1Yɔhanna 1

1Ɔɔn kieyɔn worga ɛkkɛti acca te jyek Mena bala te ñamu. Ɛkɛ a Mena jiekɛ tieŋnɔn ɔɔn te tuk ɛkɛti. Ɔci ɛkɛ a Mena yuarŋɔn ɔɔn te woŋgɔ, ɛɛ, ɔɔn balgɔn gɔṭɔn ɛkɛ. Ɔci ɔɔn moki tomnɔn ɛkɛ warɛti te byeŋki ɔɔn. Mena guagdɔn ɔɔn neeniyɛ, gena Kiṭɔ mena tɛɛtki may. 2Jwaŋa Tolanyɛ, ɛkɛ ɔɔn lɛɛrnɔn Mena tɛɛtki ma neeni, ɔci ɔɔn balgɔn lwokɔn ma te jyek ɛkɛ. Ɔci acca ɛkkɛ myettɛ ɔɔn daŋkun te jyek ɛkɛ. Jyeka neeniyɛ, gena jyek Mena tɛɛtki may. Ɛkɛ bala i Weegɛn te ñamu ɔci oŋkanda ɔɔn. Ɔci tɛɛtin ɛkɛ baadi ywongati bɛɛ. Ɔci acca ɛkɛ lɛɛlnɛ Jwaŋa Tolan bora ɔɔnti. 3Ɔɔn gɔktɔn ɛkkɛti moki ka Mena ɛkkɛ myetkɛ ɔɔn neeniyɛ, gena Mena yuarŋɔn ɔɔn ɔci tieŋnɔn ɔɔn. Ɛkkɛ myetkɛ ɔɔn te jyeka neeni aŋka jyek ikin aga jyeka ne cyɛɛlɔ iki ɔɔn, acaan ɔɔn jyeyɔn i Jwaŋa Tolan i Kaci ɛkɛ Yaccu Kiṭɔ. 4Ɔci ɔɔn kienɔn jyeka neeni ɛkkɛti aŋka ɔɔn yomgɔ ñɔya ne pɛñan. 5Gena jyeka tieŋnɔn ɔɔn te Kaci ɛkɛti aŋka ɛkkɛ myetkɛ ma neeni. Jyeka neeni gɔki agi Jwaŋa Tolanyɛ, ɛkɛ dɛki bɔɔna bɔɔno. Nona miel gɛɛl bala ɛkɛti bɛɛ. 6Kan ikin gɔkin agi ikin jyeyin iki Jwaŋa Tolan, ɔci yeti kan ikin ciyin te nona mielti menyɛ, a ɔɔn ikin jomin jieko, ɔci naŋka naŋtin ikin neeni a naŋka awarɛ bɛɛ. 7Jwaŋa Tolan ciyi te nona bɔwan. Ɔci kan ikin da ciyin te nona bɔwan ba ɛkɛ ɔɔnyɛ, ikin yaakinti jyeyin waakida, ɔci yimg Kaci ɛkɛ Yaccu Kiṭɔ nɔji ikin eedɛ ɔntɔ te ikin yomgɔti waakida oŋkanda ɔɔn. 8Kan ikin poŋin gɔkin agi nɔji ikin baawiyɛ, ikin poŋin amaam budan, ɔci jyeka awarɛ bala ikin yomgɔti bɛɛ. 9Kan ikin nɔji lɛɛltin borayɛ, ɛkɛ ikin bɔɔktin te nɔji ikin waakɛnda. Jyek bɔɔkin ɔci jyek eñña ɛkɛ nɔji eedɛ ɔntɔ neeni daldɛ ɛkɛ budan bɛɛ, tiidiyɔ ɛkɛ. Naŋki ɛkɛ neeniyɛ, pwatcin. 10Kan ikin gɔkin agi ikin noŋŋin nɔji bɛɛyɛ, a ɔɔnyɛ, bala ba ikin gɔkin agi Jwaŋa Tolan a mena jomi jieko. Kan ikin gɔkin a ɔɔnyɛ, jyek ɛkɛ bala ikin yomgɔti bɛɛ.

will be added

X\