1Butruc 3

1Maka moongo, dala ɛkkɛ noŋdɛ ba jyek ‘uay ɛkkɛ. ‘Uay ɛkkɛyɛ, ɛkkɛn gɛɛg jyeti jyek Jwaŋa Tolan bɛɛ. 2Yeti kan ɛkkɛn gɔrti naŋka pwadan ɛkkɛti ne ɛkkɛ waakɔ dɔɔdɛ iñɔ buayɛ ɛkkɛn oŋkandayɛ, ɛkkɛn buagdɛ jyek Juaŋ daŋkun. Ɛkkɛn dita jyeddi te jyeka guagdɛ ɛkkɛ ɛkkɛnti a jyek Juaŋ te tuggɔ wanna bɛɛ. Yeti ɛkkɛn gɔrti gena naŋki ɛkkɛ naŋka pwadan, ɔci ɛkkɛn jyeddi. 3Naa ɛkkɛ anɛ ywaŋi waaka bora budan aŋka ma gɔṭi ɛkkɛ pwannɛ a pwadgin a ɔɔn bɛɛ. Gena waka ba pani jyeyi, ɔci waka ‘yɛŋgan ma a waka naŋɛ ma te dahab, ɔci bworŋin pwadin. 4Dala ɛkkɛ aŋka pwaddɛ a pwadgin aŋa yomgɔti. Ɔci dala ɛkkɛ agdɛ maka tuggɛn luyan. Waka yɔŋki ma waakɛn ba dahab ɔci pani jyeyi ɔci bworŋin neeniyɛ, ɛkkɛn baadi. Yeti yoma pwadan neeni, ɛkɛ baadi bɛɛ. Yoma pwadan neeni pwad pwad Juaŋti ne tolan. 5Te baaṭi moonga pwadin maka jyeti Juaŋtiyɛ, ɛkkɛn pwanna pwani te tuk luun te yom pwani ɛkkɛn neeni. Ɔci ɛkkɛn bala tyeŋi jyek ‘uay ɛkkɛn ne pwadan. 6A ɔɔnyɛ, bala ba naŋki Caara ɛŋ Abrahim. Ɛŋ Abrahimyɛ, ‘war ɛkɛ barŋɛ ɛkɛ agi, “Ciɛggɔn.” Ɔci ɛkkɛ hay moongo, kan ɛkkɛ noŋɛ ba naŋki Caara, ɔci kan ɛkkɛ buayɛ genga bɛɛyɛ, ɛkkɛ agdɛ moonga pwadin Juaŋ ñamɛti ba Caara awarɛ. 7Ɔci ɛkkɛ maka ‘uay daŋkun, dala ɛkkɛ poŋdɛ ne pwadan te moong ɛkkɛ. Ɛkkɛn waakɛn tɛɛcin ba ɛkkɛ bɛɛ, yeti ɛkkɛ agɛ maka ne cyɛɛlɔ te tɛɛtin ɛkkɛ ‘wonnɛ Jwaŋa Tolan tɛɛtin baadi bɛɛ neeniy. Acaan a ɔŋŋiyɛ, dala ɛkkɛ andɛ moong ɛkkɛ, ɔci a ɔɔnyɛ, aŋka cɔŋi ɛkkɛ tieŋdɛ Juaŋo. 8Ɛkkɛ waakidayɛ, dala ɛkkɛ ciyɛ te paŋŋa ne cyɛɛlɔ. Dala ɛkkɛ poŋdɛ te modg ɛkkɛ. Dala ɛkkɛ oondɛ yɔtin pookɔ. Dala ɛkkɛ yomgɔ pwada mati. Ɔci dala ɛkkɛ tuggɔ luya. 9Kan men gɛɛl noŋdi ne yaayan ɛkkɛtiyɛ, naa ɛkkɛ noŋdɛ ɛkɛti ne yaayan bɛɛ. Kan men gɛɛl ɛkkɛ ḍardɛyɔyɛ, naa ɛkkɛ ɛkɛ yettɛ ḍardɛyɔ bɛɛ. Kan men gɛɛl ḍor ɛkkɛyɛ, dala ɛkkɛ gɔktɛ Juaŋti aŋka Juaŋ noŋdi ne pwadan ɛkɛti, acaan Jwaŋa Tolan buagɔn dala ɛkkɛ noŋdɛ a ɔɔn. Ɔci kan ɛkkɛ noŋdɛ a ɔɔnyɛ, Juaŋ noŋdi ne pwadan ɛkkɛti daŋkun. 10Jyeka kiigin gɔki agi, “Kan men gɛɛl buagɔn ciyi tɛɛti te yoma ñɔyan ɔci kan buagɔn coodda pwadanyɛ, naa jyeka yeyin bala ɛkɛ tukɛti bɛɛ. Ɔci naa ɛkɛ jomi jiek bɛɛ. 11Dala ɛkɛ warɛ yaldɛ ɔntɔ te naŋka yeyinti neeni. Dala ɛkɛ noŋdi naŋka pwadin. Dala ɛkɛ lieṭi pɔya ɛkɛ ciedɛ ne pwadan. Ɔci ne ɛkɛ pɔy yuardɛyɛ, dala pɔya neeni mugdɛ ɛkɛ ne pwadan. 12Acaan Jwaŋa Tolan bala gɔṭi maka pwadin. Ɔci ɛkɛ jyetkɛ a pɔggin, ɔci ɛkɛ tieŋdi ne ɛkkɛn cɔkti ɛkɛti. Yeti Jwaŋa Tolan yooktan te maka yeyin.” 13Kan ɛkkɛ yomgɔ buagɔn naŋka pwadin ne pɛñany, a menɛ noŋdi ne yaayan ɛkkɛtiy? 14Yeti kan taab bɛya ɛkkɛti te naŋki ɛkkɛ naŋka pwadinyɛ, Juaŋ noŋdi ne pwadan ɛkkɛti. Naa ɛkkɛ buayɛ maka noŋi ne yaayan ɛkkɛti neeni bɛɛ. Naa ɛkkɛ poŋɛ jiek yomgɔti bɛɛ. 15Dala ɛkkɛ poŋdɛ naŋki Kiṭɔ yomgɔti agi ɛkta agdɔ Ciɛggɔn Tolɔ. Dala ɛkkɛ waakɔ ywaŋdɛ oŋkanda aŋka ɛkkɛ yaakɛti ṭwoktɛ mena tootti ɛkkɛti te jyek kɛɛna kɛɛyɛ ɛkkɛ Juaŋ yomgɔti neeni. Yeti dala ɛkkɛ ṭwoktɛ maka neeniti te yoma pwadan ɔci ne maalan. 16Naa jwalla yaayan gɛɛl niindi ɛkkɛ ḍɔɔggɔti bɛɛ. Ɔci a ɔɔnyɛ, kan ma wooki ɛkkɛyɛ, ɔci ne ɛkkɛn gɔrtɛ coodda ɛkkɛ ciyɛ te jyek Yaccu Kiṭɔ neeniyɛ, ne baaṭi waaŋi ɛkkɛn neeni aga lɔɔn ɛkkɛnti. 17Kan men gɛɛl balki taab te naŋki ɛkɛ naŋka pwadin neeni ba yom Juaŋ a ɔɔnyɛ, a ɔɔn pwatcin ne tolan te taab bɛya ɛkɛti te naŋki ɛkɛ naŋka yaayan neeniy. 18Taab Kiṭɔyɛ, bala a ɔɔn daŋkun, ɛkɛ balki taab te naŋki ɛkɛ naŋka pwadan. Ɛkɛ tuun oŋi ne cyɛɛlɔ te nɔji ma waakɛnda. Mena pwadan neeni tuun te maka yeyin, aŋka ikin ootin ɛkɛ Juaŋti. War ɛkɛ tuun yeti boŋ ɛkɛ aŋka bala tɛɛti men. 19Ɔci te boŋ ɛkɛyɛ, ɛkɛ ati ɔci ‘yeeñga bala ciyi ciginji bana maañ neeni lallɛ te jyek Juaŋo. 20’Yeeñga bala ciginji neeni, gena ‘yeeñg maka jyek Juaŋ bɛɛyɛji te baaṭi ne Nɔwa baali cɔti murka tolany. Jwaŋa Tolan bala kɛɛy ɛkkɛn. Ɛkɛ looñi ɛkkɛnti ne pɛñan bɛɛ. Nɔwa bala noŋi murka. Ɔci ma gɛɛg tieŋŋin jiek ne ḍiɛkan ṭɔlgɛn budan ba ne dɔɔyɔ wyetkɛn ne ḍoogɔ. Ɛkkɛn aŋka yɔɔññɛ Juaŋ te piego. 21Bala ba Nɔwa ne unni te piegyɛ, bala a ɔɔn daŋkun te ɛkkɛ ne oŋŋa ɛkkɛ buulkɛ mayɛ, ɛkkɛ unnɛ doki te yɔɔta ɛkkɛ yɔɔññɛ Juaŋ te naŋki Yaccu Kiṭɔ ne ɛkɛ jɔŋni ñaalɔ te koolji tɛɛti mokiy. Jyek bulti neeniyɛ, gena jyek lɔŋ ma waakɛn te giikin bɛɛ. Ne ma bultiti mayɛ, a ɔɔn bala ba ɛkkɛn gɔkti Juaŋti agi dala ɛkkɛn yomgɛn pwaddɔ. 22Ne Yaccu jɔŋni ñaalɔ te lientiyɛ, ɛkɛ ati ñaalɔ pɔliji. Ɔci acca ɛkɛ bala ciyi Jwaŋa Tolan taaŋɛti taaŋŋa byerɔn. Ɔci malɛɛkan waakɛnda bala noŋi ba jyek ɛkɛ. Ɔci war tɛɛn boŋki ɔci jɔkin waakɛnda bala ɛkɛ bieŋɛti.

will be added

X\