1Kuruntuc 5

1Jiek ati noon warda te tomma bala ɛkkɛtiy. Tomma neeni yaayɛ ne tolan moki maka moṭi waka budantiy. Acaan menga bala ɛkkɛti wɛnni niin i ɛŋ weegɛn. 2Ɛkkɛ yaaktiti noŋi waakɔ a ɔki? Ba ɛkkɛ kuuyɛ bɛ? Mena noŋi a ɔɔn wannayɛ, dala ɛkɛ ŋualdɛ bora te ɛkkɛ jitkiti wɛnan. 3A ɔŋŋiyɛ, ne ‘ya waru baawa ɛkkɛti aŋanyɛ, boŋ ‘ya balgi iki ɛkkɛ aŋan, ɔci ‘ya jiek olja mena noŋi ne yaayan neeni wyeñɛti doki, bala ba ne ‘ya baala aŋan ɔɔn. 4Ne ɛkkɛ wyetkɔ ḍɔɔldɛ te yenti Ciɛggɔn ikin Yaccu Kiṭɔyɛ, ‘ya balgin iki ɛkkɛ te booŋo, ɔci te war tɛɛn Ciɛggɔn ikin Yaccu Kiṭɔyɛ, 5dala ɛkkɛ ‘wana neeni ‘wondɛ Jwaŋa Yaayan bieŋɛti, dala war ɛkɛ baadi, ɔci boŋ ɛkɛ aŋka yɔɔdɛ Ciɛggɔn te oŋŋa ɛkɛ bɛɛdɛy. 6Naŋka noŋɛ ɛkkɛ waakɔ wanna pwatcin bɛɛ. Çeejɛ ɛkkɛ, ñamga ne ḍiɛkan ḍuobja wayi ma ne tolan caaba warda te ɛkkɛn bɛɛ? 7Dala ɛkkɛ nɔji ɔci naŋka yeyin uuttɛ ɔntɔ te ɛkkɛti aŋka ɛkkɛ pwaddɛ, acaan Kiṭɔ ŋaabɛ ma kakanti te ikin. 8Dala ikin codin nɔji ɔci naŋka yeyin waakɛnda neeni daltin, dala ikin cietin te coodi pwani ɔci te coodda awarɛ moki. 9Ɛkkɛ kieŋnin ‘ya worga acaan naa ɛkkɛ ñoodɛ i maka noŋi tomi bɛɛy. 10’Ya gɔk maka moṭi jɔkin yeyinti maka tobin neeni, ɔci maka yomgɛn ḍwaŋin te waak, ɔci maka a ɛɛjan, ɔci maka moṭi jɔkin yeyinti bɛɛ. Kan ɛkkɛ noŋŋɛ a ɔɔnyɛ, ɛkkɛ kaannɛ bora te baan konɛti doki. 11’Ya kiewan worga ɛkkɛti acaan naa ɛkkɛ ñoodɛ i mena bardɛ ɛkkɛ a mod ɛkkɛ te Kiṭɔ, oŋ yeti ɛkɛ a tomma, ɔci yomɛ tolcin te waak ɔci moṭi jɔkin yeyinti, ɔci ḍori ma, ɔci nokkin mooy, ɔci a ɛɛja wanna bɛɛ. Mena bala a ɔɔnyɛ, naa ɛkkɛ omdi i ɛkɛ a cyɛɛlɔ bɛɛ. 12Te gena aŋka ‘ya jiek olja maka bora wyetkɛnti budany, pari ɛkkɛ jiek oldɛ maka kaniicaji wyetkɛnti bɛɛ? 13Acaan maka bala bora te kaniicajiyɛ, Juaŋ jiek oldɛ ɛkkɛn wyetkɛnti bala ba jyeka a kiigin ne gɔkki agi, “Dala ɛkkɛ mena yaayan neeniyɛ, ŋualdɛ ɔntɔ te kaniicaji wɛnan.”

will be added

X\