1Butruc 1

1Gena ‘ya Butruc Cuuda Yaccu Kiṭɔ kiewan worga ɛkkɛti neeni. Ɛkkɛ agɛ Ma Kiṭɔ Ma Yahuud maka bala ciyi a wɛlg bonka pookɛn neeni jitiny. Gena ban Buntɔc, ɔci ban Galatiya, ɔci ban Kapadociiya, ɔci ban Ecya, ɔci ban Bitinnya. 2Ne ɛkkɛ baagɛ menyɛ, ɛkkɛ ŋeejɛ Wey ɔɔn Jwaŋa Tolan doki, ɔci ɛkkɛ muonɛ ɛkɛ bora. Jwaŋa Tolan ɛkkɛ ywaŋŋɛyɔ yomgɔti doki te Boŋ ɛkɛ. Acaan ɛkɛ buagɔn dala ɛkkɛ noŋdɛ ba jyek Yaccu Kiṭɔ oŋkanda, ɔci dala yimg Yaccu ɛkkɛ ywaŋtɛ yomgɔti te nɔji ɛkkɛ. Dala Jwaŋa Tolan yomɛ pwada pwani ɛkkɛti oŋkanda, ɔci dala ɛkɛ ɛkkɛ ‘wondɛ coodi pwanno. 3Jwaŋa Tolan Jwaŋ Ciɛggɔn ikin Yaccu Kiṭɔ, ɔci Wey Ciɛggɔn ikin Yaccu Kiṭɔyɛ, ɛkɛ pwad pwado. Ɛkɛ yomɛ pɔŋnɛ ikinti ne tolan. Ɔci ikin jiennin ɛkɛ te jiedda woonɛ. A ɔɔnyɛ, ikin jyettin kɛɛyin naŋki Juaŋ naŋka bɛya ikinti a naŋka pwadin neeni. Ikin yaakinti kɛɛyin a ɔɔn acaan Yaccu Kiṭɔ jɔŋŋin ñaalɔ te koolji tɛɛti moki, ɔci ɛkɛ lien buannɛ. 4Ɔci ba naŋki ma baan ne maal baali weegɛntiyɛ, ɔci ɛkɛ kɛɛgin wɛɛddɛ maalo, ɔci bala ba naŋki Juaŋ daŋkun. Mala ma ‘wondɛ ɛkɛyɛ, ɛkkɛn bala ñaalɔ pɔliji daŋkun. Ɛkkɛn ḍuannɛ Juaŋ te ɛkkɛ. Mala aŋan neeni baadi ywongati bɛɛ. Ɛkkɛn yiegdi bɛɛ, ɔci ɛkkɛn aga donk bɛɛ. 5Te jyenna ɛkkɛ jyettɛ Juaŋti neeniyɛ, Jwaŋa Tolan bala yuoci ɛkkɛ oŋkanda te war tɛɛn ɛkɛ. Ɔci ɛkkɛ yɔɔdɛ ɛkɛ oŋkanda ne oŋŋa Yaccu Kiṭɔ bɛɛdi ɔɔn. Ɔci ne oŋŋa ookti bɛya ne ŋoyɔyɛ, Yaccu Kiṭɔ bɛya, ɔci jyek yɔɔd baadi doki, ɔci ɛkkɛ dɛttɛ coodda pwadan doki. 6Acaan a ɔŋŋiyɛ, ɛkkɛ yaakɛti ciyɛ te yoma ñɔyan acca ne taabn balki ɛkkɛti ɔɔn. Taabn neeniyɛ, jitkɛn a ḍiɛkan bɛɛ. Yeti taab neeni bala oŋkanda bɛɛ, ɛkkɛ yomgɔ yiegdi te taab neeni wɔɔka ne ḍuulan ṭɔɔlɛ budan. 7Taab bala ɛkkɛti neeni poci jyeni ɛkkɛ a poccin, ne jyeni ɛkkɛ agi jyenna awarɛ boki no. Ɔci naŋka neeni bala ba ma ne pocki dahaby. Dahab piɛltan ma maccu aŋka ɛkkɛn gɔrti ne ɛkɛ pwadi awarɛ boki no. Dahab ɛkɛ a gena iñɔ ṭɛɛrji wɛnni budan, ɔci jyeni ɛkkɛyɛ, ɛkɛ aŋka pwatcin ne tolan nɔñji Juaŋti te dahab. Yeti bala a ɔɔn daŋkun, Juaŋ poci jyeni ɛkkɛ te taab neeni. Ɔci a ɔɔnyɛ, ne oŋŋa Yaccu Kiṭɔ bɛɛdiyɛ, jyeka pwadin bɛya ɛkkɛti, ɔci ɛkɛ jieddi ɛkkɛ ɔci ɛkɛ andi ɛkkɛ, ɔci ɛkkɛ naŋdɛ ɛkɛ pwaddɛ a pwadgin. 8Yaccu yuarŋɛ ɛkkɛ ne ɛkɛ baali iñɔ ṭɛɛrji wɛnni bɛɛ, yeti ɛkkɛ anɛ ɛkɛ ne tolan. Yeti ɛkkɛ ɛkɛ yuartɛ te woŋgɔ acca bɛɛ, yeti ɛkkɛ jyettɛ ɛkɛti men ɔɔn. Ɔci acaan a ɔŋŋiyɛ, ɛkkɛ yomgɔ ñɔɔna ñɔɔn ne tolan te yom ñɔɔna menga yaakinti konɛ gɔɔdɛ bora ne pwadan bɛɛ neeni. 9Ɛkkɛ yomgɔ ñɔyɔ a ɔɔn acaan ɛkkɛ jyettɛ te baaṭi doki agi ɛkkɛ yɔɔdɛ Yaccu, ɔci acca ɛkɛ yuarnɛ ɛkkɛ ne ɛkɛ baali yuoci ɛkkɛ dokiy. 10Maka a bɔwan bala gɔki te baaṭi te jyek yɔɔta yuoci Juaŋ ɛkkɛy. Ɛkkɛn ma myetkɛ agi Juaŋ ɛkkɛ ‘wondɛti yom pwanno. Ɛkkɛn bala poŋi te jyeka neeni, ɔci bala tooci agi ma yɔɔdda Juaŋ te pɔya bɛ? 11Boŋ Yaccu Kiṭɔ bala gɔki ɛkkɛn yomgɛnti te Kiṭɔ agi ne ɛkɛ bɛɛdiyɛ, taab ɛkɛ bala. Ɔci ne taab baadiyɛ, naŋka pwadin oŋ bɛya oŋo. Ɔci bɔwan neeni bala tooci te jyek Kiṭɔ mena bɛya yuoci ma neeni agi ɛkta agi menɛ katan, ɔci ɛkkɛn bala tooci agi ɛkta bɛɛdɔ ne tua? 12Ɔci jiek lɛɛlnɛ Juaŋ bora maka bɔwan neeniti, agi naŋka neeni bɛya ne cwakanti ɛkkɛnti bɛɛ, yeti agi bɛɛdɔ ne baaṭi te yuonga ciyɛ ɛkkɛ neeni. Ɔci acca jyeka neeni bɛɛn bora ne pwadan. Ɛkkɛ lalkɛ ma te jyeka wonkɛn jyeka pwadin neeni. Ɛkkɛn ɛkkɛ lalkɛ te war tɛɛn Boŋ Juaŋo. War tɛɛn Boŋ Juaŋ cuonnɛ Juaŋ ɛkkɛnti te ñaalɔ pɔliji. Ɔci acca jyek yɔɔd Juaŋ ŋeejɛ ɛkkɛ ne pwadan. Malɛɛkanyɛ, ɛkkɛn buagɔn yɔɔta neeni jiñɛ yuartan daŋkun. 13Acaan a ɔŋŋiyɛ, dala ɛkkɛ woŋgɔ tiittɛ te paŋŋa paŋdɛ ɛkkɛ oŋkanday. Dala ɛkkɛ waakɔ tiidɛ ne pwadan aŋka ɛkkɛ noŋɛ kanŋa Juaŋti. Dala ɛkkɛ poŋdɛ oŋkanda te jyek naŋka naŋdɛ Yaccu Kiṭɔ ɛkkɛti, ne oŋŋa ɛkɛ bɛɛdi ɔɔn. Naŋki ɛkɛ naŋka pwadan neeniyɛ, naŋdɛ ɛkɛ te yom ɛkɛ parɛ yoma bɔwan. 14Dala ɛkkɛ noŋdɛ ba jyek Jwaŋa Tolan acaan ɛkkɛ agɛ kɛɛgin ɛkɛ woodgɛn. Naa ɛkkɛ moki noŋdɛ ba naŋka yeyin naŋka yomg ɛkkɛ buagɛ te baaṭi ne wona ɛkkɛ men Juaŋ kwoyɛ wanna bɛɛ. Te ñamu ne Juaŋ ŋeejɛ ɛkkɛ men bɛɛyɛ, ɛkkɛ balgɛ noŋɛ naŋka yeyin naŋka yomg ɛkkɛ buagɛ ne tolan te baaṭi neeni. 15Jwaŋa Tolan mena ɛkkɛ bornɛ neeniyɛ, ɛkɛ da parɛ. Ɛkɛ pwad pwado. Ɔci acaan a ɔŋŋiyɛ, dala naŋki ɛkkɛ pwadɔ oŋkanda daŋkun. 16A ɔɔn bala ba jyeka kiigin ne gɔkki agi, “Acaan ‘ya pwadyɛ, dala ɛkkɛ daŋkun pwaddɛ.” 17Oŋkanda ne ɛkkɛ balgɛ cɔkɛ Juaŋtiyɛ, ɛkkɛ boṭɛ ɛkɛ agi Wey ɛkkɛ, ɔci acca a ɔŋŋiyɛ, ne ɛkkɛ balgɛ ciyɛ ṭɛɛr wyeñɛti a ɔɔnyɛ, dala ɛkkɛ woŋgɔ tiittɛ ne pwadan te naŋki ɛkkɛ. Mena bardɛ ɛkkɛ a Wey ɛkkɛ neeniyɛ, ɛkɛ noŋdi godan ɛkkɛti, menga da te naŋki ɛkɛ, ɔci menga da te naŋki ɛkɛ. Ɛkɛ jiek gwaldɛ jitin ne pwadan waakɛnda. 18Dala ɛkkɛ woŋgɔ tiittɛ te naŋki ɛkkɛ a ɔɔn acaan te baaṭi ɛkkɛ balgɛ noŋɛ ba ganuun yɔrg ɛkkɛ, ɔci ba naŋki yɔrg ɛkkɛ moki. Yeti ɛkkɛ koonɛ Juaŋ bora te naŋka budan neeniti. Ɛkkɛ wonnɛ Juaŋ bora te coodi yɔɔrti te bil pɔdda walla te dahab bɛɛ. Waka neeni baadi budan. 19Ɛkkɛ wannɛ Juaŋ te yimg Kiṭɔ yimga pwadin. Ɛkɛ nogɛ ma te ikin bala ba kalŋ ṭɔɔlɛ pwadan Kalŋ ṭɔɔlɛ ‘yɛri ma te nɔjiy. Ɛkɛ bala ba kalŋa balkɛ gena yaayan gɛɛl warɛti bɛɛy. 20Jyek lyen Kiṭɔ neeniyɛ, naŋŋɛ Juaŋ te baaṭi ne ṭɛɛr baawi meny. Ɔci acca jyek ɛkɛ bɛɛn bora doki ne pwadan. Ɛkɛ warɛ lɛɛlnɛ bora ɛkkɛti doki te ninka ṭɛɛr noŋi wyeñɛ baldi neeni. 21Te naŋki Kiṭɔ neeniyɛ, ɛkkɛ jyettɛ Jwaŋa Tolan mena ɛkɛ luolnɛ ñaalɔ te lienti ɔci ‘wonnɛ pwani neeni. Ɔci te naŋki ɛkɛ neeniyɛ, ɛkkɛ jyettɛ Juaŋti ɔci balgɛ kɛɛyɛ pwanna bɛya ne baaṭiy. 22Ɛkkɛ noŋɛ ba jyek Juaŋ awarɛ. Ɔci acaan a ɔŋŋiyɛ, aŋka yomg ɛkkɛ pwatki te naŋka neeni wanna. Ɔci a ɔŋŋiyɛ, dala yomg ɛkkɛ pwadɔ modg ɛkkɛti. Dala ɛkkɛ andɛ ɛkkɛn ne tolan. 23Acaan ɛkkɛ jiennɛ Jwaŋa Tolan te jiedda woonɛ doki. Jiedi ɛkkɛ jiedda woonɛ neeniyɛ, ɛkkɛ aŋŋɛ maka wonkɛn. Jiedda neeniyɛ, a jiedi ma baan bɛɛ. Jiedda ma jiettiti ma te jiedi ma baanyɛ, ma baadi. Yeti jiedda ma jieddɛ Jwaŋa Tolanyɛ, ma baadi bɛɛ. Jyek Jwaŋa Tolan neeniyɛ, ɛkkɛn a jyeka tɛɛtki may. Ɔci jyeka neeni baadi ywongati bɛɛ. 24A ɔɔnyɛ, bala ba jyeka kiigin ne gɔkki agi, “Ma baan waakɛndayɛ, ɛkkɛn bala ba luom budan, ɔci ɛkkɛn pwanna pwani ba pɛɛppin luom jitin budan. Luomyɛ, iwa, ɔci pɛɛppin ḍɛɛmdi iñɔ. 25Yeti Jyek Jwaŋa Tolanyɛ, ɛkkɛn aŋka bala yuonginda ɔɔn.” Jyeka neeniyɛ, gena jyeka wonkɛn jyeka pwadin jyeka ɛkkɛ lalkɛ may.

will be added

X\