1Kuruntuc 10

1’Ya buaga dala ŋeeddɛ ɛkkɛ, hay modg ɔɔn! Weyi ikin waakɛnda bala ati pɔli pwanɛti, ɔci ɛkkɛn Tola Tidan jyɛdɛji. 2Ɔci ɛkkɛn waakɛnda buullɛ Jwaŋa Tolan te pɔllo, ɔci toolji moki aŋka ɛkkɛn aga maka bootcin Muucatiy. 3Ɔci ɛkkɛn waakɛnda omi ama pooktan, 4ɔci ɛkkɛn waakɛnda moti pyega pooktany. Acaan ɛkkɛn moti te pyega bɛɛn te guonan pooktanti, guonan bala ati i ɛkkɛn a cyɛɛlɔy. Ɔci guonan neeni Gena Kiṭɔ. 5Yeti ɛkkɛn muŋŋɛ Juaŋ waakɛnda bɛɛ, acaan ɛkkɛn ḍɛɛmdin wɔɔŋji aŋan. 6Waka neeni mieti ikin aŋka naa ikin antin naŋki nɔji ba ɛkkɛn moki ɔɔn bɛɛ. 7Naa ɛkkɛ agdɛ maka moṭi jɔkin yeyinti bɛɛ, acaan ɛkkɛn te baaṭi ma gɛɛg bala moṭi jɔkin yeyin neeniti bala ba kiiwɛ ma agi, “Ma cooccin iñɔ aŋka omi ɔci moti, ɔci ɛkkɛn jɔŋŋin ñaalɔ aŋka ñiɛldi.” 8Naa ikin noŋtin tomi ba ɛkkɛn ɔɔn bɛɛ. Ɛkkɛn gɛɛg noŋi tomi ɔci ḍɛɛmdin tuun a alpn a men baan wyetkɛn ne ḍoogɔ (23,000) te oŋŋa ne cyɛɛlɔ. 9Naa ikin Ciɛggɔn pɔɔtin bɛɛ. Acaan ma gɛɛg ɛkkɛntiyɛ, Ciɛggɔn pɔɔyɛ, ɔci ɛkkɛn kooyɛ kogi ɔci tuuni. 10Ɔci walla naa ikin ywontin waakɔ ba ma gɛɛg ɛkkɛnti ne ywoñki waakɛn te baaṭi ɔci ɛkkɛn yaaññɛ Malɛɛka Yooci Noon wanna bɛɛ. 11Naŋka neeni bɛɛn ɛkkɛnti aŋka ɛkkɛn myettan, yeti ɛkkɛn kiiwɛ ma, aŋka loṭi ikin maka acca yuonga ookkin ne ŋoyɔ neeni. 12A ɔŋŋiyɛ, dala mena poŋi gɔki agi ɛkɛ yɔɔdjɛ ne tɛyan neeni waŋɛ tiittɛ aŋka naa ɛkɛ ḍɛmdi bɛɛ. 13Pɔɔta parɛ gɛɛl bɛɛn ɛkkɛti bɛɛ, gena pɔɔta ŋeecɔn ma waakɛnday. Yeti Juaŋ ɛkɛ pwad pwado. Ɔci ɛkɛ ɛkkɛ daldɛ pɔɔt jitin ne tolan ne ɛkkɛ bwanditiji ɔɔn bɛɛ. Ɛkɛ ɛkkɛ ‘wondɛ war tɛɛn aŋka ɛkkɛ yomgɔ tiektɛ, ɔci ɛkkɛ ‘wondɛ pɔya ɛkkɛ koodɛ boray. 14A ɔŋŋiyɛ, hay modg ɔɔn maka ana ‘yay, dala ɛkkɛ waakɔ uuttɛ te mali jɔkin yeyinti. 15’Ya gɔk maka ñingɛn tɛyantiy, dala ɛkkɛ gɔrtɛ gena guagdi ‘ya acca neeni ne baali a ɔkiy. 16Kubaaya motin pyeg luutkin Ciɛggɔn, ɔci ikin gɔkin a pwatcin te ɛkɛ neeni, ne ikin motin ɛkɛyɛ, ikin ñoowin te yimg Kiṭɔ. Ɔci byentan wɛttin ikin jitin neeniyɛ, ikin ñoowin te war Kiṭɔ. 17Acaan byentan a cyɛɛlɔ budan ɔci ikin coŋkin, yeti ikin agin wara ne cyɛɛlɔ budan acaan ikin ñoowin te byentan ne cyɛɛlɔ. 18Gɔrtɛ ma Icrayiil maka omi waka ‘yɛrtan may, pari ɛkkɛn ñoowin te nona ɛrki ma waak bɛɛ? 19’Ya gɔkca a ɔki, waka maltan ma a jɔkin yeyin neeni a genga? Walla waka ‘yɛrtan ma jɔkin yeyin neeniti a genga? 20A’a, waka ‘yɛrtan ma baan konɛyɛ, ŋoortan ɛkkɛn jɔkin yeyin, ŋoortan Jwaŋa Tolan bɛɛ. ‘Ya buaga naa ɛkkɛ ñoodɛ i jɔkin yeyin bɛɛ. 21Ɛkkɛ yaaktɛti mottɛ pyeg luutkin Ciɛggɔn i pyeg luutkin jɔkin yeyin bɛɛ. Ɔci moki ɛkkɛ yaaktɛti ñoodɛ te am Ciɛggɔn ɔci am jɔkin yeyin bɛɛ. 22Ikin poccin Ciɛggɔn aŋka ɛkɛ loondi ikinti ogo? Ɔci ikin waakɔ tɛɛcin te war tɛɛn ɛkɛ boki? 23Waak waakɛnda pwadɔ, oŋ yeti waak waakɛnda yɔmjin bɛɛ. Waak waakɛnda pwadɔ ‘yati, oŋ yeti waak waakɛnda i uutti ñamu bɛɛ. 24Naa ikin menga poŋdi te war ɛkɛ parɛ bɛɛ. Dala ɛkɛ poŋdi te war moodɛn, ɔci te gena pwadan te ɛkɛy. 25Yoŋga wyɛltan ma te dukkan yoŋgitiyɛ, ɛkkɛ omdɛ ɛkkɛn. Yeti naa ɛkkɛ yomgɔ tooci jiek bɛɛ. 26Bala ba jyeka kiigin gɔki agi, “Šɛɛr konɛ ɔci waka bala ɛkɛ konɛti waakɛndayɛ, a wak Ciɛggɔn.” 27Kan ɛkkɛ ‘uommɛ mena jyeti Juaŋti bɛɛ, amti oŋ kan ɛkkɛ attiyɛ, dala ɛkkɛ omdɛ waka oodɛ ɛkɛ ɛkkɛ ñomgɔti waakɛnda, naa ɛkkɛ tooci jiek yomgɔti bɛɛ, 28oŋ yeti kan ɛkkɛ nɔɔnnɛ menga agi, “Waka neeni ŋaarŋi ma nona ɛrki ma waak jɔkin yeyintiyɛ,” naa ɛkkɛ omdi bɛɛ, acaan te mena ɛkkɛ nɔɔnnɛ wanna, ɔci te yom ɛkɛ moki. 29’Ya gɔk te yomg ɛkkɛ bɛɛ. ‘Ya gɔk te yomg maka pookɛn. Menga tooci agi, “Yom mena parɛ yom ‘ya mugdɛyɔ ogo? 30Kan ‘ya gɔkcan Juaŋti a pwatcin ɔci omjan amy, oŋ mena parɛ jiek oldɛ ‘ya wyeñuti te gena gɔŋna ‘ya Juaŋti a pwatcin ogo?” 31Kan ɛkkɛ omɛ walla motɛ walla noŋɛ naŋki gɛɛlyɛ, dala ɛkkɛ naŋka neeni naŋdɛ waakɛnda te jied Jwaŋa Tolan. 32Naa ɛkkɛ agdɛ guonan tuor ma Icrayiil, ɔci Keedin Pookɛn, ɔci kaniica Jwaŋa Tolan bɛɛ. 33Ɔci moki ‘ya buaga ma waakɛnda yomgɛn pwada te naŋka naŋdi ‘ya waakɛnday, ‘ya lier waka pwadin te war ‘ya paru bɛɛ. Yeti ‘ya lier te pwani ma waakɛnda aŋka ɛkkɛn uda.

will be added

X\