1Kuruntuc 6

1Ne men gɛɛl ɛkkɛti yomɛ yaayɛ moodɛn gɛɛltiyɛ, ɛkɛ moodɛn tiagdɛyɔ non godan maka a ma Juaŋti bɛɛ ogo? Ba ɛkɛ moodɛn eedɛ ma Juaŋti bɛ? 2Çeejɛ ɛkkɛ Ma Kiṭɔ maka pwadin noŋdi godan maka baan konɛti wɛnni bɛɛ? Ɔci kan maka baan konɛti wɛnni noŋdɛ ɛkkɛ godany, oŋ ɛkkɛ yaakɛti jyeka bala ɛkkɛti ḍyɛrin neeni ñaldɛ pookɔ bɛɛ? 3Çeejɛ ɛkkɛ a ikin noŋtin godan malɛɛkanti bɛɛ? A ɔŋŋiyɛ, ɛkkɛ jyeka bala ɛkkɛti ñaldɛ ɛkkɛ pookɔ ne koyan budan. 4Oŋ te gena ɛkkɛ godan ɛkkɛ eedɛ bora maka a ma kaniicati bɛɛy? 5’Ya gɔkka a ɔŋŋi aŋka ɛkkɛ waakɔ aga lɔɔno! Menga bala ɛkkɛti aŋan a mena ñingɛ tɛyan ne tolan aŋka jyeka neeni ñaldɛ ɛkɛ bɛɛ? 6Yeti mod gɛɛl ooddi moodɛn tiagdɛyɔ non ganuun maka a Ma Kiṭɔti bɛɛ ogo? 7Naŋki godan neeni ne baali ɛkkɛtiyɛ, ɛkkɛ buannɛji ɛkɛ doki. Ba ɛkkɛ naŋka damɛ ma ɛkkɛti ḍuattɛ ḍɔɔggɔti bɛ? Ba dienna dyetki ma ɛkkɛ ñingɔ neeni ḍuattɛ ɛkkɛ ḍɔɔggɔti bɛ? 8Yeti ɛkkɛ woodgɔ noŋi ma ñingɛn, ɔci noŋɛ modg ɛkkɛ ñingɛn daŋkun! 9Çeejɛ ɛkkɛ a maka yeyin neeni non cyɛgji Juaŋ yuartan ɛkkɛn baaw bɛɛ? Naa ɛkkɛ dieddɛ ñin menga bɛɛ. Kan a maka tobin, walla kan a maka moṭi jɔkin yeyinti, ɔci kan a maka niin i maka a ‘uayi, 10ɔci kan a maka a ɛyi, ɔci maka yomgɛn ḍwaŋin, ɔci maka nokkin mook, ɔci maka ḍor ma, ɔci maka kwayi wak mayɛ, ɛkkɛn waakɛnda dɛndi non cyɛgji Jwaŋa Tolanti bɛɛ. 11Ma gɛɛg ɛkkɛti bala a ɔɔn te ñamu. Yeti ɛkkɛ pɔŋnɛ Juaŋ te nɔjjo, ɔci ɛkkɛ pwannɛ ɔci aŋŋɛ maka awarɛ te yenti Ciɛggɔn ikin Yaccu Kiṭɔ, ɔci te Boŋ Jwaŋ ikin. 12’Ya dita gɔkca ka “Waak waakɛnda pwadɔ ‘yati,” oŋ yeti waak waakɛnda yɔmjin bɛɛ. “Waak waakɛnda pwadɔ ‘yati,” oŋ yeti genga bala ‘ya naŋda a kɛɛngɔn ɛkɛ bɛɛ. 13“Amyɛ, te kono, ɔci konyɛ, te amo.” Oŋ yeti Juaŋ ɛkkɛn nuudɛji yaakkɛn. Naa wara bala ikinti neeni oltin noŋin ikin tomi bɛɛ, yeti oltin kanŋin ikin gena Ciɛggɔnti. Ɔci Ciɛggɔn noŋi kanŋa te waak ikin. 14Juaŋ Yaccu Kiṭɔ jɔɔŋnɛ ñaalɔ te lienti te war tɛɛn ɛkɛ, ɔci ɛkɛ ikin jɔɔŋtin ñaalɔ daŋkun. 15Çeejɛ ɛkkɛ ne waak ɛkkɛ ñooki i Kiṭɔ bɛɛ? ‘Ya wara ñoowin i Kiṭɔ owwa bora ɔci ñaagdiyɔ i ɛŋa a tomma? Hayɛllɛ! 16Çeejɛ ɛkkɛ, a mena ñoodi i ɛŋa a tomma ɛkkɛn aŋi wara ne cyɛɛlɔ i ɛkɛ bɛɛ? Jyeka a kiigin gɔki agi, “Ɔci ɛkkɛn ñoowin yaakkɛn.” 17Oŋ yeti mena warɛ ñaaktiti Ciɛggɔntiyɛ, ɛkkɛn aŋi ba mena ne cyɛɛlɔ i ɛkɛ te booŋo. 18Dala ɛkkɛ tomi daldɛ. Nɔjja naŋdi men baan waakɛndayɛ, ɛkɛ noŋi te bora budan, oŋ yeti mena noŋdi nɔji tomiyɛ, ɛkɛ noŋi nɔji war ɛkɛti. 19Waak ɛkkɛ ŋeejɛ ne akki on Boŋ Juaŋ mena bɛɛn te Jwaŋa Tolanti mena bala ɛkkɛti neeni bɛɛ? Ɛkkɛ agɛ wak waak ɛkkɛ pookɔ bɛɛ, yeti ɛkkɛ agɛ wak Juaŋo. 20Ɛkkɛ agɛ wiɛlgɔn, a ɔŋŋi dala ɛkkɛ noŋdɛ ne pwadan Juaŋti te waak ɛkkɛ.

will be added

X\