1Tacalunika 2

1Modg ɔɔn, ŋeejɛ ɛkkɛ te coodda cienɔn ɔɔn ban ɛkkɛ neeniyɛ, eccin naŋka pwadan ɛkkɛti. 2Çeejɛ ɛkkɛ te ñamu ne ɔɔn balgɔn ban Pilibbiyɛ, taab bala ɔɔnti. Ma bala noŋi ne yaayan ɔɔnti. Yeti ɔɔn buayɔn bɛɛ. Ɔɔn yomgɔ tɛy tɛy te naŋki Jwaŋa Tolan, ɔci ɔɔn bɛɛnɔn ban ɛkkɛ, ɔci ɔɔn balgɔn mietɔn ɛkkɛ te jyeka wonkɛn jyeka pwadin te Jwaŋa Tolan ne ma yookɔn te ɔɔn ɔɔn. 3Ɔɔn loṭɔn ma oŋkanda te jyeka awarɛ neeni ɔci te yoma pwadan. Ɔɔn noŋɔn ma ñingɛn bɛɛ. 4Ɔɔn ‘wonnɔn Jwaŋa Tolan kanŋa miti ma te jyeka wonkɛn jyeka pwadin neeni. Ɔci acaan a ɔŋŋiyɛ, aŋka ɔɔn loṭɔn ma neeni. Ɔɔn buagɔn dala jyeka loṭɔn ɔɔn ma neeniyɛ, pwaddi aŋa Juaŋti parɛ. Ɔɔn buagɔn jyek ɔɔn pwaddi ma baanti bɛɛ. A’a, aŋa Juaŋti parɛ. Acaan ɛkɛ poci ikin a poccin aŋka gɔrti ne ikin yomgɔ balki a ɔkiy. 5Çeejɛ ɛkkɛ, ɔci ŋeejɛ Juaŋ moki, ɔɔn gɔkɔn dyetɔn ɛkkɛ ñingɔ te lɛmma milan bɛɛ. Ɔɔn buagɔn wak ɛkkɛ eedɔn ɔɔn bɛɛ. A’a. 6Kan maka cundɛ Yaccu jiɛtan mayɛ, a ɔɔn pwatcin doki. Ɔɔn agɔn cuudan Yaccu, yeti ɔɔn buagɔn naa ma jieyi ɔɔn bɛɛ. Kan a ɛkkɛ ɔci kan walla a mena parɛyɛ, ɔɔn buagɔn menga jieddi ɔɔn bɛɛ. 7Ne ikin balkin iki ɔɔnyɛ, ɔɔn balgɔn gɔṭɔn ɛkkɛ ne pwadan ba ɛŋa gɔṭi kɛɛgin ɛkɛ ne pwadany. 8Acaan yomg ɔɔn bala ɛkkɛti ne tolan ɔɔnyɛ, ɔci ɛkkɛ eekkɛ ɔɔn jyek Juaŋ jyeka wonkɛn jyeka pwadin neeni. Ɔci ɔɔn balgɔn poŋɔn gɔkɔn agi kan ɔɔn tuudɔn te kanŋa neeniyɛ, baatɔ. A ɔɔn aŋka ŋeeddɛ ɛkkɛ ɔɔn anɔn ɛkkɛ ne tolan awarɛ. 9Modg ɔɔn, dala ɛkkɛ ñingɔ ñiektɛ te kanŋa kanŋɔn ɔɔn ban ɛkkiy. Ɔci te kanŋa neeniyɛ, taab dɔɔkkin ɔɔn waakɔti acaan ɔɔn balgɔn kanŋɔn te ween jiñɛ ɔci te oŋ jiñɛ aŋka ɔɔn yɔɔrdɔn waka amdɔn ɔɔn. Ɔɔn balgɔn loṭɔn ɛkkɛ te jyeka wonkɛn jyeka pwadin, ɔci ɔɔn buagɔn naa coodi ɔɔn ban ɛkkɛ wanna bɛya ɛkkɛti a taab bɛɛ. 10Ɛkkɛ ɔɔn yuarŋɔntɔ ne ɔɔn balgɔn ciyɔn a ɔkiy. Ɔci coodda ciyin ɔɔn neeniyɛ, ŋeejɛ Juaŋ daŋkun. Naŋki ɔɔn pwad pwad ɛkkɛti maka jyeti Juaŋti neeni. Gena yaayan gɛɛl bala ɔɔn ḍɔɔggɔti bɛɛ. 11Ɛkkɛ ɔɔn ŋeejɔntɔ ne ɔɔn balgɔn ṭeyɔn ɛkkɛ waakɔ waakiday, bala ba kɛɛgin weegɛn ne ṭeyi kɛɛgin waakɛny. 12Ɛkkɛ muonɛ Juaŋ bora, ɔci aŋŋɛ ma ɛkɛ, ɔci acaan a ɔŋŋiyɛ, ɔɔn cyeŋɔn ɛkkɛ aŋka dala ɛkkɛ ciedɛ ba coodda ɛkɛ yomɛ ñɔyɛy. 13Ɔɔn gɔkɔn a pwatcin Juaŋti oŋkanda te ɛkkɛ, acaan ne ɛkkɛ tieŋnɛ jyek Juaŋ te tuk ɔɔntiyɛ, ɛkkɛ jyeka neeni muŋŋɛ, ɔci ɛkkɛ gɔŋnɛ agi jyeka neeniyɛ, a jyek ma baan budan bɛɛ. Gena jyek Jwaŋa Tolan. Awarɛ, jyeka neeniyɛ, ɛkkɛn a jyek Jwaŋa Tolan, ɔci jyeka neeni bala kanŋan ɛkkɛ yomgɔti acaan ɛkkɛ jyettɛ Juaŋti doki. 14Hay! Ɛkkɛ modg ɔɔn, taab bɛɛn ɛkkɛti te ma ɛkkɛti neeni bala ba taab bɛɛn ma kaniicanti ban Yahuudiya ne Ma Yahuud ma ɛkkɛn woodgɛn balki noŋki ne yaayan ɛkkɛntiy. 15Ma Yahuudyɛ, ne ɛkkɛn maka a bɔwan Jwaŋa Tolan ban ɛkkɛn nokkitiyɛ, ɛkkɛn oŋ Yaccu Kiṭɔ nogɛ moki. Ɔci ɛkkɛnyɛ, ɔɔn ŋualkɔn ɔntɔ te bonk ɛkkɛnti. Maka neeniyɛ, ɛkkɛn yookɔn te Jwaŋa Tolan, ɔci yookɔn te ma baan waakɛnda moki. 16Ma Yahuud, ɛkkɛn dɛyi ɔɔn agi naa ɔɔn lorcɔn Keedin Pookɛn te jyek Yaccu bɛɛ. Ɛkkɛn buagɔn naa Keedin Pookɛn neeni yɔɔdɛ Juaŋ bɛɛ. Nɔji ɛkkɛn tola gɔ moki toli ɔɔn, ɔci acca toli doki, ɔci a ɔɔnyɛ, bala ba ywobji Jwaŋa Tolan bɛɛn ɛkkɛn ḍɔɔggɛnti doki. 17Modg ɔɔn, te ninka ne ḍiɛkan neeniyɛ, ikin balkin iki ɔɔn bɛɛ. Yeti te paŋi ɔɔnyɛ, bala ba ne ikin balkin iki ɔɔn doki no. Ɔɔn ñingɔ boŋi te ɛkkɛ, ɔɔn buagɔn ikin yɔɔrtin iki ɔɔn. Ɔɔn noŋɔn bɛɛdɔn ḍieŋdɔn ɛkkɛti, 18yeti pɔya ɔɔn bɛɛdɔn ḍieŋdɔn ɛkkɛti neeni ga bala bɛɛ. Pɔya neeniyɛ, uullɛ Jwaŋa Yaayan. Ɔci ‘ya Buuluc neeniyɛ, ‘ya baal poc te jyek woon oŋkanda paru, yeti pɔy baawo. 19Hay! Oŋŋa Ciɛggɔn ikin Yaccu bɛɛdiyɛ, ɔɔn yomgɔ ñɔɔgdi ɛkɛ ñamɛti te gena yeti? Ɛɛ, ɔɔn yomgɔ ñɔɔgdi ɛkɛ ñamɛti te ɛkkɛ. 20Acaan ɛkkɛ agɛ maka ɔɔn yomgɔ ñɔɔki oŋkanday.

will be added

X\