1Kuruntuc 12

1Acca te jyek waka ma ‘wondɛ Boŋ Juaŋyɛ, hay, modg ɔɔn, ‘ya buaga dala ɛkkɛ jyeka awarɛ neeni jitkɛn ŋeeddɛ. 2Çeejɛ ɛkkɛ, ne wona ɛkkɛ agɛ maka moṭi Juaŋti bɛɛyɛ, ɛkkɛ attɛ bora jɔkin yeyinti jɔkin gɔki jiek bɛɛ neeni byeŋkɛnti, ba eñña ɛkkɛ eekiti ɛkkɛn doki wanna. 3Acca ‘ya miet ɛkkɛ ka mena gɔki te Boŋ Jwaŋa Tolanyɛ, ɛkɛ yaakinti gɔkti agi, “Yaccu a ‘walgɔn” bɛɛ, ɔci menga yaakinti gɔkti agi, “Yaccu a Ciɛggɔn” budan bɛɛ. Gena mena balkɛ Boŋ Juaŋ aŋka yaakinti gɔkti a ɔɔny. 4Waka ma ‘wondɛ Juaŋ jitkɛn coŋɔ, yeti ɛkkɛn bɛya te Boŋa ne cyɛɛlɔ neeniti. 5Ɔci kanŋan jitkɛn bala coŋɔ, yeti Ciɛggɔn a cyɛɛlɔ budan. 6Ɔci naŋki bala jitkɛn ne coŋɔn, yeti gena Jwaŋa ne cyɛɛlɔ ma kiennɛ ɛkkɛn waakɛnda wanna. 7Ɔci Juaŋ ma ‘wonnɛ Booŋ waakɛnda a lyɛlta te gena pwadan te ma waakɛnda. 8Men gɛɛl ‘wonnɛ Boŋ Juaŋ boŋ ñing tɛɛno, ɔci ɛka parɛ balkɛ boŋ ŋeejin, yeti ɛkkɛn bɛya te Boŋa ne cyɛɛlɔ neeniti. 9Ɔci mena parɛ balkɛ jyenno, yeti te Boŋa ne cyɛɛlɔ neeniti, ɔci ɛka parɛ yɔŋi ma waakɛn te wajan, yeti naŋka neeni bɛya te Boŋa ne cyɛɛlɔ neeniti. 10Men gɛɛl a mena noŋi naŋka tɛyan naŋka ñyecki may, ɔci ɛka parɛ a mena mieti ma te jieko, ɔci mena parɛ balkɛ war tɛɛn aŋka waka bɛya te Boŋ Juaŋti ɔci waka bɛya te boŋka pookɛnti byɛŋdɛ jitin. Ɔci men gɛɛl a mena gɔki te tugga pookɛn, men gɛɛl a mena ma myettɛ jiek te tugga pookɛnti. 11Waka neeni waakɛnda naŋdɛ Boŋ Juaŋ ne cyɛɛlɔ neeni, ɔci ɛkɛ waak ‘wondɛ ma waakɛnda ba yom ɛkɛ parɛ. 12Bala ba waryɛ, ɛkɛ a cyɛɛlɔ budan, yeti ɛkɛ balkɛ waak ne coŋɔn. Ɔci wak wara ne cyɛɛlɔ neeni waakɛndayɛ, ɛkkɛn coŋɔ, yeti ɛkkɛn a cyɛɛlɔ budan. Ɔci war Yaccu daŋkun bala a ɔɔn. Gena kaniica. 13Acaan ikin buulkin ma te Boŋa ne cyɛɛlɔ neeni, ɔci aŋŋin wara ne cyɛɛlɔ. Ma Icrayiil ɔci Keedin Pookɛn, ɔci maka bɔwan ɔci maka cyɛganyɛ, ɛkkɛn waakɛnda moti Boŋa ne cyɛɛlɔ neeni. 14War men baan balki waak ne coŋɔn. 15Kan ciyu gɔkti agi, “‘Ya a bieŋ bɛɛ, war balkin genga ‘yati bɛɛ,” jwalla neeni ɛkɛ naŋdɛ aga gena ḍiɛran te warti bɛɛ. 16Ɔci kan jyeñ gɔkcin agi, “‘Ya a waŋ bɛɛ, war balkin genga ‘yati bɛɛ,” jwalla neeni ɛkɛ naŋdɛ aga gena ḍiɛran te warti bɛɛ. 17Kan war warda niin a waŋy, oŋ ba tyeŋi bɛ? Oŋ kan war warda a jyeñy, oŋ ba ŋood bɛ? 18Yeti bala a ɔɔn, Jwaŋa Tolan war cuonnɛ waako, ɛkkɛn waakɛnda naŋŋɛ ɛkɛ ba naŋka yom ɛkɛ buagitiy. 19Oŋ kan waka neeni waakɛnda niin a cyɛɛlɔ budany, oŋ war bala wɛnɛ? 20Waak bala kɔɔna kɔɔnno, yeti war a cyɛɛlɔ budan. 21Waŋu yaakinti gɔkti bieŋuti boki agi, “‘Ya buaga i ba.” A’a. Ɔci wyeñu yaaktanti gɔkti cieguti boki agi, “‘Ya buaga genga ɛkkɛti ba.” A’a. 22Te cyɛŋŋa wannayɛ, waka men warɛti ɛkkin ñaltin ikin ba waakɛn kookɛ neeniyɛ, ɛkkɛn yɔmjin ne tolan. 23Ɔci waka men warɛti ɛkkin ñaltin ka ɛkkɛn a genga bɛɛyɛ, ikin noŋin ne pwadan ɛkkɛnti ne tolan. Ɔci waka bala ikin waakɔti ñaltin ka yeyin neeniyɛ, ikin noŋtin ne pwadan ɛkkɛnti ne tolan, 24gena naŋka yookɛti makɛn pwadin neeniy. Yeti Juaŋ ɛkkɛn waakɛnda ñaaŋŋɛyɔ ba gena ne cyɛɛlɔ, aŋka ɛkkɛn nooŋdi yɔtin ne pwadan. 25Ɔci waryɛ, ɛkɛ a kɛɛptɔn bɛɛ, waka men warɛti ɛkkɛn gɔɔr yɔtin pookɛn waakɛnda. 26Kan gen gɛɛl te waka neeniti konɛ ñakcin te gengayɛ, ɛkkin pookɛn wanna da korkɛn ñakti ba ɛkɛ ɔɔn. Ɔci waka neeni kan gɛɛl naŋɛ ma ne pwadanyɛ, ɛkkin pookɛn waakɛnda yomgɛn ñɔya ñɔɔn i ɛkɛ. 27Yeti ɛkkɛyɛ, ɛkkɛ agɛ war Kiṭɔ, ɔci ɛkkɛ agɛ maka balgɛ i ɛkɛ a cyɛɛlɔ. 28Ɔci Juaŋ ma kɛɛmnɛ kanŋa jitkɛ kaniicaji. Ma gɛɛg a cuudan, ɔci ma gɛɛg a maka mieti jieko, ɔci gɛɛg a maka loṭi may, ɔci gɛɛg a maka noŋi naŋka tɛyan, ɔci gɛɛg a maka yɔŋi ma waakɛn te wajan, ɔci gɛɛg a maka moki may, ɔci gɛɛg a maka ma ḍɔɔltanyɔ kanŋati nona ne cyɛɛlɔy, ɔci gɛɛg gɔki te tugga pookɛn ne coŋɔn. 29Ma waakɛnda a cuudanɛ? Ma waakɛnda a maka lwoki ma te jiekɔ? Ma waakɛnda a maka loṭi makɔ? Hay, ma waakɛnda noŋi naŋka tɛyanɛ? 30Hay, ma waakɛnda balkɛ kanŋa ywaŋi ma te wajanɛ? Hay, ma waakɛnda gɔki te tugga pookɛn? Ma waakɛnda a maka jiek jitkɛn ootan bora? 31A’a, a ɔɔn bɛɛ, yeti dala i bwagdi ne pɛñan aŋka naŋka pwadan neeni gɛɛl bala iti. Yeti ‘ya buaga ɛkkɛ myettin pɔya pwadan ‘wota men.

will be added

X\