1Kuruntuc 1

1Gena ‘ya, Buuluc mena bornɛ Yaccu Kiṭɔ aŋka aga Cuuda ɛkɛ ba yom Jwaŋa Tolan, ɔci mod ikin Cɔctanic kiewɔn worga neen neeni. 2Worga neeni ooddi kaniica Jwaŋa Tolanti ban Kuruntuc, ooddi maka bornɛ Jwaŋa Tolan, aŋka aga ma ɛkɛ maka pwadin te ñoowin ɛkkɛn ñooki iki Yaccu Kiṭɔ i maka moṭi ɛkɛti noon warday. Ɛkɛ a Ciɛggɔn ɛkkɛn ɔci Ciɛggɔn ikin. 3Dala Jwaŋa Tolan Wey ikin, ɔci Ciɛggɔn ikin Yaccu Kiṭɔ yomgɛn pwada a pwani ɛkkɛti, ɔci ɛkkɛn ɛkkɛ ‘wontɛ coodi pwanno. 4’Ya gɔk a pwatcin Jwaŋa Tolanti oŋkanda te ɛkkɛ, acaan Juaŋ yomɛ pwad pwad ɛkkɛti te Yaccu Kiṭɔ. 5Acaan ɛkkɛ korkɔ kuumi te ɛkɛ te pɔyi waakɛnda te jyeka guagdɛ ɛkkɛ waakɛnda, ɔci te ŋeejin ɛkkɛ waak ŋeejɛ waakɛnday. 6Acaan jyeka gɔɔnɔn ɔɔn bora te Yaccu Kiṭɔyɛ, niinjin ɛkkɛ yomgɔti ne tɛyan. Ɛkkɛ balkɛ waka ma ‘wondɛ Juaŋ te Boŋ ɛkɛ waakɛnda doki. 7A ɔŋŋiyɛ, ɛkkɛ kɛɛyɛ Ciɛggɔn ikin Yaccu Kiṭɔ ne oŋŋa ɛkɛ warɛ lɛɛldɛ bora ɔɔn. 8Ɛkkɛ tiidɛyɔ ɛkɛ ne tɛyan ne baaṭi ɔɔn. A ɔŋŋiyɛ, lɔɔn gɛɛl bɛya ɛkkɛ ḍɔɔggɔti te oŋŋa Ciɛggɔn ikin Yaccu Kiṭɔ bɛɛdɛ neeni bɛɛ. 9Jwaŋa Tolan mena ɛkkɛ oonɛ nona ñoowɛ ɛkkɛ iki Ciɛggɔn ikin Yaccu Kiṭɔ Kaci ɛkɛ neeniyɛ, ɛkɛ a mena tieci jyek ɛkɛ waakɛn. 10Modg ɔɔn, ‘ya toocca ɛkkɛti te yenti Ciɛggɔn ikin Yaccu Kiṭɔ, dala ɛkkɛ waakida yɔɔddɛ te jwalla ne cyɛɛlɔ. Naa jyeka a kɛɛbgin bala ɛkkɛti bɛɛ, yeti dala ɛkkɛ coodɛ te yoma ne cyɛɛlɔ ɔci te paŋŋa ne cyɛɛlɔ. 11Modg ɔɔn, ‘ya nɔɔtka ma on tukɛ Klawi agi jyek kɛɛptin baalɔ ɛkkɛti. 12Jyeka guagdi ‘ya neeni jitkɛn bala a ɔŋŋi, ɛkkɛ men da gɔki agi, “‘Ya bootca Buulucti,” ɔci mena parɛ moki agi, “‘Ya bootca Apɔɔlɔcti,” ɔci mena parɛ agi, “‘Ya bootca Cipacti,” ɔci mena parɛ moki agi, “‘Ya bootca Yaccu Kiṭɔti.” 13Kiṭɔ warɛ ŋuonnɛ jitin? Buuluc ŋaapci ma kakanti te ɛkkɛ? Ɛkkɛ buulki ma te yenti Buuluc? 14’Ya gɔkca Juaŋti a pwatcin acaan ‘ya buoṭi menga te ɛkkɛti bɛɛ, yeti Kricpac buuli ‘ya yaakkɛn i Gayac, 15acaan naa menga gɔkti agi ɛkɛ buulliti ma te yenti ‘ya bɛɛ. 16Ɛɛ, on tukɛ Ictɛɛpanucyɛ, buuli ‘ya moki. Menga buuli ‘ya moki maka neeni ŋotkɛnti moki boki? Çeej ‘ya bɛɛ. 17Kiṭɔ ‘ya cuonna buor ma bɛɛ. Yeti ‘ya cuonna lor ma te jyek ɛkɛ, oŋ yeti te jyek ñing tɛɛn ma baan budan aŋka war tɛɛn kakan Kiṭɔ aga jyeka budan bɛɛ. 18Maka yienyɛ, jyek Kiṭɔ ñaltan a jyeka budan ɛkkɛnti, oŋ yeti ikin a maka yɔɔññɛ ɛkɛyɛ, ɛkɛ ñaltin ikin a war tɛɛn Jwaŋa Tolan. 19Acaan kiiwɛ ma worga Juaŋji agi, “‘Ya ñing tɛɛn maka ñingɛn tɛyan nuud jitin, ɔci wyeñ wɔŋi maka wyetkɛn wɔkin uutca ‘ya ɔntɔ.” 20Ba ‘wana ñingɛ tɛyan bɛ? Ba mena urkinti worga ne tolan bɛ? Ba mena lieṭi jiek jitkɛn yuonga neeniti bɛ? Jwaŋa Tolan ñing tɛɛn iñɔ baanji wɛnni naŋŋɛ a wyeñ booji bɛɛ? 21Acaan Juaŋ te ñing tɛɛn ɛkɛyɛ, maka iñɔ baanji wɛnni dalnɛ, ɛkɛ ñiyɛ te ñing tɛɛn ɛkkɛn pookɛn bɛɛ, Juaŋ yomɛ pwatcin te jyeka loṭin ikin ma ñaltan maka iñɔ a wyeñ booji neeni, aŋka maka jyeddi jyeka neeni yɔɔdɛ ɛkɛ. 22Ma Icrayiil buagɔn gɔrti naŋka tɛyan, ɔci ma Giriik lieṭi ñing tɛɛno. 23Yeti ne ikin loṭin ma ka Yaccu ŋaabɛ mayɛ, lalla neeni ma Icrayiilti bala ba jyeka kooki ɛkkɛn te jyek Juaŋo, ɔci lalla neeni a wyeñ booji Keedin Pookɛnti. 24Yeti maka bornɛ Juaŋ waakɛnda, kan ɛkkɛn a ma Icrayiil, walla a maka Kɛɛna Pookɛnyɛ, Kiṭɔ a war tɛɛn Jwaŋa Tolan, ɔci a ñing tɛɛn Jwaŋa Tolan ɛkkɛnti. 25Wyeñ wɔŋi Jwaŋa Tolanyɛ, bala ñamu te wyeñ wɔŋi ma baano, ɔci war tɛɛn ɛkɛyɛ, bala ñamu te war tɛɛn ma baano. 26Modg ɔɔn, dala ɛkkɛ poŋdɛ ne ɛkkɛ bornɛ Juaŋ ɛkkɛ balgɛ a ɔki. Magga ɛkkɛti ñingɛn tɛɛcin ba bolji ma baan bɛɛ, ɔci waakɛn tɛɛcin bɛɛ, ɔci menga jiedi ma ba mena tolan bɛɛ. 27Oŋ yeti Juaŋ muowin maka ñingɛn morŋan aŋka maka ñingɛn tɛyan lɔɔddi, ɔci Juaŋ muowin maka waakɛn koyan baan konɛti, aŋka maka waakɛn tɛyan lɔɔddi. 28Juaŋ muowin maka ḍyɛrin, ɔci maka waaktan ma ɔci maka baaw aŋka maka bala neeni uuttan ɔntɔ. 29A ɔŋŋiyɛ, naa menga noŋi warɛ Juaŋ ñamɛti bɛɛ. 30Yeti Juaŋ ɛkkɛ oonɛ ɔci ñaaŋŋɛyɔ i Yaccu Kiṭɔ, mena aŋi ñing tɛɛn ikin te Jwaŋa Tolan mena a pwani ikin, ɔci ikin wanniny. 31A ɔŋŋiyɛ, bala ba jyeka kiigin worga Juaŋji ne gɔkki agi, “Dala mena noŋi warɛyɛ, dala ɛkɛ noŋdi warɛ te Ciɛggɔn.”

will be added

X\