1Butruc 4

1Kiṭɔ warɛ taabbin ne tolan te ɛkkɛ. Ɔci acaan a ɔŋŋiyɛ, naa ɛkkɛ yooktɛ te taab bɛɛ. Dala paŋi ɛkkɛ bala ba paŋi Kiṭɔ, ɔci a ɔɔnyɛ, ɛkkɛ waakɔ tɛya. Kan men gɛɛl taabbin ne tolanyɛ, ɛkɛ mwonnin te nɔji ɛkɛ awarɛ. 2Acca a ɔŋŋiyɛ, ɔci oŋkanda ne ñamu ɔɔnyɛ, dala coodda ciyɛ ɛkkɛ ṭɛɛrji wɛnni neeni ‘wondɛ Jwaŋa Tolan bieŋɛti, naa ɛkkɛ ciedɛ ba naŋka ma baan yomgɛn buagiti bɛɛ. 3Te baaṭiyɛ, ɛkkɛ balgɛ noŋɛ ba naŋki maka ciyi budan Juaŋ kwoyɔn neeni. Naa ɛkkɛ noŋdɛ a ɔɔn moki bɛɛ. Naŋki ɛkkɛ te baaṭi neeniyɛ, gena jyek paŋi tomi ɛkkɛ yomgɔti, ɔci nooŋi mooyo, ɔci naŋki tomi waakɛnda. Ɔci moki ɛkkɛ balgɛ noŋɛ naŋka yeyin jitkɛn ne coŋɔn te mali jɔkin yeyin neeni. 4Ɔci acca ma korkɛn buañi, acaan ɛkkɛ yookɛ te naŋka yaayan neeni iki ɛkkɛn. Ɔci acaan a ɔŋŋiyɛ, ɛkkɛn wooki ɛkkɛ. 5Yeti ne oŋ gɛɛltiyɛ, ɛkkɛn jyek naŋki ɛkkɛn neeni ootan bora Jwaŋa Tolan mena noŋi godanti. Mena neeni noŋdi godan maka ciyi ñaalɔ acca, ɔci maka tuutan daŋkun. 6Acaan a ɔŋŋiyɛ, aŋka maka tuun te baaṭi lalkɛti ma te jyek Juaŋ jyeka wonkɛn jyeka pwadin wanna. Waak ɛkkɛn ḍakcin ba lyen ma waakɛnda. Yeti boŋ ɛkkɛn bala tɛɛti men te tɛɛtin Juaŋo. Ɔci Juaŋ noŋdi godan ɛkkɛnti waakɛnda. 7Oŋ coodda iñɔ baanji wɛnniyɛ, wyeñɛ noŋi cɔɔldi doki. Acaan a ɔŋŋiyɛ, dala ɛkkɛ paŋi ɛkkɛ ywaŋdɛyɔ ne pwadan. Dala ɛkkɛ woŋgɔ tiittɛ te coodi ɛkkɛ aŋka ɛkkɛ yaaktɛti cɔktɛ a cɔŋi oŋkanda ɔɔn. 8Naŋka pwadan te naŋka pookɛnyɛ, dala ɛkkɛ oondɛ yɔtin pookɔ oŋkanda ne tolan. Mena ani mayɛ, ɛkɛ ma bɔɔktɛ te nɔji ɛkkɛn nɔjja naŋtan ɛkkɛn coŋin neeni. 9Dala ɛkkɛ yomgɔ pwadɔ Ma Kiṭɔ maka wɛlgti, naa ɛkkɛ korkɔ ŋuurŋan te waka amtan ɛkkɛn bɛɛ. 10Ɛkkɛ waakida ‘wonnɛ Jwaŋa Tolan kanŋan jitkɛn ne coŋɔn, menga da te kanŋa ɛkɛ, menga da te kanŋa ɛkɛ. Ɔci a ɔŋŋiyɛ, dala naŋka ɛkkɛ ‘wonnɛ Juaŋ neeni kandɛ ne pwadan aŋka dala ɛkkɛ moowɛ yɔtin pookɔ te yom pwani ɛkkɛ ‘wonnɛ Juaŋ neeni. 11Gɔṭṭɛ poca, kan men gɛɛl ɛkkɛti loṭi mayɛ, dala ɛkɛ gɔkti mati te jyeka Juaŋ buagiti ɛkɛ loṭi may. Ɔci kan men gɛɛl moki ma te kanŋa parɛ gɛɛlyɛ, dala ɛkɛ noŋdi ba war tɛɛn Juaŋ daŋkun. Dala ɛkkɛ noŋdɛ naŋki ɛkkɛ waakɛnda te war tɛɛn Juaŋo, ɔci a ɔɔnyɛ, ma jieddi Juaŋ te yenti Yaccu Kiṭɔ. Dala ɛkɛ jiɛtan ma yuonginda yuonginda ɔɔn. Ɔci dala ɛkɛ aga mena tolan yuonginda yuonginda ɔɔn. Amɛɛn. 12Maka ana ‘yay, naa ɛkkɛ korkɔ buaya noon ne taab pɛñan ba maañ neeni gɛɛl bɛɛdɛ ɛkkɛti bɛɛ. Naa ɛkkɛ toottɛ agi taab neeni bala a ɔki a ɔɔn bɛɛ. Taab neeni bala aŋka Jwaŋa Tolan gɔrti ɛkkɛ, ne ɛkkɛ yomgɔ balki a ɔkiy. 13Dala ɛkkɛ aŋka yomgɔ ñɔya ne ɛkkɛ ñoowɛ iki Yaccu te taab ɛkɛy. Kan a ɔɔnyɛ, ɔci ne oŋŋa ɛkɛ bɛɛdiyɛ, ɛkɛ yuartan ma ne ɛkɛ pwanni a pwaniy, ɔci ɛkkɛ yomgɔ ñɔya a ñɔɔn ne tolan. 14Kan ma wooki ɛkkɛ te yenti Kiṭɔyɛ, Juaŋ ɛkkɛ magdɛ, ɔci Boŋ ɛkɛ Boŋa pwadan neeniyɛ, bala ɛkkɛti. 15Kan taab ɛkkɛ balayɛ, naa taab neeni bala ɛkkɛti te naŋki ɛkkɛ naŋka yeyin bɛɛ, ɔci walla te nooŋi ma bɛɛ, ɔci walla moki te kali waak bɛɛ, ɔci walla moki te luupcin menga tukɛ luuptɛ jyek maka pookɛnti bɛɛ. 16Yeti kan men gɛɛl balki taab acaan ɛkɛ a men Kiṭɔyɛ, naa ɛkɛ yomɛ wiakti poŋi agi taab neeni a lɔɔn bɛɛ. Dala ɛkɛ gɔkti mati te yenti Yaccu Kiṭɔ neeni men ɔɔn. Ɔci a ɔɔnyɛ, ɛkɛ jieddi Juaŋo. 17Oŋŋa Jwaŋa Tolan noŋdi godan mati bɛɛn doki. Ɛkɛ bala noŋi godan acca ma ɛkɛti ñamu. Ɔci kan godan ɛkɛ tɛɛcin ikin Ma Kiṭɔtiy, oŋ maka yookɔn te jyeka wonkɛn jyeka pwadin pɔya yooŋti ɛkkɛn ɔntɔ te ywobji ɛkɛti bala boki? A’a. 18A ɔɔn bala ba jyeka kiigin ne gɔkki agi, “Maka pwadinyɛ, kan jyek yɔɔt ɛkkɛn tɛy tɛyyɛ, oŋ maka yookɔn te Juaŋ ɔci maka noŋi ne yaayan pɔya ɛkkɛn yɔɔdɛ Juaŋ bala wɛnɛ?” 19Acaan a ɔŋŋiyɛ, kan ma balki taab ba yom Juaŋyɛ, dala ɛkkɛn noŋdi naŋka pwadin. Ɔci dala ɛkkɛn waak ɛkkɛn ‘wontan Juaŋ bieŋɛti, acaan Juaŋyɛ, ɛkɛ a Mena oki waako, ɔci ɛkɛ wak ɛkɛ daldɛ bɛɛ.

will be added

X\