1Kuruntuc 16

1Acca ‘ya gɔkka ɛkkɛti te jyek waka limtin te Ma Kiṭɔ neeniyɛ, bala ba ‘ya kaniican ban Galatiya myetkan doki. A ɔŋŋiyɛ, dala ɛkkɛ daŋkun noŋdɛ ba ɛkkɛn ɔɔn. 2Te oŋki Juaŋ waakɛndayɛ, dala ɛkkɛ waakida men da ḍɔccɛ genga bora, ɔci bwogdɛ ñino. Ɛkɛ ḍɔtti ba waka bala ɛkɛti aŋka ne ‘ya bɛɛda naa ɛkkɛ moki ɔgdɛ lyemɛ a limi ɔɔn bɛɛ. 3Ɔci ne ‘ya dɛnda aŋanyɛ, waka limmɛ ɛkkɛ te yom pwani neeniyɛ, cundi ‘ya ban Urcaliim iki worgan i maka muonɛ ɛkkɛ bora wanna. 4Kan jwali warɛ liɛllɛ a ‘ya oottayɛ, ɛkkɛn ooddin iki ‘ya a cyɛɛlɔ. 5’Ya bɛɛd ḍieŋŋa ɛkkɛti ne ‘ya gorda ban Macɛdɔɔnyajiy, acaan ‘ya buaga gora ban Macɛdɔɔnyaji. 6’Ya coottin i ɛkkɛ ne ḍiɛran kaapun, walla ‘ya wɛɛñi wyeñɛ cwamja aŋan aŋka ɛkkɛ yaakɛti ‘ya ‘yeettatɛ te won ‘ya nona oodda ‘yay. 7Acaan ‘ya buaga naa ɛkkɛ yuardin gordinyɔ a gorti ɔɔn bɛɛ. ‘Ya buaga nink ṭɔlgɛn gɛɛg noktin i ɛkkɛ kan Ciɛggɔn ‘ya pɔŋna pɔyy. 8Yeti ‘ya cood te ban Ɛpacac ne oŋ Iid Ninka A Ma Baan Ne Yyɛɛwɔ Mena Parɛ Byeŋkɛ (50) neeni bɛɛdi ɔɔn. 9Acaan pɔy tuka tolan warɛ pɔŋŋɛ te kanŋa ‘yati, ɔci maka yookɔn te ‘ya bala kɔɔna kɔɔnno. 10Ne Timutawuc bɛɛdi ɛkkɛtiyɛ, dala ɛkɛ gwaldɛ ɛkkɛ ne pwadan, acaan ɛkɛ noŋi kanŋa Ciɛggɔn ba ‘ya daŋkun. 11A ɔŋŋiyɛ, naa menga wooki ɛkɛ bɛɛ. Yeti dala ɛkɛ magdɛ ɛkkɛ pɔɔjɔ te pwani aŋka ɛkɛ dɔɔkti ‘yati. Acaan ɔɔn balgɔn kɛɛyɔn ɛkɛ i modg ikin. 12Bala ba ‘ya gɔkcan mod ikin Apɔɔlɔcti ne pɛñan ka dala ɛkɛ bɛya ḍieŋdi ɛkkɛti, yeti ɛkɛ yomɛ buagɔn bɛya acca bɛɛ. Ɛkɛ bɛya ne oŋŋa ɛkɛ yɔɔrdi wɔɔkay. 13Dala ɛkkɛ woŋgɔ tiittɛ, dala ɛkkɛ yɔɔddɛ ne tɛyan te jyeni ɛkkɛ, dala ɛkkɛ yomgɔ tɛya, naa ɛkkɛ buayɛ bɛɛ, dala ɛkkɛ tɛɛdɛ. 14Dala waka naŋdɛ ɛkkɛ waakɛnda naŋdɛ te oonnin yɔtin. 15Acca modg ɔɔn, ŋeejɛ ɛkkɛ on tukɛ Ictɛɛpanuc ɛkkɛn a maka bɛɛn Juaŋti ñamu ban Akeeya, ɔci ɛkkɛn waakɛn ‘woñgi kanŋa Ma Kiṭɔ. 16Modg ɔɔn, ‘ya gɔk ɛkkɛti ne pɛñan ka dala ɛkkɛ tieŋdɛ jyek maka noŋi kanŋa Juaŋ a ɔɔn wanna, ɔci moki dala ɛkkɛ tieŋdɛ jyek maka pookɛn maka noŋi kanŋa Juaŋ ba ɛkkɛn ɔɔny. 17’Ya yomu ñɔɔn ne Ictɛɛpanuc bɛɛni ɔci Pɔrtyunaatac, ɔci Akaaykacy, acaan ɛkkɛn non ɛkkɛ mugɛ aŋka ‘ya makta ne ɛkkɛ baagɛy. 18Acaan ɛkkɛn ‘ya makka yomuti ba ɛkkɛ moki ɔɔn. Maka ba maka neeniyɛ, dala kanŋa ɛkkɛn yuartanji ma ɔci dala ma noŋdɛ ne pwadan ɛkkɛnti. 19Kaniican ban Ecya cuoññin ñiimi ɛkkɛti. Akwilla ɔci Pricilla i kaniica on ɛkkɛn ban Ecya wɛnniyɛ, ñiepi ɛkkɛ te yoma pwadan te yenti Kiṭɔ. 20Modg ikin waakɛnda ñiepi ɛkkɛ. Dala ɛkkɛ ñiebdɛ yɔtin pookɔ waakida te ñiebbin pwadan. 21Gena ‘ya, Buuluc kiewan jyek ñiimma neeni te byeŋ ‘ya paru ɛkkɛti neeni. 22Kan men gɛɛl balki ani Ciɛggɔn bɛɛyɛ, dala ɛkɛ aga ‘walgɔn! Ciɛggɔn ɔɔn, dala i bɛɛdi! 23Dala Ciɛggɔn ikin Yaccu yomɛ pwada a pwani ɛkkɛti. 24Dala ani bala ɛkkɛti waakida te yenti Yaccu Kiṭɔ.

will be added

X\