1Kuruntuc 13

1Kan ‘ya yaakati gɔk te tugga iñɔ ṭɛɛrji ɔci tugga ñaalɔ pɔliji waakɛnda, oŋ ‘ya an ma bɛɛyɛ, ‘ya a genga bɛɛ, ɔci jyek ‘ya bala ba joon lɔlŋa ɔci ba joon bila garan. 2Ɔci kan ‘ya ‘wonna Juaŋ miti jiek ɔci kan ‘ya jyeka a coggin ŋeej ɔci kan waak ŋeej ‘ya waakɛnda, ɔci moki kan ‘ya balka jyeni ne pwadan aŋka pomk uutca ɔntɔ te nonkɛnti, oŋ kan ‘ya an ma bɛɛyɛ, ‘ya a genga bɛɛ. 3Kan ‘ya mal ‘ya ‘woñgan maka bɔwan waakɛnda, ɔci war ‘ya oljan nokka ma te jyeni ‘ya, oŋ kan ‘ya an ma bɛɛyɛ, genga yɔmdi te ‘ya bɛɛ. 4Mena ani mayɛ, ɛkɛ kɛɛy ɔci noŋi ne pwadan. Mena ani mayɛ, yomɛ motcin bɛɛ, ɔci moki noŋi warɛ bɛɛ, ɔci ɛkɛ a yɛcan bɛɛ, 5ɔci ɛkɛ noŋi ne yaayan bɛɛ, ɔci buagɔn genga te war ɛkɛ bɛɛ, ɔci ɛkɛ poŋi ne yaayan bɛɛ, ɔci loomgɛ koocin bɛɛ. 6Mena ani mayɛ, ɛkɛ yomɛ ñɔɔcin te jyeka awarɛ, ɛkɛ yomɛ ñɔɔcin te nɔji bɛɛ. 7Mena ani mayɛ, ɛkɛ jiñɛ tɛɛcin te waak waakɛnda, ɔci jyeti waak waakɛnda, ɔci kɛɛy waak waakɛnda, ɔci balkɛ kɛɛn te waak waakɛnda. 8Aniyɛ, baadi bɛɛ, oŋ yeti miti jiek mati baadi, ɔci jyeka te tugga pookɛn baadi, ɔci ŋeejin baadi moki. 9Acaan ŋeejin ikinyɛ, bɔɔnjin, ɔci jyeka mittin ikinyɛ, bɔɔnjin. 10Oŋ yeti mena yɔmjin neeni ne bɛɛdiyɛ, waka bɔɔnjin neeniyɛ, eedɛ bora. 11Ne wona ‘ya aga kaciyɛ, ‘ya baal gɔk ba kacca ḍiɛran, ɔci baal poŋ ba kacca ḍiɛran, ɔci ‘ya waka jitkɛn yuartanji kɛɛgin, yuarcanji ‘ya daŋkun. Ne ‘ya aŋŋa ‘uanyɛ, ‘ya pɔy kɛɛgin ḍyɛrin daljan doki. 12Acaan waka ñaltin ikin acca neeniyɛ, ɛkkɛn bala ba pɔɔyama yuar waŋɛti budan, oŋ yeti te oŋŋa wannayɛ, ikin ñoortin woŋgɔti a ñoorin. Ɔci ‘ya waak gɛɛg ŋeejo, yeti te oŋŋa wannayɛ, ‘ya waak ŋeejja ne pwadan bala ba ŋeejin ‘ya ŋeejati Juaŋy. 13Oŋ accayɛ, jyeni, ɔci jyenna jyettin ikin kɛɛyin, ɔci aniyɛ, ɛkkɛn bala oŋkanda. Oŋ yeti ɛka pwadan ne tolanyɛ, gena anno.

will be added

X\