1Butruc 5

1Cyekin kaniica, ‘ya ṭey ɛkkɛ. ‘Ya a ciɛggɔn kaniica ba ɛkkɛ ɔɔn. Ɔci ‘ya a mena Kiṭɔ yuarŋɛ ne taab baali ɛkɛtiy. Ɔci moki ne ɛkɛ bɛɛdiyɛ, ɛkɛ naŋdɛ Juaŋ pwada pwanno, ɔci pwani ɛkɛ neeni bɛya ‘yati daŋkun. 2Maka bala kaniican ɛkkɛtiyɛ, dala ɛkkɛ gɔṭɛ ɛkkɛn ne pwadan. Ɛkkɛn bala ba kulin Juaŋo. Dala ɛkkɛ noŋdɛ kanŋa neeni te yoma pwadan, naa ɛkkɛ noŋɛ kanŋa te yoma baaw ba ɛkkɛ iirkɛ ma a iirŋ bɛɛ. Ɔci naa ɛkkɛ noŋɛ kanŋa neeni te waka bɛya ɛkkɛti a bilk a waka budan neeni bɛɛ. Naŋka neeni a lɔɔno. Dala ɛkkɛ kandɛ acaan ɛkkɛ buagɛ ma magdɛ a maŋŋo. 3Naa ɛkkɛ menga iirdɛ a iirŋ kaniicaji te coodi ɛkkɛ byeŋkɔti bɛɛ. Dala ɛkkɛ noŋdɛ ne pwadan mati aŋka ɛkkɛn lɔkti ba naŋki ɛkkɛ ɔɔn. Ɛkkɛ balgɛ ba ḍɛɛnin kulin. 4Kan ɛkkɛ noŋdɛ ne pwadan Ma Kiṭɔti a ɔɔnyɛ, ne mena tolan mena a Ḍɛɛnɔn Kulin bɛɛdiyɛ, ɛkɛ ɛkkɛ ‘wondɛ waka pwadin. Yeti waka ɛkkɛ ‘wondɛ ɛkɛ neeni bala ba waka ‘wontan ma maka ḍwaŋin iñɔ ṭɛɛrji wɛnni bɛɛ. Wak maka iñɔ wɛnni ɛkkɛn baadi lakun. Yeti Yaccu ɛkkɛ ‘wondɛ pwani ɛkɛ pwanna baadi bɛɛy. 5Ɔci ɛkkɛ maka kaalko, dala ɛkkɛ tieŋdɛ jyek maka ḍwaŋin. Ɔci ɛkkɛ waakidayɛ, dala ɛkkɛ nooŋdɛ yɔtin ne pwadan te yoma ḍiɛran. A ɔɔn, jyeka kiigin gɔki agi, “Kan ma kooŋi waakɛn agi ɛkkɛn aginti maka ḍwaŋinyɛ, Juaŋ kɛkti te ɛkkɛn. Ɔci maka poŋi yomgɛnti agi ɛkkɛn aginti maka ḍyɛrinyɛ, Jwaŋa Tolan yomɛ pwad pwad ɛkkɛnti.” 6Acaan a ɔŋŋiyɛ, dala ɛkkɛ yomgɔ ḍyɛrdi. Ɛkkɛ balgɛ Juaŋ bieŋɛti ɔci ɛkɛ tolla tollo. Ɔci ne oŋ gɛɛlti a oŋŋa pwadan ɛkɛtiyɛ, ɛkkɛ naŋdɛ ɛkɛ agdɛ maka ḍwaŋin. 7Jyeka lildɛ ɛkkɛ yomgɔti te jyek coodiyɛ, dala ɛkkɛn oldɛ ɛkkɛ ɛkɛ bieŋɛti waakɛnda, acaan ɛkɛ tieci waŋɛ te ɛkkɛ. 8Woŋgɔ pɔktɛ, hay! Dala ɛkkɛ woŋgɔ tiittɛ! Acaan Jwaŋa Yaayan mena yookɔn te ɛkkɛ neeniyɛ, ɛkɛ buagɔn muowi ɛkkɛ bala ba jyɛl ne ati wiagi lieṭi gena amdɛ ɛkiy. 9Dala ɛkkɛ kɛktɛ te ɛkɛ. Dala ɛkkɛ yɔɔddɛ ne tɛyan te jyenna ɛkkɛ jyettɛ Jwaŋa Tolanti neeni. Çeejɛ ɛkkɛ modg ɛkkɛ baan konɛ wardayɛ, ɛkkɛn balki taab ba ɛkkɛ ɔɔn. 10Jwaŋa Tolan yomɛ pwad pwad mati te jiek waakɛnda. Ɛkɛ ɛkkɛ muonɛ bora te naŋki Yaccu Kiṭɔ. Ɔci ne baaṭi ɛkkɛ ciedɛ iki ɛkɛ yuonginda yuonginda ɔɔn. Yeti accayɛ, taab bala ɛkkɛti ne ḍiɛran ṭɔɔlɛ men. Dala ɛkkɛ magdɛ Juaŋ aŋka dala ɛkkɛ waakɔ tɛya te jyek ɛkɛ, ɔci dala ɛkkɛ yɔɔdɛ ne tɛyan oŋkanda. 11Jwaŋa Tolanyɛ, ɛkɛ a mena tolan te waak waakɛnda. Ɔci ɛkɛ bala yuonginda yuonginda ɔɔn! Amɛɛn. 12Cilayɛ, ɛkɛ aŋi ba mod ɔɔn. Ɛkɛ a mena tieci jiek waakɛn. ‘Ya maŋŋa ɛkɛ te kiin worga ṭɔɔlɛ ḍuulan neeni. Ɔci te worga neeniyɛ, ‘ya baal ṭey ɛkkɛ. Jyeka ɛkkɛ myennin ‘ya te yom pwani Juaŋ neeniyɛ, ɛkkɛn a jyeka awarɛ. Dala ɛkkɛ yɔɔdɛ ne tɛyan te jyeka neeni. 13Ma kaniica wɛnni ban Baabilyɛ, ɛkkɛn ñiepi ɛkkɛ. Ɛkkɛn muonɛ Juaŋ bora ba ɛkkɛ ɔɔn. Ɔci kaci ‘ya Markyɛ, ɛkɛ ñiepi ɛkkɛ daŋkun. 14Dala ɛkkɛ ñiebdɛ yɔtin pookɔ ne pwadan te yoma pwadan. Ɛkkɛ waakida maka bala Kiṭɔtiyɛ, dala ɛkkɛ yomgɔ pwada a pwanno. Bawwin.

will be added

X\