1 Gɔṭṭɛ modg ɔɔn, jiek ŋeejɛ ɛkkɛ doki, a ɔŋŋiyɛ, men gɛɛl yaakinti kiedi worga ɛkkɛti aŋka ɛkkɛ myettɛ te oŋŋa Ciɛggɔn ikin bɛɛdi moki bɛɛ. 2 Çeejɛ ɛkkɛ ne Oŋŋa ɛkɛ bɛɛdiyɛ, ɛkɛ bɛya lieda ba mena ɛɛn ɔɔn. 3 Maka pookɛnyɛ, ɛkkɛn tieki gɔki agi haldu, gena yaayɔ gɛɛl bɛɛdɔ ɛkkɛnti bɛɛ. Ɔci ne ɛkkɛn balki poŋki ba paŋŋa wanna men ɔɔnyɛ, Yaccu bɛya dɛndi bora ne pɛñan lieda ɔɔn. Ɔci ywobji Jwaŋa Tolan bɛya ɛkkɛnti ɛkkɛn yuurdɛ ñin, ɔci pɔya yooŋti ɛkkɛn ɔntɔ gɛɛl bala moki bɛɛ. Bala ba ɛɛŋ ne amɛ jiediyɛ, kaci bɛya ne pɛñan te wɔɔka kwoyi ɛkɛ, ɔci pɔya ɛkɛ tuoci warɛ te jiedi gɔ bala bɛɛ. 4 Modg ɔɔn, ɛkkɛ balgɛ nona mielti ba maka pookɛn neeni bɛɛ. Ɔci ne oŋŋa Yaccu bɛɛdiyɛ, ɛkkɛ poddɛ ba ma ne potki te naŋki mena ɛɛn neeni bɛɛ. 5 Ɛkkɛ waakida agɛ maka ciyi te nona bɔwan. Ɛkkɛ jiek kwoyɛ bɛɛ. Ɛkkɛ jiek ŋeejɛ. Ikinyɛ, akin maka ciyi te nona ulan bɛɛ. 6 Ɔci acaan a ɔŋŋiyɛ, naa ikin cietin amaam ba coodi maka pookɛn bɛɛ. Dala ikin woŋgɔ tiittin oŋkanda te coodi ikin. 7 Maka wiciyɛ, ɛkkɛn wici te ween jiñɛ. Ɔci moki, maka noktan mooyyɛ, ɛkkɛn noktan mooy te ween jiñɛ. Ɔci ba jyek naŋka naŋtan ma te ween jiñɛ neeniyɛ, ɔci bala ba jyek coodda cieki maka jiek ŋeecɔn bɛɛy. Ɛkkɛn ciyi te nona ulan. 8 Ikinyɛ, aŋka akin maka ciyi te nona bɔwan. Ɔci acaan a ɔŋŋiyɛ, dala ikin jyettin Juaŋti ne pwadan oŋkanda. Ɔci dala ikin anin Juaŋ i ma baano. Ɔci kan ikin noŋtin a ɔɔnyɛ, jyeni ikin ikin kɛɛtin ñin ba maka ooddi lañti ne ecki kɔɔrjin ɛkkɛn byeŋkɛntiy. Ɔci moki dala ikin kɛɛttin naŋki mena yuoci ikiny. Ɔci ba jyek jyenna kɛɛyin ikin yɔɔt Juaŋ te Kiṭɔ neeniyɛ, bala ba taaggan a bilk ne balki maka noowɔ wyetkɛntiy. 9 Jyeka naŋŋɛ Jwaŋa Tolan te baaṭi gɔki agi ywobji bɛɛdɔ ikintɛ? A’a, a ɔɔn bɛɛ. Jyeka naŋŋɛ ɛkɛ te ikinyɛ, gɔki agi ikin yɔɔtinti ɛkɛ te naŋki Yaccu Kiṭɔ. 10 Yaccu Kiṭɔ neeni tuun te ikin, ɔci kan ikin ciyin tɛɛtin walla kan ikin tuuninyɛ, ikin balkin tɛɛtin iki ɛkɛ men ɔɔn. 11 Ɔci ba ṭeena ɛkkɛ ṭeyɛ yɔtin pookɔ neeniyɛ, dala ɛkkɛ ṭeeddɛ yɔtin a ɔɔn oŋkanda aŋka ɛkkɛ yɔɔddɛ ne tɛyan ba naŋka naŋdɛ ɛkkɛ wanna ɔɔn. 12 Modg ɔɔn, dala ɛkkɛ tieŋdɛ jyek maka wɛɛyi ɛkkɛ kaniicaji maka kanŋan ne tolan te ɛkkɛ neeni. Ɛkkɛn a cyekin ɛkkɛ te kanŋa Jwaŋa Tolan, ɔci ɛkkɛn ṭeyi ɛkkɛ. 13 Dala ɛkkɛ anɛ ɛkkɛn ne tolan te kanŋa ɛkkɛn neeni. Dala ɛkkɛ ciedɛ ne pwadan. Naa ɛkkɛ yoyyɛ ñin bɛɛ. 14 Gɔṭṭɛ hay! Modg ɔɔn, ɔɔn ṭeyɔn ɛkkɛ kan men gɛɛl ɛkkɛti warɛ pɛñcin te kanŋa waakyɛ, dala ɛkkɛ ɛkɛ ṭeedɛ wyeñɛti. Dala ɛkkɛ maka buayi ciŋdɛji aŋka ɛkkɛn yomgɛn tɛya, ɔci dala ɛkkɛ maka waakɛn koyan magdɛ yomgɛnti te jieko, ɔci dala ɛkkɛ yomgɔ tiektɛ mati waakɛnda. 15 Kan men gɛɛl noŋdi ne yaayan ɛkkɛtiyɛ, naa ɛkkɛ noŋdɛ ne yaayan ɛkɛti bɛɛ. Dala ɛkkɛ aŋka noŋdɛ ne pwadan gena ɛkɛti. Dala ɛkkɛ moowɛ yɔtin ne pwadan oŋkanda, ɔci dala ɛkkɛ noŋdɛ ne pwadan mati waakɛnda. 16 Dala ɛkkɛ yomgɔ ñɔɔna ñɔɔn oŋkanda ɔɔn. 17 Dala ɛkkɛ cɔktɛ Jwaŋa Tolanti a ñaccu. 18 Dala ɛkkɛ gɔktɛ a pwatcin Juaŋti oŋkanda te jiek waakɛnda, acaan maka bala Yaccutiyɛ, Juaŋ buagɔn dala ɛkkɛn noŋdi a ɔɔn. 19 Naa ɛkkɛ kɛkɛ Boŋ Jwaŋa Tolan bɛɛ. 20 Naa ɛkkɛ gɔkɛ agi jyek maka lwoki ma te jyeka bɛya te Juaŋti neeni a jyeka budan bɛɛ. 21 Dala ɛkkɛ pottɛ gɔrtɛ jyeka neeni ne pwadan ne jyeka neeni balki ba jyek Juaŋ awarɛ boki no. Ɔci dala ɛkkɛ jyeka pwadin neeni mugdɛ ɛkkɛ yomgɔti. 22 Ɔci dala ɛkkɛ yooktɛ te jyeka yeyin waakɛnda. 23 Jwaŋa Tolan waanɛ, mena ‘woñi ma te coodi pwaniyɛ, dala ɛkɛ noŋdi naŋki ɛkɛ ɛkkɛti aŋka ɛkkɛ pwaddɛ. Dala Juaŋ waak ɛkkɛ ɔci paŋi ɛkkɛ ɔci yomg ɛkkɛ moki gwaldɛ ɛkɛ ne pwadan ne oŋŋa Ciɛggɔn ikin Yaccu Kiṭɔ bɛɛdi ɔɔn. Ɔci ne oŋŋa ɛkɛ bɛɛdiyɛ, dala ɛkkɛ mɔktɛ ɛkɛ ciyɛ ne pwadan. 24 Jwaŋa Tolan mena ɛkkɛ bornɛ aŋka agdɛ kɛɛgin ɛkɛ neeniyɛ, ɛkɛ a mena tieci jyek ɛkɛ jitkɛn ne pwadan. Ɔci ɛkkɛ gwaldɛ ɛkɛ ne pwadan awarɛ ba jyeka ḍuaññɛ ɛkɛy. 25 Modg ɔɔn, dala ɛkkɛ cɔktɛ Juaŋti te ɔɔn. 26 Dala ɛkkɛ modg ikin ñiibdɛ waakɛnda. 27 ’Ya gɔk ɛkkɛti te yenti Ciɛggɔn ikin ka dala ɛkkɛ worga neeni pagdɛ modg ikinti waakɛnda. 28 Dala Ciɛggɔn ikin Yaccu Kiṭɔ yomɛ pwada a pwani ɛkkɛti oŋkanda.
