1Tacalunika 4

1Yɔɔddɛ, ‘ya gɔkka ‘wota hay! Modg ɔɔn, ɔɔn ṭeyɔn ɛkkɛ ne tolan te jwali gɛɛl te yenti Yaccu Kiṭɔ. Ɛkkɛ lalkɛ ɔɔn te coodda pwadan coodi Jwaŋa Tolan. Ɔci ɛkkɛ balgɛ ciyɛ a ɔɔn, ɔci ɔɔn gɔkɔn ɛkkɛti ka dala ɛkkɛ ‘uottɛ ñamu gɔ moki ‘uoccɛ ñamu ɔɔn te coodi Juaŋo. 2Jyeka ɛkkɛ myetkɛ ɔɔn te yenti Ciɛggɔn ikin Yaccuyɛ, ŋeejɛ ɛkkɛ. 3Jwaŋa Tolan buagɔn agi dala ɛkkɛ ciejjɛ budan te nɔjjo. Ɔci moki agi dala ma mwondɔ te naŋki tomi waakcinda. 4Maka ‘uayo, Jwaŋa Tolan buagɔn dala ɛkkɛ woŋgɔ tiittɛ te naŋki ɛkkɛ, menga da ciya ɛŋ ɛkɛ aŋka tiidɛyɔ ne pwadan. 5Ɛkkɛ ‘wonnɛ Juaŋ waak ɛkkɛ aŋka ɛkkɛ noŋɛ tomi bɛɛ. Maka jyek Juaŋ kwoyɔn, maka kɛɛna pookɛnyɛ, ɛkkɛn aŋka noŋi tommo, yeti ɛkkɛyɛ, naa ɛkkɛ noŋdɛ ba naŋki ɛkkɛn neeni bɛɛ. 6Naa men gɛɛl noŋdi ne yaayan ɛŋ moodɛnti bɛɛ. Kan men gɛɛl noŋdi ne yaayan ɛŋ moodɛntiyɛ, bala ba ɛkɛ noŋi ne yaayan mod ɛkkɛnti doki. Ɛkkɛ myetkɛ ɔɔn doki, ɔci moki ɛkkɛ ṭeekɛ ɔɔn te ñamu ka maka noŋi ba naŋka neeniyɛ, ywobji Juaŋ bɛya ɛkkɛn wyetkɛnti ne tolan. 7Ɛɛ, gɔṭṭɛ, ikin muonin Juaŋ bora aŋka noŋin tomi bɛɛ. Yeti ikin muonin ɛkɛ bora aŋka ikin cietin ne pwadan ɛkɛti. 8Kan men gɛɛl yookɔn warɛ te tiid jyeka neeniyɛ, gena jyek men baan ɛkɛ yookiti warɛ wanna bɛɛ. Gena Jwaŋa Tolan ɛkɛ yookiti warɛ wanna. Jwaŋa Tolan neeniyɛ, gena ɛkɛ ‘woñi ɛkkɛ te Boŋ ɛkɛ, Boŋa Pwadan neeni. 9Yeti te jyek oonnin Ma Kiṭɔ oonnin labjɛ baaw neeniyɛ, men gɛɛl ɛkkɛ kiegdɛ worga te jyek oonnin yɔtin neeni moki bɛɛ, acaan ɛkkɛ lallɛ Juaŋ te jyek oonnin yɔtin neeni doki. 10Ɔci moki ɛkkɛ anɛ Ma Kiṭɔ modga ban ɛkkɛ ban Macɛdɔɔnya waakɛnda baan konɛ warda. Ɔɔn ṭeyɔn ɛkkɛ ka dala ɛkkɛ ‘uottɛ ñamu ne tolan te ani ɛkkɛ a ‘uoccin gɔ moki ‘uoccɛ ñamu ɔɔn. 11Dala ɛkkɛ ciedɛ ne pwadan. Ɔci dala ɛkkɛ woŋgɔ tiittɛ te naŋki waak ɛkkɛ. Ɔci dala ɛkkɛ kandɛ te byeŋkɔ menga da te ḍwaŋ ɛkɛ ba jyeka ɛkkɛ ṭeeki ɔɔn te ñamu neeni. 12Ɔci a ɔɔnyɛ, naŋki ɛkkɛ pwada maka ciyi budan te jyek Jwaŋa Tolan ñomgɛnti. Ɔci moki te kanŋa ɛkkɛ neeniyɛ, ɛkkɛ buagɛ ñwoyɛ maka pookɛn waakɛn te waak gɛɛg moki bɛɛ. 13Acca hay! Modg ɔɔn, ɔɔn buagɔn dala jyek Ma Kiṭɔ maka tuwa ŋeeddɛ ɛkkɛ ne pwadan. Acaan ɔɔn buagɔn naa ɛkkɛ yomgɔ yiegdi kuuyɛ ba maka pookɛn bɛɛ. Ɛkkɛn yaakinti jyeti kɛɛy naŋka pwadin naŋka bɛya ɛkkɛnti ne ŋoyɔ neeni bɛɛ. 14Ɛɛ, ikin jyettin jiek agi Yaccu tuunɔ ɔci jɔŋnɔ ñaalɔ te koolji tɛɛti moki. Ɔci ba naŋki ɛkɛ neeniyɛ, ikin yaakinti jyettin moki agi Ma Kiṭɔ ɛkkɛn luoldɛ Juaŋ ñaalɔ te kolk jitin te naŋki Yaccu neeni ne oŋŋa ɛkɛ bɛɛdɛy. 15Ɛkkɛ myetkɛ ɔɔn te jyek Ciɛggɔn ikin ka ikin maka ciyi tɛɛti men neeniyɛ, ne oŋŋa Ciɛggɔn bɛɛdiyɛ, ikin bottin ñamu kooktin i ɛkɛ ñamu te maka tuun neeni bɛɛ. A’a, ikin oottin iki ɛkkɛn a cyɛɛlɔ. 16Ne malɛɛka tolan gɛɛl yaaddi te pwana tolanyɛ, ɔci Jwaŋa Tolan kuotti ṭuoŋ oŋi ne cyɛɛlɔ, acaan Ciɛggɔn ikin koodi iñɔ te pɔliji. Ɔci Ma Kiṭɔ maka tuunyɛ, ɛkkɛn jɔldi ñaalɔ te kolk jitin tɛɛti moki. 17Ɔci ikin maka tɛɛtin baanji ṭɛɛrji wɛnniyɛ, ikin oŋ oottin ñaalɔ oŋ iki maka jɔŋdi ñaalɔ te lienti neeniy, ɔci ikin waakida oottin pɔliji, ɔci kooktin iki Ciɛggɔn pɔliji. Ɔci ikin cietin iki ɛkɛ yuonginda ɔɔn. 18Acaan a ɔŋŋiyɛ, ne ma ɛkkɛ tuutiyɛ, dala ɛkkɛ poŋdɛ te jyeka neeni, ɔci dala ɛkkɛ muondɛ jitin pookɔ te joono.

will be added

X\