1Kuruntuc 2

1Modg ɔɔn, ne ‘ya bɛɛna ɛkkɛtiyɛ, ‘ya ɛkkɛ myennin jyek Juaŋ te jyeka ḍwaŋin ɔci te ñing tɛɛn bɛɛ. 2Acaan ne ‘ya baala ɛkkɛtiyɛ, ‘ya buaga gena parɛ gɛɛl ŋeejja ɛkkɛti aŋan bɛɛ, yeti ‘ya buaga Yaccu aŋka ŋeejja i ŋaamma ɛkɛ ŋaapkiti may. 3Ɔci ‘ya da waru koy koyo, ɔci buayo, ɔci waru ḍiedan. 4Jyeka guaŋi ‘ya, ɔci jwalla owwan ‘yayɛ, ɛkkɛn guaŋi ‘ya te ñing tɛɛn ma baan budan bɛɛ, yeti ɛkkɛn guaŋi ‘ya te liɛlti Boŋ Juaŋ ɔci war tɛɛn ɛkɛ. 5Aŋka naa jyeni ɛkkɛ bala te ñing tɛɛn ma baan budan bɛɛ, yeti dala jyeni ɛkkɛ bala te war tɛɛn Jwaŋa Tolan. 6Ɔɔn gɔkɔn te ñing tɛɛn maka ñingɛn tɛɛnti, yeti ɔɔn gɔkɔn te ñing tɛɛn yuonga neeniti walla te ñing tɛɛn maka ḍwaŋin yuonga neeni bɛɛ, ɛkkɛn a maka eedɛ Juaŋ ɔntɔ baadi budany. 7Yeti ɔɔn gɔkɔn te jyek Juaŋ jyeka jitkɛn a coggin maka ñingɛn tɛyantiy, ɔci te ñing tɛɛn ɛkɛ ñing tɛɛn guaŋŋɛ ɛkɛ te baaṭi te yuonga baaw te pwani ikiny. 8Maka ḍwaŋin yuonga neeniti jyeka neeni jitkɛn yuarcɛ bɛɛ. Te ɛkkɛn jyeka neeni jitkɛn yuarkitiyɛ, te ɛkkɛn Ciɛggɔn pwadan neeni ŋaabɛ kakanti bɛɛ. 9Bala ba jyeka kiigin worga Juaŋji gɔki agi, “Gena ḍuaññɛ Juaŋ te maka ani ɛkɛyɛ, yuarŋɛ menga te waŋɛ bɛɛ, walla tieŋnɛ menga te jyeñɛ bɛɛ, walla konɛ yuarnɛji menga bɛɛ.” 10Gena neeni lɛɛlnɛ Juaŋ bora te Boŋ Juaŋo. Acaan Boŋ ɛkɛ lieṭi waak jitkɛn waakɛnda i wak Juaŋ waka jitkɛn loonan. 11Acaan a menɛ paŋi men baan ŋeejɛy? Pari ɛkɛ parɛ bɛɛ? Bala a ɔɔn daŋkun, menga bala paŋi Jwaŋa Tolan ŋeejɛ bɛɛ, gena Boŋ Jwaŋa Tolan parɛ aŋka paŋi ɛkɛ ŋeejɛy. 12Acca ikin mwokkin Boŋ Juaŋ bɛɛn te Jwaŋa Tolantiy. A ɔŋŋiyɛ, ikin yaakinti waka ikin ‘wonninti Juaŋ neeni jitkɛn yuartin. Ikin mwokkin boŋa iñɔ baanji wɛnni bɛɛ. 13Ɔci ɔɔn gɔkɔn a ɔŋŋi te jyeka laltan ma te ñing tɛɛn ma baan budan bɛɛ, yeti ne ɔɔn loṭɔn te jyek wak Booŋ maka balki Booŋtiyɛ, ɔɔn gɔkɔn te ñing tɛɛn jyeka loṭɛ Boŋ Juaŋy. 14Mena baaki Boŋ Jwaŋa Tolan yomɛtiyɛ, waka ma ‘wondɛ Booŋ mugdɛ ɛkɛ yomɛti bɛɛ, acaan waka neeni jitkɛn yuartɛji ɛkɛ bɛɛ, acaan waka neeni jitkɛn yuartan ma te Boŋ Juaŋo. 15Mena balki Boŋ Jwaŋa Tolanyɛ, ɛkɛ wak Jwaŋa Tolan jitkɛn ŋeejɛ waakɛnda. Yeti waka bala ɛkɛ yomɛti ŋeejɛ menga bɛɛ. 16“A menɛ paŋi Jwaŋa Tolan ŋeejɛy? A menɛ yaakinti ɛkɛ myettɛy?” Yeti ɔɔn balkɔn paŋi Yaccu Kiṭɔ.

will be added

X\