1Kuruntuc 9

1’Ya ḍwaŋu wɔɔkcin bɛɛ? Pari ‘ya a cuuda bɛɛ? ‘Ya Ciɛggɔn ikin Kiṭɔ yuarŋ bɛɛ? Pari ɛkkɛ a ma kanŋa ‘ya Ciɛggɔnti bɛɛ? 2Kan ‘ya a cuuda maka pookɛnti bɛɛyɛ, ‘ya a cuuda ɛkkɛti, acaan ɛkkɛ agɛ wyeñ kanŋa ‘ya Ciɛggɔnti. 3Gena ṭwoggin ‘ya maka poci ‘ya neeniti neeni. 4Hay! Yɔmjin ɔɔnti ne ɔɔn omɔn ɔci motɔn te wak kanŋa ɔɔn bɛɛ? 5Hay! Yɔmjin ɔɔnti ne moong ɔɔn wɛɛdɔn ba cuudan pookɛn, kan ɔɔn balkɔn moong bɛɛ? Ɔci ba modg Ciɛggɔn ɔci Cipac bɛɛ? 6Walla ɔɔn yaakkɔ i Barnabac aŋka a maka kanŋan waak pookɛn aŋka ciyɔn tɛɛtɔn ɔɔn? 7A menɛ kanŋan a ackan oŋ warɛ ḍɔɔktɛ bilk parɛy? A menɛ cuoti jang jiniinaji oŋ omi jang ṭɔlgɛn bɛɛy? A ḍɛɛnɔn ɔki moti ak mala ciddɛ ɛkɛ bɛɛy? 8Jyek ‘ya neeni a jyek ma baan budan boki? Pari ganuun gɔki jwalla neeni moki bɛɛ? 9Acaan jyeka a kiigin jyek ganuun Muuca gɔki agi, “Naa yaan ḍyɛga tukɛti ne ɛkɛ baali deyi pok bɛɛ.” I poŋ Juaŋ poŋi te yotk pookɛn ne ɛkɛ gɔkki jwalla neeni nɛ? 10A’a, a ɔɔn bɛɛ. Ɛkɛ bala poŋi te ikin. Jyeka neeni kiiwɛ ma te ikin. Mena ooṭi ṭɛɛr konɛ ɔci mena ɛṭi pokyɛ, ɛkɛ noŋi kanŋa ɛkɛ ɔci jyeti kɛɛy acaan ɛkɛ yɔɔrdi waak te kanŋa ɛkɛti. 11Kan ɔɔn kookin pwadin piinnɔn ɛkkɛ yomgɔtiyɛ, oŋ yɔmjin doki kan ne ɔɔn yɔɔrdɔn waak te ɛkkɛti bɛɛ? 12Kan maka pookɛn gɛɛg ñoonɛ i ɛkkɛ te eñi waakyɛ, pari ɔɔn a maka eci ne tolan nɔñji bɛɛ? Oŋ yeti ɔɔn naŋka awarɛ neeni naŋŋɔn bɛɛ? Yeti ɔɔn naŋka neeni waakɛnda ḍuannɔn ḍɔɔggɔti, acaan naa pɔy jyeka wonkɛn jyeka pwadin te Kiṭɔ neeni uuldɔnti bɛɛ. 13Çeej i maka kanŋan on Juaŋ ona tolanti oomdin ɛkkɛn bɛya te on Juaŋ ona tolanti, ɔci maka kanŋan nona ɛrki ma waakyɛ, ɛkkɛn omi waka ‘yɛrtan ma neeni daŋkun bɛɛ? 14Bala a ɔɔn daŋkun, Ciɛggɔn gɔkkin agi maka kanŋan loṭi ma te worga Jwaŋa Tolanyɛ, waka amtan ɛkkɛn bɛya te kanŋa lorki ɛkkɛn ma te worga Juaŋti daŋkun. 15Yeti ‘ya noŋi waka neeni gɛɛl bɛɛ, walla ‘ya kiew worga aŋka ‘ya ‘wonta ma waka neeni gɛɛl bɛɛ, acaan lyena tuuda ‘ya aŋka yɔmjin, aŋka naa menga pwani ‘ya naŋdɛ aga gena budan te naŋki warɛ bɛɛ! 16Ne ‘ya loṭa jyeka wonkɛn jyeka pwadin matiyɛ, ‘ya balka genga aŋka ‘ya jiɛtati ma bɛɛ, acaan lalla loṭa ‘ya neeni ɛkɛ a gena bala ‘ya ḍwaŋuti aŋka naŋdi ‘yay. Kan ‘ya lor ma te jyeka neeni bɛɛyɛ, naŋka yaayan bɛya ‘ya wyeñuti! 17Kan ‘ya lor ma te yom ‘ya waanɛyɛ, ‘ya yɔɔra genga te Juaŋti. Yeti kan ‘ya lor te yom ‘ya waanɛ bɛɛyɛ, kanŋa ‘ya ‘wonnata Juaŋ neeni naŋi ‘ya awarɛ bɛɛ. 18’Ya ‘wonta ma gena? A’a, ne ‘ya loṭa jyeka wonkɛn jyeka pwadin matiyɛ, ‘ya lor acaan ‘ya ‘wonta ma genga bɛɛ. Yeti ‘ya noŋja gena kanŋa ɔci wierta te paŋi waka ‘ya ‘wontati ma te kanŋa ‘yay. 19’Ya a kɛɛngɔn men baan gɛɛl acaan ɛkɛ ‘ya ḍɔɔkta bilk kanŋa ‘ya bɛɛ, yeti ‘ya waru naŋi a mena kanŋan mati waakɛnda aŋka ɛkkɛn owwa Kiṭɔti ne coŋɔn. 20Ne ‘ya baala kanŋa ma Icrayiiltiyɛ, ‘ya baal ciy ba coodi ɛkkɛn ɔɔn, aŋka ‘ya yaakati ɛkkɛn owwa Kiṭɔti. Ɔci ‘ya baal noŋ ba ne ‘ya baala byeŋ ganuun Muuca ɔɔn, ne ‘ya baala kanŋin iki maka balki jyek ganuun aŋka ‘ya ɛkkɛn owwa Kiṭɔti. 21Maka baakɛ ganuunyɛ, ‘ya baali ba ne baakati ganuun ba ɛkkɛn ɔɔn. Yeti ‘ya baaka ganuun Juaŋ bɛɛ, yeti ‘ya balka ganuun Kiṭɔ. Oŋ ‘ya waru naŋi ba baakati ganuun ɔɔn, aŋka ‘ya maka baaki ganuun neeni owwa Kiṭɔti. 22Maka waakɛn koyantiyɛ, ‘ya waru naŋi ba ‘ya waru koyi ba ɛkkɛn ɔɔn, aŋka ‘ya ɛkkɛn owwa Kiṭɔti. ‘Ya aŋi waak waakɛnda mati waakɛnda aŋka ‘ya ma gɛɛg uddo. 23’Ya noŋ a ɔɔn te jyeka loṭa ‘ya ma a jyeka wonkɛn jyeka pwadin aŋka naŋka pwadan bɛya ‘yati daŋkun te jyeka neeniti. 24Çeejɛ ɛkkɛ non boddin maka ñwobbɔ ɛkkɛn ywoddɔ waakɛnda, oŋ mena ma boddɛ aŋka ‘wontan ma genga bɛɛ? A ɔŋŋiyɛ, dala ɛkkɛ kuadɛ aŋka gena neeni buuŋdɛ ɛkkɛ. 25Maka ñieyi waakɛnda ɛkkɛn tieci waakɛn te waak waakɛnda. Ɛkkɛn noŋi a ɔɔn aŋka ɛkkɛn yɔɔrdi taagga bɔnnin taagga baadi budan neeni. Yeti ikinyɛ, yɔɔrtin taagga baadi bɛɛy. 26’Ya yiŋ mɔr amaam budan bɛɛ, ɔci ‘ya jieb noon te buam budan amaam ba mena jieb jwami budan ɔɔn bɛɛ. 27Yeti ‘ya waru tiido, ɔci ‘ya agdi ḍuaŋa ɛkɛ, dita ‘ya yɔmja te genga te lalla loṭa ‘ya neeni bɛɛ.

will be added

X\