1Kuruntuc 4

1A ɔŋŋiyɛ, dala ma ɔɔn ñaltɔn ba maka kanŋan Kiṭɔti maka ‘wonnɛ ɛkɛ wak Juaŋ waka jitkɛn a cogginy. 2Ɔci kanŋa weegɛn buagɔn dala maka ‘wonnɛ ɛkɛ kanŋa neeni kandi ba jyeka ṭagdɛ ɛkɛy. 3Kan ɛkkɛ jiek dɔɔdɛ ‘ya wyeñuti, walla kan a godan ma baan budanyɛ, naŋka neeni tolcin ‘yati bɛɛ. ‘Ya waru noŋga godan paru bɛɛ. 4’Ya yomu wɔɔkcin, yeti naŋka neeni ‘ya naŋda agdi mena pwadan bɛɛ. 5Naa ɛkkɛ jiek naŋdɛ te genga men ne wɔɔka awarɛ men baawi bɛɛ. Da ɛkkɛ kɛɛddɛ lakun ne Ciɛggɔn bɛɛdɛ ɔɔn. Ɛkɛ waka bala miel jitin ɔci waka bala ma yomgɛnti, lɛɛldɛ ɛkɛ bora. Te wɔɔka wannayɛ, Juaŋ menga da ‘wondɛ jiɛd ɛkɛ oŋo. 6Acca modg ɔɔn, waka guaŋi ‘ya neeni, guaŋi ‘ya te war Apɔɔlɔc ɔci te war ‘ya te ɛkkɛ modg ɔɔn aŋka ɛkkɛ urtɛti te ɔɔn, aŋka naa ɛkkɛ poŋdɛ ‘yeettɛ bora jyeka kiigin ŋotkɛnti ɔci menga ɛkkɛti noŋdi warɛ mengati bɛɛ. 7Acaan a menɛ i naŋŋi tol te maka pookɛny? A gena baaw iti oŋ ɛkɛ yuarŋi i bɛɛy? Oŋ ne kan i gena neeni yuarŋi dokiyɛ, oŋ i noŋ waru bala ba ne gena neeni i ‘wonniti Juaŋ a ‘woñgin bɛɛ ɔɔn ogo? 8Ɛkkɛ balkɛ waka ɛkkɛ buagɛ waakɛnda doki. Ɛkkɛ korkɔ kuumi doki. Ɛkkɛ aŋŋɛ cyekin ḍwaŋin te yomg ɛkkɛ pookɔ doki, yeti bolja wanna yɔmjin bɛɛ. ‘Ya baal kɛɛy awarɛ, ka dala te ɛkkɛ aŋŋɛ cyekin ḍwaŋin, aŋka te ɔɔn da aŋŋɔn cyekin ḍwaŋin iki ɛkkɛ. 9Acaan yuarca ‘ya Juaŋ ɔɔn cuudan ɛkɛ neeni lɛɛlnɔn bora te maka coŋin jitin ba maka wanɛ ma te lien aŋka noktan ma. Ɔɔn aŋŋɔn liɛlti waka cɔnnɛ Juaŋti waakɛnda, malɛɛkan ɔci ma baanti daŋkun. 10Ɔɔn wyetkɔ baaw te Yaccu, yeti ɛkkɛ balkɛ wyetkɔ ne tolan Kiṭɔti. Ɔɔn waakɔ koocin, yeti ɛkkɛ aŋka waakɔ tɛɛcin, ma noŋi ne pwadan ɛkkɛti, yeti menga bala noŋi ne pwadan ɔɔnti bɛɛ! 11Ne acca men ɔɔnyɛ, ɔɔn amdɔn koñ ɔci yiɛno, ɔci atɔn waakɔ budan. Ɔɔn jiepkɔn ma. Ɔɔn balkɔn baan bɛɛ. 12Ɔɔn kanŋɔn ne pɛñan te byeŋki ɔɔn. Ne ɔɔn ‘walkɔnti mayɛ, ɔɔn gɔkɔn ɛkkɛnti ne pwadan men ɔɔn, ne ɔɔn naŋkɔnti ma ne yaayanyɛ, ɔɔn yomgɔ tieŋnɔn, 13ne ɔɔn jomkɔntiyɔ mayɛ, ɔɔn ṭwoktɔn ɛkkɛnti te yoma pwadan. Ɔɔn baallɔn ba tuok baanji ṭɛɛrji wɛnni, ɔci baallɔn ba giikin baan konɛ wɛnni. 14’Ya kiew jyeka neeni aŋka ɛkkɛ waakɔ aga lɔɔn bɛɛ, yeti ‘ya kiew jyeka neeni aŋka ɛkkɛ ṭyɛldinyɔ ba kɛɛgin ‘ya kɛɛgin onga ‘yay. 15Kan ɛkkɛ balkɛ maka wɛɛyi ɛkkɛ a alpn a inyaakkɛn (10,000) Kiṭɔtiyɛ, ɛkkɛ balkɛ weyyɔ ne coŋɔn bɛɛ. Ɛkkɛ oonin ‘ya Yaccu Kiṭɔti te jyeka wonkɛn jyeka pwadin. 16A ɔŋŋiyɛ, ‘ya gɔk ɛkkɛti ne pɛñan aŋka ɛkkɛ lɔktɛ ba naŋki ‘ya. 17Te naŋka neeniyɛ, ‘ya Timutawuc cuoñña ɛkkɛti, ɛkɛ a kacca ana ‘yay. Ɛkɛ a mena pwadan Ciɛggɔn ñamɛti. Ɛkɛ ɛkkɛ nɔɔttɛ te coodi ‘ya Yaccu Kiṭɔti. Coodi ‘ya bala ba jyeka loṭa ‘ya ma noon warda kaniican jitin neeni. 18Ma gɛɛg ɛkkɛti noŋi waakɛn poŋi gɔki agi ‘ya baaljɔ bɛɛdjɔ ḍieŋjɔ ɛkkɛti bɛɛ. 19Yeti ‘ya baal bɛɛd ɛkkɛti ne pɛñan kan Juaŋ buagɔny, ‘ya buaga gɔrca war tɛɛn ɛkkɛn. ‘Ya buaga gɔrca jyek maka noŋi waakɛn neeni budan bɛɛ. 20Acaan cyɛgji Juaŋ ɛkɛ a war tɛɛno. A jyeka budan bɛɛ. 21Ɛkkɛ buagɛ gena? Ɛkkɛ buagɛ ‘ya bɛɛd ecca wiici bieŋuti, walla ‘ya bɛɛd te ani ɔci boŋa pwadan?

will be added

X\