1Yɔhanna 4

1Modg ɔɔn, kan jyeka pookɛn bala, ɔci kan ma gɔki agi jyeka neeni agi jyek Boŋ Jwaŋa Tolanyɛ, naa ɛkkɛ men jyeddɛ jyeka guaktan ma coŋin neeni men budan bɛɛ. Ɛkkɛ gɔrtɛ te ñamu parun aŋka ŋeeddɛ ɛkkɛ kan jyeka neeni a jyek Juaŋ awarɛ boki no. Acaan maka loṭi ma gɛɛg dɛndi bora ɔci jomdi jiek mati. 2Kan men gɛɛl gɔki agi Yaccu Kiṭɔ bɛɛnɔ te Jwaŋa Tolanti, ɔci aŋŋi men baanyɛ, paŋŋa neeni bɛɛn te Jwaŋa Tolanti. Ɔci a ɔŋŋiyɛ, jiek ŋeeddɛ ɛkkɛ jyeka neeni a jyek Boŋ Jwaŋa Tolan awarɛ. 3Kan men gɛɛl kɛki agi Yaccu bɛɛnɔ te Jwaŋa Tolanti bɛɛyɛ, paŋi ɛkɛ bɛɛn te Jwaŋa Tolanti bɛɛ. Paŋi ɛkɛ neeniyɛ, gena paŋi Mena Yookɔn Te Yaccu Kiṭɔ mena tieŋnɛ ɛkkɛ te ñamu agi bɛɛdɔy, ɔci acca ɛkɛ bɛɛn doki. 4Kɛɛgin ‘ya, ɛkkɛ agɛ kɛɛgin Jwaŋa Tolan. Maka gɔki ba jyeka pookɛn neeniyɛ, ɛkkɛn buannɛ ɛkkɛ doki, acaan Mena bala ɛkkɛ yomgɔti neeniyɛ, ɛkɛ tolcin te mena bala iñɔ baanji wɛnni. 5Maka gɔki jyeka pookɛn neeniyɛ, ɛkkɛn a ma Jwaŋa Tolan bɛɛ. Ɔci acaan a ɔŋŋiyɛ, ɛkkɛn gɔki te jyeka bala iñɔ baanji wɛnni, ɔci maka a ma Juaŋ bɛɛyɛ, tieŋdi jyek ɛkkɛn. 6Ikin akin kɛɛgin Jwaŋa Tolan. Maka Jwaŋa Tolan ŋeecɔnyɛ, ɛkkɛn tieŋdi jyek ikin. Ɔci maka a kɛɛgin Juaŋ bɛɛyɛ, ɛkkɛn tieŋdi jyek ikin bɛɛ. Ɔci a ɔŋŋiyɛ, ŋeettin ikin jyeka bala mati neeniyɛ, kan a jyeka awarɛ, walla kan a jyeka jomgin. 7Modg ɔɔn, dala ikin oontin yɔtin pookɔ oŋkanda, acaan jyek anna neeniyɛ, bɛɛn te Jwaŋa Tolanti. Maka ani ma a ɔɔnyɛ, ɛkkɛn a kɛɛgin Jwaŋa Tolan, ɔci ɛkkɛn Jwaŋa Tolan ŋeecɔn. 8Mena ani ma bɛɛyɛ, ɛkɛ Jwaŋa Tolan ŋeejɛ bɛɛ, acaan Jwaŋa Tolanyɛ, ɛkɛ a mena ani may. 9Kaci Jwaŋa Tolan bala ne cyɛɛlɔ, ɔci Jwaŋa Tolan Kacca neeni cuonnɛ iñɔ wɛnni ṭɛɛrji aŋka ikin tɛɛttin te ɛkɛ. Ɔci a ɔŋŋiyɛ, ɛkɛ ikin myennin te anna ɛkɛ ani ikiny. 10A ikin aŋka anin Juaŋ ñamu bɛɛ. A’a, gena Juaŋ aŋka ani ikin ñamuy. Ɔci ŋeecin ikin anna Juaŋ ani ikin neeniyɛ, a anna awarɛ, acaan Kaci ɛkɛ cuonnɛ iñɔ baanji wɛnni aŋka ɛkɛ warɛ ‘yɛrŋɛ te nɔji ikin aŋka Jwaŋa Tolan yomɛ pwanni ikinti neeni. 11Modg ɔɔn, kan Jwaŋa Tolan ani ikin a ɔɔnyɛ, dala ikin da oontin yɔtin pookɔ. 12Men gɛɛl Jwaŋa Tolan yuarŋɛ bɛɛ. Yeti kan ikin oonnin yɔtin pookɔ oŋkandayɛ, Jwaŋa Tolan ciyi ikin yomgɔti. Ɔci a ɔŋŋiyɛ, ikin anin Juaŋ awarɛ. 13Çeecin ikin ikin balkin Jwaŋa Tolanti ɔci ɛkɛ da bala ikinti. Jyeka neeni ŋeecin ikin te Boŋ ɛkɛ Boŋa ikin ‘wonninti ɛkɛy. 14Yaccu yuarŋɔn ɔɔn te woŋgɔ aŋka ɔɔn lwokɔn ma te jyek Jwaŋa Tolan Wey Yaccun neeni. Ɛkɛ Kaci ɛkɛ cuonnɛ iñɔ wɛnni aŋka ɛkɛ warɛ ‘yɛrŋɛ te nɔji ma baan baan warda. 15Kan mena jyeti ɔci gɔki agi Yaccu a Kaci Jwaŋa Tolanyɛ, Jwaŋa Tolan bala ciyi ɛkɛ yomɛti oŋkanda, ɔci ɛkɛ da bala Jwaŋa Tolanti oŋkanda daŋkun. 16A ɔŋŋiyɛ, anna Juaŋ ani ikin neeniyɛ, ŋeecin ikin ne pwadan, ɔci ikin jyettin yomgɔti Juaŋ ani ikin. Jwaŋa Tolanyɛ, ɛkɛ a mena ani may. Kan mena ciyi ani Juaŋ bala ɛkɛ yomuti oŋkandayɛ, ɛkɛ ciyi iki Jwaŋa Tolan oŋkanda, ɔci Jwaŋa Tolan da ciyi ɛkɛti oŋkanda. 17Oŋkanda ikin anin Jwaŋa Tolan, ɔci a ɔŋŋiyɛ, ŋeettin ikin ne pwadan yomgɔti ikin buayin oŋ godan Juaŋ moki bɛɛ, acaan ne ikin balkin ciyin iñɔ wɛnniyɛ, ikin balkin ciyin ba Yaccu ɔɔn, ɔci acaan ikin anin Juaŋ awarɛ. 18Kan anna i ani Jwaŋa Tolan bala itiyɛ, ɔci bwajja i buayi genga bala moki bɛɛ. Acaan jyek bwaji ɔci jyek ani yaakinti ñoodi nona ne cyɛɛlɔ bɛɛ. Bwaji bawwin doki. Jyek bwaji bala mati acaan ma buayi jyeka bɛya ɛkkɛn wyetkɛnti te naŋki ɛkkɛn naŋka yeyin. Ma Kiṭɔyɛ, kan men gɛɛl buayiyɛ, bala ba anna ɛkɛ ani Juaŋ neeni bɔɔnjin men. 19Ikin anin ɛkɛ acaan ɛkɛ ani ikin te ñamu doki. 20Kan men gɛɛl gɔki agi ɛkɛ anji Juaŋyɛ, ɔci kan ɛkɛ yomɛ yaayɛ moodɛnti mena cieki iki ɛkɛ a cyɛɛlɔ neeniyɛ, ɛkɛ a mena jomi jiek budan. Ɔci kan ɛkɛ ani mod ɛkkɛn mena yuartɛ ɛkɛ te woŋgɛ neeni bɛɛy, oŋ ɛkɛ yaakinti ani Juaŋ mena yuartɛ ɛkɛ te woŋgɛ bɛɛ neeni a ɔki? 21Gena jyeka ikin myenninti Juaŋ neeni, agi kan mena ani Juaŋyɛ, dala ɛkta ani mod ɛkki daŋkun.

will be added

X\