1Yɔhanna 2

1Kɛɛgin ‘ya, ‘ya kiey jyeka neeni ɛkkɛti aŋka naa ɛkkɛ noŋdɛ nɔji bɛɛ. Yeti kan men gɛɛl ikinti noŋdi nɔjiyɛ, ɔci Men gɛɛl bala ikinti, ɔci ɛkɛ yaakinti gɔkti Wey ikinti te ikin. Gena Yaccu Kiṭɔ Mena domi jiek bɛɛy. 2Ɛkɛ warɛ ‘yɛrŋɛ te nɔji ikin aŋka Jwaŋa Tolan yomɛ pwanni ikinti neeni. Ɛkɛ warɛ ‘yɛrŋɛ te ikin pookɔ bɛɛ, ɛkɛ warɛ ‘yɛrŋɛ te ma waakɛnda baan warda. 3Kan ikin noŋin ba jyek ɛkɛ oŋkandayɛ, ikin aktin ma ɛkɛ woodgɛn ne pwadan. 4Kan men gɛɛl gɔki agi ɛkɛ Juaŋ ŋeejjɛ, ɔci kan ɛkɛ noŋi ba jyeka guagdɛ Juaŋ bɛɛyɛ, ɛkɛ a laaban, ɔci jyeka awarɛ bala ɛkɛti bɛɛ. 5Kan mena noŋi ba jyek Juaŋyɛ, anna ani ɛkɛ Juaŋ neeni yɔmjin doki. Ɔci a ɔŋŋiyɛ, ŋeettin ikin ikin balkin ɛkɛti. 6Kan mena gɔki agi ɛkɛ balginti i Juaŋ oŋkandayɛ, dala ɛkɛ ciyi ba Yaccu Kiṭɔ ɔɔn. 7Modg ɔɔn, ‘ya kiey jyeka wonkɛn gɛɛg ɛkkɛti bɛɛ. Gena jyeka te baaṭi jyeka tieŋnɛ ɛkkɛ te ñamuy. 8Yeti jyeka neeni bala ba jyeka wonkɛn ɛkkɛti oŋkanda. Yaccu bala noŋi ba jyeka neeni, ɔci acca ɛkkɛ daŋkun noŋɛ ba jyeka neeni. Acaan nona miel noŋi baadi, ɔci Mena dɛki awarɛ bala doki. 9Kan men gɛɛl gɔki agi ɛkɛ baaljɛ ciejjɛ nona bɔwanti, ɔci kan ɛkɛ yomɛ yaayɛ mod ɛkkɛnti oŋkandayɛ, ɛkɛ bala te nona mielti men. 10Kan mena ani mod ɛkkɛn oŋkandayɛ, ɛkɛ aŋka bala ciyi te nona bɔwanti oŋkanda, ɔci ma ḍɛɛmdi iñɔ te jyek ɛkɛ bɛɛ. 11Mena yomɛ yaayan mod ɛkkɛnti oŋkandayɛ, ɛkɛ bala te nona mielti, ɔci ɛkɛ ati te nona mielti men. Ɔci nona ooddi ɛkɛyɛ, ŋeejɛ ɛkɛ bɛɛ acaan ɛkɛ noon yuartɛ te woŋgɛ bɛɛ. Ɛkɛ uullɛ nona miel ñingɛti doki. 12Kɛɛgin ‘ya, ‘ya kiey worga ɛkkɛti acaan ɛkkɛ bɔɔŋnɛ Jwaŋa Tolan te nɔji ɛkkɛ doki. Jwaŋa Tolan ɛkkɛ bɔɔŋnɛ acaan yenti Yaccu Kiṭɔ bala ɛkkɛti. 13Weyi ɔɔn, ‘ya kiey worga ɛkkɛti, acaan mena bala te ñamu ŋeejɛ ɛkkɛ doki. Kaalko, ‘ya kiey worga ɛkkɛti moki, acaan ɛkkɛ Jwaŋa Yaayan buannɛ ɛkkɛ doki. 14Kɛɛgin ‘ya, ‘ya kiey worga ɛkkɛti acaan Wey ikin ŋeejɛ ɛkkɛ. Weyi ɔɔn, ‘ya kiey worga ɛkkɛti, acaan Kiṭɔ Mena bala te ñamu ŋeejɛ ɛkkɛ doki. Kaalko, ‘ya kiey worga ɛkkɛti acaan ɛkkɛ agɛ maka yɔdi ne tɛyan ɔci jyek Jwaŋa Tolan bala ɛkkɛ yomgɔti oŋkanda, ɔci Jwaŋa Yaayan buannɛ ɛkkɛ doki. 15Naa ɛkkɛ anɛ wak ṭɛɛr wyeñɛ bɛɛ. Ɔci naa ɛkkɛ anɛ waka bala baan jiñɛti iñɔ wɛnni bɛɛ. Kan mena ani baan jiñɛ iñɔ wɛnniyɛ, ɛkɛ yaakinti ani Wey ikin bɛɛ. 16Acaan waka neeniyɛ, ɛkkɛn a wak Wey ikin bɛɛ. Ɛkkɛn a waka baan jiñɛti iñɔ wɛnni budan. Waka baan jiñɛti iñɔ wɛnni neeniyɛ, gena waka yomg ma baan buagiti ne pɛñan, ɔci waka gwaltan ma baan te ñingɛn ɔci pwanna pwani ɛkkɛnti, ɔci ma buagiti ne pɛñan, ɔci jyeka yomg ma baan buagiti akti maka ḍwaŋin. 17Ɔci ne oŋ gɛɛltiyɛ, baan jiñɛ baadi, ɔci waka yomg ma baan buagiti ne pɛñan neeniyɛ, baadi daŋkun. Yeti mena noŋi ba jyek Jwaŋa Tolanyɛ, ɛkɛ aŋka ciyi oŋkanda a ñaccu ɔɔn, baadi oŋgati bɛɛ. 18Kɛɛgin ‘ya, wɔɔka neeni noŋi baadi doki! Ɛkkɛ tieŋnɛ agi “Mena Yookɔn Te Yaccu Kiṭɔ” baali bɛɛdɔ. Ɔci acca maka yookɔn te Yaccu gɛɛg bala kɔɔna kɔɔnno. Gena maka jyek ɛkkɛn bala ba Mena Yookɔn Te Yaccu Kiṭɔ neeniy. Ɔci a ɔŋŋiyɛ, ŋeecin ikin wɔɔka neeni noŋi baadi doki. 19Maka neeniyɛ, ɛkkɛn ikin dalkin, ɛkkɛn a ma ikin awarɛ bɛɛ. Kan ɛkkɛn te akki ma ikin awarɛyɛ, te ɛkkɛn balkin iki ikin a cyɛɛlɔ men. Ɛkkɛn kaaccin bora te ma ikinti aŋka ŋeettan ma ɛkkɛn a ma ikin bɛɛ. 20Ɛkkɛ waakidayɛ, jyeka neeni ŋeejɛ ɛkkɛ, acaan Jwaŋa Tolan ɛkɛ ɛkkɛ ‘wonnɛ ñing tɛɛn ɛkɛ. 21’Ya kiey worga ɛkkɛti acaan ɛkkɛ jyeka neeni kwoyɛ bɛɛ. ‘Ya kiey worga ɛkkɛti acaan jyeka neeni ŋeejɛ ɛkkɛ doki. Jyeka neeni etti jyeka jomgin bɛɛ. 22Kan menga gɔki agi Yaccu neeni agɔ Kiṭɔ mena cuonda Juaŋ bɛɛyɛ, ɛkɛ a mena jomi jieko. Kan mena gɔki agi Kaci Weegɛn baawiyɛ, ɔci Kaci moki baawiyɛ, ɛkɛ a Mena Yookin Te Yaccu Kiṭɔ. 23Kan mena yookɔn te Kaciyɛ, ɔci Kaci Weegɛn da bala ɛkɛti bɛɛ. Kan mena jyeti Kacitiyɛ, ɔci Kaci Weegɛn da bala ɛkɛti. 24Ba jyeka tieŋnɛ ɛkkɛ te ñamu neeniyɛ, dala jyeka neeni bala ɛkkɛti oŋkanda, ɔci kan a ɔɔnyɛ, Kaci Weegɛn bala ɛkkɛti oŋkanda yaakkɛn i Kaci ɛkɛ. 25Ɔci gena guagdɛ ɛkɛ agi ikin ‘wontintiyɛ, gena tɛɛtin, ɔci tɛɛtin neeni baadi ywongati bɛɛ. 26’Ya kiey worga ɛkkɛti te jyek maka noŋi ɛkkɛ jyɛttɛ ɔntɔ wanna. 27Jwaŋa Tolanyɛ, ɛkɛ ɛkkɛ ‘wonnɛ ñing tɛɛn ɛkɛ te ñamu te Boŋ ɛkɛ. Ɔci ɛkɛ bala ɛkkɛ yomgɔti men acca. Ɔci kan mena loṭi ɛkkɛ baawyɛ, noŋdi genga bɛɛ, ɛkkɛ laldɛ Boŋ Jwaŋa Tolan te jiek waakɛnda. Jyeka loṭi Boŋ Jwaŋa Tolan ɛkkɛ neeniyɛ, a jyeka awarɛ. Jyeka neeniyɛ, a jomi jiek bɛɛ. Dala ɛkkɛ ciyɛ iki Yaccu oŋkanda ba jyeka ɛkkɛ lallɛ Boŋ Jwaŋa Tolan neeni. 28Kɛɛgin ‘ya, dala ɛkkɛ baldɛ ɛkɛti oŋkanda, ɔci kan a ɔɔnyɛ, kan ɛkɛ warɛ lɛɛldɛ bora ikintiyɛ, ɔci ikin yaakinti gɔwwin iki ɛkɛ ne pwadan. Ne oŋŋa ɛkɛ bɛɛdiyɛ, ikin buatin ɛkɛ yooŋtin ɔntɔ te ɛkɛti bɛɛ. 29Çeejɛ ɛkkɛ Yaccu Kiṭɔ pwad pwado, ɔci kan ma noŋi ne pwadan ba ɛkɛ ɔɔnyɛ, ɛkkɛn ŋeejɛ ɛkɛ ɛkkɛn a kɛɛgin ɛkɛ awarɛ.

will be added

X\