1Timatawuc 1

1Gena ‘ya Buuluc, cuuda Yaccu Kiṭɔ te yom Jwaŋa Tolan Mena Yuoci ikin, ɔci te yom Yaccu Kiṭɔ moki. Yaccu Kiṭɔyɛ, ɛkɛ a mena etti naŋka pwadin naŋka jyettin kɛɛtin ikiny. 2Timutawuc, ‘ya kiewan worga iti. I aŋŋi kaci ‘ya te jyenna i jyetti Kiṭɔti neeni. Dala Jwaŋa Tolan Wey ikin ɔci Ciɛggɔn ikin Yaccu Kiṭɔ yomgɛn pwada a pwani iti, ɔci dala ɛkkɛn yomgɛn pɔktan iti, ɔci dala ɛkkɛn i ‘wonti coodi pwanno. 3Ne ‘ya noŋa jɔŋda te ban Ɛpacacti oodda ban Macɛdɔɔnyatiyɛ, ‘ya gɔkkan iti ka dala i yedda te ban Ɛpacacti acaan ma gɛɛg bala loṭi ma amaam aŋan. Ɔci ‘ya buaga dala i gɔkca ɛkkɛnti te naŋki ɛkkɛn neeni. Dala ɛkkɛn naŋki ɛkkɛn neeniyɛ, daltan. 4Ɔci moki dala ɛkkɛn mwondi te jyeka jomgin ɔci te jyeka lwoktan ma te jyek yɔrg ɛkkɛny. Te jyeka neeniyɛ, jiek ḍuobbin ma wyetkɛnti, ɔci pɔy Jwaŋa Tolan pɔya yuartan ma ne ma jyetti neeni pɔya neeni yuartan ma moki bɛɛ. 5Dala i maka neeni myetka jyeka lorki ɛkkɛn ma amaam wanna yɔttan ñin, acaan ikin buagin dala Ma Kiṭɔ oondi yɔtin. Ma Kiṭɔ ooniyɔ awarɛ ne yomg ɛkkɛn pwatkiy, ɔci moki ne jwalla yaayan gɛɛl baali ɛkkɛn yomgɛnti aŋka ma wookki ɛkkɛn bɛɛy, ɔci ne ɛkkɛn jyetki Yaccuti ne pwadany. 6Yeti maka loṭi ma amaam neeni ɛkkɛn jyetcin ɔntɔ te waka pwadin neeniti. Ɛkkɛn jyek naŋka pwadan neeni ŋeecɔn ne pwadan bɛɛ. Ɛkkɛn bala tyewɔ te wyeñ booji te jyeka budan. 7Maka neeniyɛ, buagɔn agi dala ɛkkɛn ŋeeddɛnti maka pookɛn agi ɛkkɛn ñingɛn tɛyɔ te lali jyek ganuun Muuca neeni. Yeti ɛkkɛn jyek ganuun jitkɛn ŋeecɔn ne pwadan bɛɛ. Jyeka guaktan ɛkkɛn mati neeni jitkɛn kwoyɔn ɛkkɛn. 8Ɛɛ, ŋeecin ikin jyek ganuun pwadɔ, kan ɛkkɛn tiiyɛyɔ ma ba bolja Juaŋ buagɛy. 9Yeti ŋeecin ikin jyek ganuun bɛɛn acaan maka noŋi ba jyek Juaŋ bɛɛ. Yeti ganuun bɛɛn acaan te maka nɔɔtk maka noŋi ba yomg ɛkkɛn pookɛn yookɔn te Jwaŋa Tolany, ɔci moki bala te maka bɛɛyi jyek Juaŋ jitkɛny. Ɔci moki te maka jyek Juaŋ baaw ɛkkɛntiy. Ɔci moki te maka paŋi ɛkkɛn yeyiny. Ɔci moki te maka gɔki jyeka yeyiny. Ɔci moki ganuun bala te maka noki weyyɛn iki mɛyyɛn iki maka pookɛny. 10Ɔci moki jyek ganuun bala te maka noŋi tommo, ɔci te maka ‘uay maka tobi yɔtin pookɛny, ɔci te maka koṭi may, ɔci te maka jomi jieky, ɔci te maka aaltan te yenti Jwaŋa Tolan te jyeka awarɛ bɛɛy. Kan gen gɛɛl bala ɔntɔ te jyek Juaŋtiyɛ, jyek ganuun bala te ɛkɛ daŋkun. 11Jwaŋ ikin Jwaŋa pwadan neeniyɛ, ɛkɛ ‘ya ‘wonna kanŋa miet ma te jyek ɛkɛ jyeka pwadin neeni. 12Ɛɛ, ‘ya gɔk a pwatcin Ciɛggɔn ikin Yaccu Kiṭɔti, hay! Acaan ɛkɛ ‘ya muona bora noŋ kanŋa ɛkɛ neeni, ɔci ‘ya ‘wonna ɛkɛ war tɛɛn ɛkɛ noŋa kanŋa ɛkɛ neeni. 13Te ñamuyɛ, ‘ya baal gɔk ka yenti Yaccu Kiṭɔ neeni yaayɛ, ɔci ‘ya baal noŋ ne yaayan Ma Kiṭɔti, ɔci ‘ya baal wook ɛkɛ te jyeka yeyin. Yeti Juaŋ yomɛ pɔŋnɛ ‘yati acaan ne ‘ya baala noŋa naŋka yaayan neeniyɛ, ‘ya jyeti Yaccuti men bɛɛ, a ɔŋŋiyɛ, naŋka naŋi ‘ya wanna konɛ ŋeej ‘ya bɛɛ. 14Acc, hay! Juaŋ yomɛ pɔŋnɛ ‘yati, ‘ya maŋŋa ɛkɛ aŋka ‘ya yomu ḍuacca ɛkɛti ne pwadan. Ɔci ɛkɛ ‘ya maŋŋa aŋka ‘ya jyeti Yaccuti ɔci ‘ya an maka pookɛn ne tolan te ani Yaccu. 15Jwali ṭɔɔlɛ gɛɛl bala ne cyɛɛlɔ. Jwalla neeniyɛ, gena jwalla awarɛ, ma yaakinti jyeddi jwalla neeniti waakɛnda. Jwalla neeni gɔki agi Yaccu Kiṭɔ bɛɛnɔ iñɔ baanji wɛnni, aŋka maka nɔɔtk yɔɔnda ɛkta. Ɔci ‘yayɛ, maka pookɛn buani ‘ya te nɔjjo, yeti ɛkɛ ‘ya yɔɔñña doki. 16Ɔci Juaŋ yomɛ pɔŋnɛ ‘yati. Ɛkɛ buagɔn dala maka pookɛn gɔrti naŋki Yaccu Kiṭɔ aŋka Yaccu ŋeettiti ma ne ɛkɛ loomgɛ tɛɛki mati oŋkanda aŋka ŋeettan ma Yaccu Kiṭɔ noŋi a ɔɔn maka jyeddi ɛkɛti waakɛnda, ɔci ɛkkɛn ‘wondɛ ɛkɛ tɛɛtin, ɔci tɛɛtin neeni baadi ywongati bɛɛ. 17A ɔŋŋiyɛ, ‘ya gɔk a pwatcin Juaŋti mena a Ciɛggɔn Tolan mena ciyi yuonginda neeniti. Ɛkɛ baadi bɛɛ. Yeti ɛkɛ yuartin ikin te woŋgɔ bɛɛ. Ɛkɛ a Juaŋ waanɛ. Ɛkɛ pwanna pwanno, ɔci ma noŋi ne pwadan ɛkɛti. Dala ma jieddi ɛkɛ yuonginda ɔɔn! Amɛɛn. 18Gɔṭṭi acca hay! Kaci ‘ya, Timutawuc, ‘ya buaga i myettin te jyek kanŋa i bala ba te ñamu ne ma myennɛ Juaŋ gɔkki te jyek naŋki i naŋka bɛya ne baaṭiy. Dala i poŋja jyeka guagɛ ma te i neeni aŋka i noŋja kanŋa Juaŋ ne pwadan. 19Dala jyeni i Kiṭɔti tieka te yoma wɔɔgan. Ma gɛɛg yomg ɛkkɛn tiiyɛ ñin bɛɛ, ɔci a ɔŋŋiyɛ, ɛkkɛn jyeni ɛkkɛn jyenna jyetki Yaccuti neeni daljɛ doki. 20Aymaneeyac ɔci Alɛkcaandaryɛ, ɛkkɛn bala noŋi a ɔɔn. Ɔci ‘ya ɛkkɛn oljan Jwaŋa Yaayan bieŋɛti aŋka dala ɛkkɛn taabdi aŋka ɛkkɛn mwondi te ŋɛɛgga ḍorki ɛkkɛn jyek Jwaŋ ɛkkɛn neeni.

will be added

X\