1Kuruntuc 3

1Modg ɔɔn, ‘ya yaakati gɔkkan ɛkkɛti ba maka balkin Boŋ Jwaŋa Tolan bɛɛ, oŋ yeti ‘ya gɔkkan ɛkkɛti ba maka baan konɛti, ɔci ‘ya gɔkkan ɛkkɛti bala ba ne ɛkkɛ agɛ kɛɛgin ḍyɛrin Yaccu Kiṭɔti ɔɔn. 2’Ya ɛkkɛ lallin te jyeka koyan, ga ‘ya ɛkkɛ lallin te jyeka jitkɛn tɛyan bɛɛ. Acca ɛkkɛ yaakɛti muŋi ɛkkɛn men bɛɛ. Ɔci acca men ɔɔnyɛ, ɛkkɛ waakɔ ywaŋŋɛ bɛɛ, 3acaan ɛkkɛ ciyɛ ba coodda baan konɛti men. Acaan ne kon moni ɔci wɛyyin balki ɛkkɛti menyɛ, ɛkkɛ agɛ ma baan konɛ budan, ɔci noŋɛ ba naŋki ma baan konɛ budan bɛɛ? 4Ne ɛkkɛ men da gɔki agi, “‘Ya bootca Buulucti,” ɔci mena parɛ moki agi, “‘Ya bootca Apɔɔlɔcti,” te naŋki ɛkkɛ neeni ɛkkɛ agɛ ma baan konɛ budan bɛɛ? 5Apɔɔlɔc a menɛ? Ɔci ‘ya Buuluc a menɛ? Pari te lali ɔɔn aŋka ɛkkɛ jyettɛ neeni bɛɛ? Ɔɔn yaakkɔ menga da kanŋan ba kanŋa ɔɔn ‘wonnɔnti Juaŋy. 6’Ya kookin piinno, ɔci Apɔɔlɔc ɛkkɛn moonnɛ piego, oŋ yeti Juaŋ ɛkkɛn yuolnɛ ñaalɔ. 7Mena pieti kookin ɔci mena mooti kookinyɛ, ɛkkɛn a genga bɛɛ, oŋ yeti Juaŋ aŋka a mena waak ‘wondɛ ḍɔŋo. 8Mena pieti ɔci mena mootiyɛ, ɛkkɛn bala bolja ne cyɛɛlɔ, oŋ yeti men da yɔɔrdi gena ɛkɛ ‘wondi Juaŋ ba taab kanŋa ɛkɛ. 9Ɔɔn agɔn maka kanŋan Juaŋti, ɔci ɛkkɛ agɛ bal Jwaŋa Tolan. Ɛkkɛ agɛ on Juaŋ moki. 10Te yom pwani Juaŋ yom pwani ‘wonnata ‘ya neeniyɛ, ‘ya jɔɔtcan te cɔni on ŋwayɛ ba mena gɔɔñgɔn. Ɔci mena parɛ eñi ɛkɛ wyeñɛti, yeti dala menga da waŋɛ tiittɛ te eeno, ne ɛkkɛn balki cɔtki on ŋwaya neeni wyeñɛtiy. 11Menga gorndi cwoddi ona parɛ gɛɛl te ɛka cɔnnɛ Jwaŋa Tolan neeni moki bɛɛ. On ŋwaya neeniyɛ, gena Yaccu Kiṭɔ. 12Kan menga cɔti on ŋwaya neeni wyeñɛti te dahab, ɔci te bil pɔdda, ɔci te gwoyya pwadin, ɔci te jang, ɔci te luom, ɔci te waaŋgiyɛ, 13kanŋa ɛkɛ warɛ lyɛldɛ. Acaan te oŋŋa wannayɛ, maañ menga da nɔɔtki kanŋa ɛkɛ. 14Kan maka cɔti on ŋwaya neeni wyeñɛti neeni gɛɛl kanŋa ɛkɛ maañ kɔɔrniyɛ, ɛkɛ ‘wondɛ Jwaŋa Tolan genga. 15Kan men gɛɛl kanŋa ɛkɛ ammɛ maañyɛ, kanŋa ɛkɛ nuottin budan, oŋ yeti ɛkɛ aŋka uda te maaño. 16Çeejɛ ɛkkɛ ne ɛkkɛ agɛ on Jwaŋa Tolan bɛɛ? Ɔci Boŋ Juaŋ ciyi ɛkkɛti bɛɛ? 17Mena on Juaŋ nuudɛ jitinyɛ, ɛkɛ da nuudɛji Juaŋo, acaan on Juaŋyɛ, balkɔn giikin bɛɛ, ɔci ona neeniyɛ, gena ɛkkɛ. 18Naa menga warɛ dieddiyɔ parɛ bɛɛ. Kan menga ɛkkɛti gɔki agi ɛkɛ agji ‘wana ñingɛ tɛyan ṭɛɛrji wɛnniyɛ, dala ɛkɛ aga aamma, aŋka ɛkɛ aga mena ñingɛ tɛyan awarɛ. 19Acaan waka guaktan ma ṭɛɛrji agi ñing tɛɛnyɛ, ñaldɛ Juaŋ a wyeñ booj bala ba Jyek Juaŋ jyeka A kiigin ne gɔkki agi, “‘Ya labji ɛkkɛn yuarcaji te ñing tɛɛn ɛkkɛn jitin ɔɔn.” 20Ɔci moki agi, “Ciɛggɔn paŋi maka ñingɛn tɛyan ŋeejɛ a paŋŋa budan.” 21Naa menga warɛ naŋdɛ te kanŋa men baan budan bɛɛ, acaan waak waakɛnda a wak ɛkkɛ. 22Kan a ‘ya, walla a Apɔɔlɔc, walla a Butruc, ɔci walla baan warda, ɔci walla a tɛɛtin walla lieno, ɔci walla acca ɔci ne ñamu, waka neeni waakɛndayɛ, a wak ɛkkɛ. 23Ɔci ɛkkɛ agɛ Ma Kiṭɔ, ɔci Kiṭɔyɛ, a Men Jwaŋa Tolan.

will be added

X\