1Kuruntuc 14

1Dala ani aga paŋi ɛkkɛ paŋŋa tolan. Ɔci moki dala ɛkkɛ andɛ waka ma ‘wondɛ Boŋ Juaŋ aŋka ɛkkɛ lwokɛ ma te jyek Juaŋo. 2Acaan mena gɔki te tugga pookɛnyɛ, ɛkɛ gɔki ma baanti bɛɛ, ɛkɛ gɔki Jwaŋa Tolanti. Awarɛ, menga jyek ɛkɛ tieŋdɛ bɛɛ, yeti ɛkɛ gɔki te Booŋ yomɛti te waka a cogginy. 3Oŋ yeti mena lwoki ma te jyek Juaŋyɛ, ɛkɛ nɔɔti ma, ɔci moki ɛkkɛn, ɔci cyeŋi ɛkkɛn te war tɛɛno, ɔci mwoni ɛkkɛn jitkɛn. 4Mena gɔki te tugga pookɛnyɛ, ɛkɛ moki war ɛkɛ parɛ, oŋ yeti mena lwoŋi jyek Juaŋ jitkɛn ŋeejɛyɛ, ɛkɛ ma kaniica magdɛ. 5Kan ɛkkɛ gɔktɛ te tugga pookɛn waakidayɛ, a ɔɔn pwatcin, yeti kan ɛkkɛ yaaktɛti lwoŋi jyek Juaŋ jitkɛnyɛ, a ɔɔn aŋka pwatcin ne tolan ‘yati. Mena yaakinti lwoŋi jyek Juaŋ jitkɛnyɛ, pwatcin ne tolan te mena urkinti tugi maka pookɛny, yeti kan men gɛɛl balayɛ, dala jyeka lwogdɛ ɛkɛ neeni oodɛ bora. A ɔŋŋiyɛ, kaniica yaakinti ‘uotti ñamu. 6Acca hay! Modg ɔɔn, kan ‘ya bɛɛn ɛkkɛti oŋ gɔkcan te tugga pookɛn oŋ ɛkkɛ tieŋnɛ bɛɛy, oŋ jyeka neeni ɛkkɛ maktɛ a ɔki? Yeti kan ‘ya bɛɛn ɔci gɔkcan te jyeka lɛɛlnɛ Juaŋ bora ‘yati neeni, ɔci walla ɛkkɛ nɔɔttin te waka ŋeej ‘ya neeni, ɔci walla te waka bala bɛya neeni, ɔci walla te jyek Juaŋ jyeka pwadin jyeka buagiti ɛkkɛ neeniyɛ, ɛkkɛn ɛkkɛ maktɛ. 7Kan waka kuuttan ma bala ba luañ ɔci waka cyɛptan ma bala ba coŋkɔn, kan pɔɔdgɛn pwadɔ bɛɛy, oŋ pwana wiak ne pwadan tieŋtin a ɔki? 8Ɔci moki kan ṭuoŋ kuudi ma ne pwadan bɛɛy, a menɛ warɛ ywaŋdɛ te lañy? 9Ɔci moki kan ɛkkɛ gɔkɛ te tugga pookɛn tugga tieŋtan ma bɛɛy, oŋ ɛkkɛn jyeka guagdɛ ɛkkɛ wanna jitkɛn ŋeettan a ɔki? Jyek ɛkkɛ neeni peedɛ jwami bora budan. 10Awarɛ, tugga pookɛn bala ne coŋɔn baan konɛ warda, ɔci ɛkkɛn jitkɛn tieŋtan ma waakɛnda. 11Kan ‘ya jyeka guagdɛ mena neeni kuoliwiyɛ, ‘ya a miiŋ te jyeka guagdɛ ɛkɛ wanna. 12Te bwakta ɛkkɛ buagɛ waka ma ‘wondɛ Booŋyɛ, dala ɛkkɛ toottɛ Jwaŋa Tolanti aŋka ɛkkɛ ‘wondɛ ɛkɛ waka kaniica ciɛndi ñamuy. 13A ɔŋŋiyɛ, kan mena gɔki te tugga pookɛnyɛ, dala ɛkɛ cɔkti Juaŋti aŋka ɛkɛ yɔɔrdi war tɛɛn te lwoŋi jyeka neeni. 14Oŋ kan ‘ya cɔk te tuka parɛyɛ, gena boŋ ‘ya cɔkiy, oŋ yeti paŋi ‘ya yɔɔrdi genga bɛɛ. 15Oŋ ‘ya noŋja a ɔki? ‘Ya cɔkca te boŋ ‘ya, ɔci moki cɔkca te paŋi ‘ya, ɔci ‘ya ‘ualja te boŋ ‘ya, ɔci ‘ya ‘ualja te paŋi ‘ya moki. 16Kan i jiey Juaŋ te booŋy, oŋ mena balkɛ waka ma ‘wondɛ booŋ bɛɛ neeni, ɛkɛ yaaktanti ñoodi iki i te cɔŋi a ɔki ne i cɔkiy? Acaan ɛkɛ jyeka guaga i wanna ŋeejɛ bɛɛ. 17I waanu cɔk ne pwadan awarɛ, yeti i moodɔ maŋŋi bɛɛ. 18’Ya gɔk Juaŋti a pwatcin, acaan ‘ya gɔk te tugga pookɛn ne tolan te ɛkkɛ. 19Kan ‘ya loṭi kaniicaji te jyeka jitkɛn wɔkin ne dɔɔyɔyɛ, yɔmjin ne tolan te jyek tuka parɛ jyeka a alpn a inyaakkɛn (10,000) jitkɛn wɔkin bɛɛ neeni. 20Modg ɔɔn, naa paŋi ɛkkɛ bala ba paŋi kɛɛgin ḍyɛrin bɛɛ. Yeti dala ɛkkɛ baldɛ ba kɛɛgin ḍyɛrin te naŋki nɔjjo, oŋ yeti dala paŋi ɛkkɛ bala ba paŋi maka ḍwaŋin. 21Ɔci bala ba kiiwɛ ma ganuunji agi, “Te tuk maka pookɛn, ɔci te tuk wɛlga kwoyinyɛ, ‘ya gɔkca maka neeniti, oŋ yeti ɛkkɛn tieŋdi jwali ‘ya bɛɛ. Gena Ciɛggɔn gɔki a ɔɔn neeni.” 22Oŋ yeti jyeka te tugga pookɛnyɛ, a naŋka tɛyan te maka jyeti Juaŋti neeni bɛɛy, yeti ɛkkɛn te maka jyeti Juaŋti bɛɛ. Ɔci miti jiekyɛ, te maka jyeti Juaŋti baaw bɛɛ, ɛkkɛn te maka jyeti Juaŋtiy. 23Kan ma kaniica wyetkɛn ḍɔɔlɛ waakɛnda kaniicaji, ɔci ma gɔkti te tugga pookɛn, ɔci kan maka baan konɛti, walla maka jyeti Juaŋti bɛɛ gɛɛg bɛya ɛkkɛti kaniicajiy, ɛkkɛn ɛkkɛ guaktɛ agi ɛkkɛ agjɛ maka wyetkɛn yeyin bɛɛ? 24Yeti kan ma waakɛnda mieti ma te jyek Juaŋ ɔci mena jyeti Juaŋti bɛɛ, walla mena baan konɛti gɛɛl bɛɛn orɔyɛ, ɛkɛ wiakti yomɛti te nɔji ɛkɛ te jyeka tieŋni ɛkɛ neeni, ɔci jyeka tieŋni ɛkɛ neeni nɔji ɛkɛ lɛɛltan bora a ɛkɛ a mena nɔɔdɔn. 25Ɔci jyeka bala ɛkɛ yomɛti a coggin neeniyɛ, bɛya bora ɔci ɛkɛ ḍwondi iñɔ, ɔci morti Juaŋti, ɔci yomɛ wiakti, ɔci gɔkti agi, “Jwaŋa Tolan balgi iki ɛkkɛ awarɛ, hay!” 26Modg ɔɔn, ɔɔn gɔktɔn a ɔki? Ne ɛkkɛ ḍwoṭɛ wyetkɔ a cyɛɛlɔ kaniicajiyɛ, ɛkkɛ men da balki ɔɔli, ɔci mena parɛ balki lali, ɔci mena parɛ balki gena ɛkɛ lɛɛrnɛ Juaŋy, ɔci mena parɛ balki lali jiek te tuka parɛ, ɔci mena parɛ balki lwoŋi jieko. Waka neeni waakɛndayɛ, kaniica ciɛntan ñamu. 27Kan menga gɔki te tuka parɛyɛ, ma ne yyɛɛwɔ ɔci walla ne ḍoogɔyɛ, dala ɛkkɛn menga da jɔŋdi te wɔɔka ɛkɛ parɛ, oŋ yeti mena lwoki jiek jitkɛnyɛ, a cyɛɛlɔ. 28Kan mena lwoki jiek baawyɛ, dala ma waakɛnda ciya lieda kaniicaji, ɔci men da gɔkti war ɛkɛti parɛ, ɔci gɔgdi i Jwaŋa Tolan. 29Dala maka mieti jyek Juaŋ ne yyɛɛwɔ ɔci walla ne ḍoogɔ neeniyɛ, dala ɛkkɛn gɔkti, ɔci dala maka pookɛn neeniyɛ, tieŋdi jyeka guaktan ɛkkɛny. 30Kan Boŋ Juaŋ jiek lɛɛlnɛ bora mena ciyi iñɔ neeni gɛɛltiyɛ, dala mena gɔki ñamu neeni yɔɔda te jieko. 31A ɔŋŋiyɛ, ɛkkɛ yaaktɛti agdɛ maka lwoki jiek waakida, menga da te wɔɔka ɛkɛ parɛ aŋka ma waakɛnda urtanti jiek, ɔci ɛkkɛn waakɛnda yomgɛn tɛya ɔci ñɔya. 32Maka mieti mayɛ, ɛkkɛn gɔki amaam bɛɛ, ɛkkɛn mwoki jyek Juaŋ ne pwadan. 33Jwaŋa Tolanyɛ, nwoci jiek bɛɛ, ɛkɛ a mena yɔŋi jieko. Bala ba ma kaniican waakɛnda, maka pwadgin Juaŋtiy, 34dala moong ɛkkɛ ciya lieda kaniicanji. Ɛkkɛn balkɔn pɔɔdg aŋka gɔkti bɛɛ, oŋ yeti dala ɛkkɛn jyeddi ba jyeka guagdɛ ganuuny. Naa ɛkkɛn wyetkɛn eetan ñaalɔ ḍwaŋdi te maka ‘uay bɛɛ. 35Kan moong buagɔn genga ŋeettanyɛ, dala ɛkkɛn tootti ‘uay ɛkkɛnti baanji. Acaan yaayɛ a lɔɔn ɛɛŋti ne ɛkɛ gɔkti jiek kaniicajiy. 36Jyek Juaŋ bɛɛn te ɛkkɛtɛ? Walla ɛkkɛn bɛɛn ɛkkɛti pookɔ? 37Kan men gɛɛl poŋi gɔki agi ɛkɛ agjɛ mena mieti ma ɔci walla balkiti Boŋ Juaŋyɛ, dala ɛkɛ jyeka kiid ‘ya ɛkkɛti neeniyɛ, ŋeeddɛ ɛkɛ a jyek Ciɛggɔn. 38Kan ɛkɛ jyeka neeni naŋŋɛ a wyeñ boojyɛ, ɛkɛ daŋkun naŋdɛ ɛkkɛ a mena wyeñɛ baawy. 39Modg ɔɔn, dala ɛkkɛ bwaktɛ waka ma ‘wondɛ Boŋ Juaŋ te miti, ɔci naa menga dɛɛdɛ ɛkkɛ te jyek tugga pookɛn bɛɛ. 40Oŋ yeti dala waak waakɛnda bala te pɔya awarɛ, ɔci a ywaŋgɔny.

will be added

X\