1Yɔhanna 3

1Anna Wey ikin Jwaŋa Tolan ani ikinyɛ, da parɛ, acaan ɛkɛ boṭi ikin agi kɛɛgin ɛkɛ. Awarɛ, ikin balkin a ɔɔn. Ɔci a ɔŋŋiyɛ, maka iñɔ ṭɛɛrji wɛnniyɛ, ɛkkɛn ikin ŋeeckin bɛɛ, acaan ɛkkɛn Jwaŋa Tolan kwoyɔn daŋkun. 2Gɔṭṭɛ mung ɔɔn, ikin akin kɛɛgin Jwaŋa Tolan acca, yeti ne baaṭi kan ikin baltin a ɔki ŋeecin ikin ne pwadan men bɛɛ. Yeti oŋŋa Yaccu bɛɛdiyɛ, ikin waakɔ aktin baltin ba ɛkɛ ɔɔn, acaan ikin ɛkɛ yuartin ne pwadan te woŋgi ikin. 3Maka bala jyeti kɛɛy jyeka neeniyɛ, ɛkkɛn jyeka yeyin daltan niin ɛkkɛn yomgɛnti bɛɛ, acaan ɛkkɛn buagɔn ɛkkɛn yomgɛn pwaddi ba Yaccu Kiṭɔ ɔɔn. 4Kan men gɛɛl noŋdi nɔjiyɛ, ɛkɛ jyek Juaŋ lɛɛŋŋɛ jitin doki, acaan nɔjiyɛ, ɛkɛ a gena lɛɛwi jyek Juaŋ jitkɛn. 5Çeejɛ ɛkkɛ Yaccu aŋi men baan aŋka nɔji ikin eedɛ ɛkɛ ɔntɔ. Ɔci ŋeejɛ ɛkkɛ moki nɔji ɛkɛ bala bɛɛ. 6Kan men bala ciyi iki Yaccu oŋkandayɛ, ɛkɛ noŋi nɔji a ñaccu bɛɛ. Mena noŋi nɔji a ñaccuyɛ, ɛkɛ Yaccu yuarŋɛ oŋgati bɛɛ. Yaccu kwoyi ɛkɛ. 7Kɛɛgin ‘ya, naa men gɛɛl ɛkkɛ jyɛttɛ ɔntɔ te jyek Yaccuti bɛɛ. Kan mena noŋi ne pwadan oŋkandayɛ, naŋki ɛkɛ pwad pwad bala ba naŋki Yaccu daŋkun. 8Kan mena noŋi nɔji oŋkandayɛ, ɛkɛ a men Jwaŋa Yaayan, acaan Jwaŋa Yaayan bala noŋi nɔji te baaṭi doki. Kaci Jwaŋa Tolan bɛɛn aŋka ɛkɛ kanŋa Jwaŋa Yaayan neeni lɛgdɛ jitin. 9Kɛɛgin Jwaŋa Tolanyɛ, ɛkkɛn noŋi nɔji a ñaccu bɛɛ, acaan tɛɛtin Jwaŋa Tolan bala ɛkkɛn yomgɛnti oŋkanda, baadi bɛɛ. Ɔci a ɔɔnyɛ, ɛkkɛn yaakinti noŋi nɔji a ñaccu bɛɛ, acaan ɛkkɛn a kɛɛgin Jwaŋa Tolan. 10Ma Jwaŋa Tolanyɛ, ɛkkɛn ŋeecin ikin te naŋki ɛkkɛn, ɔci ma Jwaŋa Yaayan moki ŋeecin ikin te naŋki ɛkkɛn. Kan mena noŋi ne pwadan bɛɛyɛ, ɛkɛ a men Jwaŋa Tolan bɛɛ. Ɔci kan mena ani mod ɛkkɛn bɛɛyɛ, ɛkɛ daŋkun a men Jwaŋa Tolan bɛɛ. 11Jyeka neeni bala ba jyeka tieŋnɛ ɛkkɛ te ñamu doki agi dala ikin ooncinyɔ pookɔ. 12Naa ikin baltin ba ‘wana yenti kɛɛn ɔɔn bɛɛ. Ɛkɛ a men Jwaŋa Yaayan, ɔci ɛkɛ mod ɛkkɛn noŋŋɛ. Ɛkɛ moodɛn noŋŋɛ ogo? Ɛkɛ moodɛn noŋŋɛ acaan moodɛn bala noŋi ne pwadan, ɔci kɛɛn bala noŋi ne yaayan. 13Modg ɔɔn, kan maka baan jiñɛti iñɔ wɛnni yomgɛn yeyɔ ɛkkɛti oŋkandayɛ, naa ɛkkɛ jitkɔ buaya noon te jyeka neeni bɛɛ. 14Te ñamu ikin balkin ba maka tuutan, ɔci acca ikin baallin ba maka tɛɛtan. Çeecin ikin a ɔɔn acaan ikin anin modg ikin. Kan mena ani modg ɛkkɛn bɛɛyɛ, ɛkɛ bala ba mena tuuta men. 15Kan mena yomɛ yaayɛ mod ɛkkɛnti oŋkandayɛ, ɛkɛ bala ba mena noki mako, ɔci ŋeejɛ ɛkkɛ maka noki mayɛ, tɛɛtin Juaŋ bala ɛkkɛn yomgɛnti bɛɛ. 16Jyek anna ani Juaŋ ikin neeniyɛ, ŋeecin ikin doki te naŋki Yaccu oŋŋa ɛkɛ warɛ ‘wonninti ikiny. Ɔci ikinyɛ, dala yomg ikin bala ba ɛkɛ ɔɔn. Dala ikin anin modg ikin ba anna ani ɛkɛ ikin neeni. 17Mena balki waak iñɔ baanji wɛnniyɛ, kan ɛkɛ gɔrti mod ɛkkɛn ancinyɛ, ɔci kan ɛkɛ yomɛ baaw mod ɛkkɛntiyɛ, ɔci kan ɛkɛ yookɔn te maŋi ɛkɛyɛ, oŋ anna ani ɛkɛ Juaŋ neeni ciyi ɛkɛ yomɛti a ɔki? 18Kɛɛgin ‘ya, naa ikin anin ma te jyek tuggɔ budan bɛɛ. Dala ikin anin ma te yoma awarɛ, ɔci dala ikin noŋtin ne pwadan ɛkkɛnti. 19Ɔci kan ikin anin ma te yoma awarɛ ɔci noŋtin ne pwadan ɛkkɛnti a ɔɔnyɛ, ŋeettin ikin jyeka bala ikinti neeniyɛ, a jyeka awarɛ. Ɔci ŋeettin ikin yomgɔti ne pwadan Jwaŋa Tolan ñamɛti. 20Ɔci kan ikin poŋin gɔkin agi ikin yiekin Jwaŋa Tolan ñamɛtiyɛ, jyeka neeni yaakinti ciyi ikin yomgɔti bɛɛ. Acaan Jwaŋa Tolan ɛkɛ tol tol te yomg ikin, ɔci waak waakɛnda ŋeejɛ ɛkɛ. 21Ɔci kan jiek ŋeecin ikin yomgɔti a ikin noŋŋin gena yaayan gɛɛl bɛɛyɛ, ikin yaakinti ortinti Jwaŋa Tolanti ne pwadan, ɔci ikin buayin ɛkɛ bɛɛ. 22Ɔci kan ikin toottin ɛkɛti te gengayɛ, ɛkɛ ikin ‘wontin, acaan ikin noŋin ba jyek ɛkɛ oŋkanda, ɔci naŋki ikin neeni pwanna pwani ɛkɛti. 23Gena jyeka ɛkɛ buagiti ikin noŋtin neeni. Ɛkɛ gɔki agi dala ikin jyetcin yenti Kaci ɛkɛ Yaccu Kiṭɔti, ɔci agi dala ikin ooncin yɔtin pookɔ oŋkanda. Jyeka neeniyɛ, gena jyeka ikin myenninti ɛkɛy. 24Kan mena noŋi ba jyek ɛkɛ oŋkandayɛ, ɛkɛ ciyi i Jwaŋa Tolan a cyɛɛlɔ, ɔci Jwaŋa Tolan bala ɛkɛ yomɛti daŋkun. Çeecin ikin Juaŋ bala ikin yomgɔti, ɔci ikin da balkin ɛkɛti acaan Jwaŋa Tolan ikin ‘wonnin Boŋ ɛkɛ.

will be added

X\