Jwaŋa Tolanti te naŋki ɛkɛ neeni. 2Dala ɛkkɛ cɔktɛ Juaŋti te ḍuaŋan ḍwaŋin waakɛnda, ɔci maka bala ḍuaŋan ḍwaŋin neeni ŋotkɛnti daŋkun aŋka ɛkkɛn magdɛ Juaŋ te muŋi baan aŋka ikin cietin ne pwadan, ɔci aŋka ikin noŋtin ba naŋki Juaŋ oŋkanda. 3Cɔŋŋa neeniyɛ, pwad pwado, ɔci yɔmjin Juaŋti Mena Yuoci ikiny. 4Acaan ɛkɛ buagɔn yuoci ma waakɛnda, ɔci ɛkɛ buagɔn dala jyeka awarɛ neeni ŋeettan ɛkkɛn. 5Juaŋ bala ne cyɛɛlɔ budan. Ɔci cuuda ikin daŋkun bala ne cyɛɛlɔ budan. Gena mena etti jyeka naŋŋɛ Juaŋ ikintiy. Gena Yaccu Kiṭɔ, mena aŋi men baany. 6Ɛkɛ tuun aŋka ɛkɛ woni ma waakɛnda. Te lyen ɛkɛ te oŋŋa ḍuaññɛ Juaŋ wannayɛ, jiek lɛɛlnɛ ɛkɛ bora ne pwadan a Juaŋ buagɔn ma waakɛnda uda. 7A ɔɔnyɛ, ‘ya naŋŋa Juaŋ aŋi mena loṭi ma ɔci cuuda Yaccu. ‘Ya cuonna Juaŋ aŋka lor Keedin Pookɛn te jyeka awarɛ te jyek jyenna jyetki ma Juaŋti neeni. Ɛɛ, ne ‘ya gɔka ka ‘ya cuonna Juaŋ neeniyɛ, ‘ya jom jiek bɛɛ. ‘Ya gɔk awarɛ. 8’Ya buaga dala maka ‘uay cɔkti Juaŋti kaniicanji waakɛnda. Dala ɛkkɛn cɔkti te yoma pwadan. Ne ɛkkɛn cɔkkiyɛ, naa ɛkkɛn looñi mengati bɛɛ, ɔci naa ɛkkɛn wɛyyɔ bɛɛ. 9Ɔci gɔṭṭi moki, dala i maka moong myetka, ne ɛkkɛn bɛɛtɛ on Juaŋ ona tolanyɛ, dala ɛkkɛn ɛɛŋdi bworŋin ne pwadan, ɔci dala ɛkkɛn waakɛn tiitan ne pwadan aŋka naa maka ‘uay gɔṭi booti ɛkkɛn waakɛn bɛɛ. Yeti naa ɛkkɛn buagɔn ma jieddi ɛkkɛn te pani jyeyi a ɔɔn bɛɛ, ɔci walla te waka ‘yɛŋtan ɛkkɛn ba dahab bɛɛ, ɔci lirga ‘yɛŋtan ma a luulan ɔci bworŋin wiɛlɛn tɛyan a ɔɔn bɛɛ. 10Moonga gɔki agi ɛkkɛn aginti maka moṭi Juaŋtiyɛ, dala ɛkkɛn aŋka jiɛtan ma te naŋka naŋtan ɛkkɛn pwadin neeni. 11Gɔṭṭi ‘wota, moongyɛ, dala ɛkkɛn ciya lieda kaniicaji, ɔci dala ɛkkɛn tieŋdi jyeka laltan ma te yoma pwadan. Naa ɛkkɛn noŋi waakɛn bɛɛ. 12’Ya buaga naa maka moong loṭi maka ‘uay bɛɛ, ɔci naa ɛkkɛn ḍwaŋdi yomgɛnti aŋka ‘yeṭi maka ‘uay jitkɛn bɛɛ. Dala ɛkkɛn ciya lieda. 13Jiek bala a ɔɔn moongti ogo? Jiek bala a ɔɔn acaan Adamyɛ, ɛkɛ cɔnnɛ Juaŋ ñamu, ɔci Awwayɛ, ɛkɛ cɔnnɛ Juaŋ ne ŋoyɔ. 14Ɔci moki a Adam ɛkɛ naŋŋɛ ñin Jwaŋa Yaayan bɛɛ. Gena Awwa aŋka naŋŋɛ ñin Jwaŋa Yaayany. Ɔci ɛkɛ jyek Juaŋ bɛɛññɛji. 15A ɔŋŋiyɛ, Juaŋ moong cuonnɛ pɛñi ɔci taab ne ɛkkɛn jiedki kɛɛginy. Yeti kan maka moong ciyi ne pwadan te jyenna ɛkkɛn jyetki Juaŋti neeni, ɔci kan anna ɛkkɛn anki ma bala ɛkkɛn yomgɛntiyɛ, ɔci kan naŋki ɛkkɛn pwadɔyɛ, ɔci kan ɛkkɛn yaakinti poŋi jiek ne pwadanyɛ, ɛkkɛn magdɛ Juaŋ te jiedi kɛɛgin.

will be added

X\