1 L puolpo k Yiesu din lin digbɑnsɑɑkɑlɑ ni nɑn digbɑnbis ni, k muɑntl Yennu nɑɑn lɑbɑmɑnn k u tuomiinbɑ piik nɑn bɑnle din wɑɑ’u. 2 Puob nbɑ k u din nyinn nɑlnbiit b ni, k biɑ te k b yiɑli nɑ gbenn nɑ mun din be lenŋ mɑnŋ k wɑɑ’u. Yenɔ din tie Mɑgdɑɑlɑ puo Mɑɑli, wun nbɑ k nɑlnbiit bɑnlole din nyii u ni, 3 k lieb mun din tie Suusɑ ŋɑɑpuo Sɑɑnn (Suusɑ din tie Heluod ŋɑɑtuontunnɑ sɑɑkuɑ), nɑn Suusɑɑnn, nɑn puolieb bonciɑnn. K b kul ɑ din jikt b mɔnŋ mɔnŋ bonɑ k tien Yiesu k sonmt ŋuɑ nɑn u puolpoweitieb. 4 Niib lek din nyi digbɑnn nɑn digbɑnn k bɑɑt Yiesu buol, k nibulciɑɔnŋ din lɑkn, k Yiesu yin’m bɑljouk ɑ: 5 «Jɑsuɑ din duo u kpɑɑb ni ɑ wun sɑɑ bul tɑn. Wɑɑ din buul nɑ, k bonbuoli nɑ yenn-nbɑ din yɑt bɑɑ sɑnjouk pɑɑk, k niib gɑɑl ŋmɑɑt l pɑɑk, k nuɑni biɑ tɔki k di. 6 K liel mun din bɑɑ tɑnpuut pɑɑk. Bonbuoli mɑnŋ nbɑ din tɑn piɑ yuo nbɑ, l tɑn kpo e, k mɑɑn l din k bɑɑ mɑɑtuk ni. 7 K liel mun din bɑɑ kunkoni ni, k tɑn lɑkn piɑ k kpɑɑt nɑn’m, ŋɑɑn k kunkoni ŋmɑbl’b. 8 Ŋɑɑn k liel mun bɑɑ tinŋɑnŋ ni, k piɑ k kpɑɑt bonŋɑnn, k tɑn nɑn nyik nyik nyik.» Yiesu nbɑ yin’m bɑljouk mɑnŋ k gbenn nɑ, k u yet ɑ: «Wun nbɑ mɔk tubɑ k sɑɑ gbɑt, wun gbiint.» 9 L puolpo e k Yiesu puolpoweitieb din boi’ɔ ɑ: «Bɑljouk nɑ pɑɑk tie bee?» 10 K u jiin k yet’b ɑ: «Yinm ŋɑnin, Yennu cɑb ɑ yin bɑnn wuol ni mɑɑn k jii jiin u nɑɑn po, ŋɑɑn nilieb ŋɑnin, n yii’m bɑljokt e, ɑ n te k: Bin got ŋɑɑn dɑɑ lɑɑt; Bin biɑ gbiint, ŋɑɑn dɑɑ bɑnt l pɑɑk.» 11 «Bɑljouk nɑ pɑɑk tie nnɑ e: Bonbuoli nbɑ nɑ e tie Yennu mɑɑn. 12 Bin nbɑ tie nɑn sɑnjokpinŋ nbɑ k bonbuoli bɑɑ lenŋ nɑ, tie bin nbɑ tuu gbɑt mɑɑn mɑnŋ, ŋɑɑn Sɑɑtɑn n bɑɑl k nyinn’l b pɑlɑ ni ɑ b dɑɑ tie yɑdɑ k lɑ fielu. 13 K lieb mun nɑɑn nɑn tɑnpuut nɑ e. B tuu gbɑt mɑɑn mɑnŋ k gɑɑl’l nɑn pɑlpienn; ŋɑɑn b k ŋɑɑnt k l bɑɑ jiinɑ. B tuu tien yɑdɑ yuo wɑɑnm-nnɑ, ŋɑɑn nyik yɑdɑ mɑnŋ yuo nbɑ k jinjɑnmi bɑɑl b pɑɑk. 14 Bonbuoli nbɑ bɑɑ kunkoni ni nɑ nɑɑn nɑn bin nbɑ gbɑt mɑɑn mɑnŋ ŋɑɑn binbenŋ dɑɑmiu nɑn mɔktuk lonm nɑn niɑnbiiuk nbɑ be tingbounŋ nɑ ni tuu nyɑkn mɑɑn mɑnŋ b pɑlɑ ni, k lin ŋɑkt. 15 K lin nbɑ mun bɑɑ tinŋɑnŋ ni nɑ ŋɑnin nɑɑn nɑn bin nbɑ gbiint n mɑɑn k diɑ’l kenken nɑn bɑlmɔni b pɑlɑ ni, k b pɑlcienn ni b biɑ luon luɑnɑ. 16 «Suɑ k jokt fitl ŋɑɑn liknt bokt l pɑɑk, ɑmi k gul’l u gɑdo lɔunŋ ni. Sie k u jii’l k tuɑn bonsiɑl nbɑ fɔk pɑɑk, k niib i jik i kuɑ yuo nbɑ, bii lɑɑt yentu nɑ. 17 Bɑli nbɑ kul wuo, sie k l tɑn wuot nyii pɑɑnu ni, k lin nbɑ mun liik, sie k l tɑn likt k nyii. 18 «L pɑɑk, ii mi mɑn yɑɑ gbiintl Yennu mɑɑn biɑnŋ nbɑ. Wun nbɑ mɔk, u biɑ sɑɑ lɑ k pukn, ŋɑɑn wun nbɑ k mɔk, b sɑɑ jii bonmintk nbɑ k u mɔk nɑ e.» 19 L yuo nɑ k Yiesu nɑɑ nɑn u ninjɑnm din bɑɑl, ŋɑɑn k k fit lɑ sɔnu nbɑ k b sɑɑ nɑkn’ɔ, k mɑɑn niib nɑ din yɑbt ɑ. 20 K suɑ tɑn yet’ɔ ɑ: «A nɑɑ nɑn ɑ ninjɑnm be nɑn-yel po k luon bin lɑ’ɑ.» 21 Ŋɑnn e k u yet’b ɑ: «Bin nbɑ gbiɑ Yennu mɑɑn k sɑɑk k biɑ tuun l biɑnŋ, ŋɑnm e tie n nɑɑ nɑn n ninjɑnm.» 22 Dɑsiɑl k Yiesu nɑn u puolpoweitieb din kuɑ bulgbetl ni, k u yet’b ɑ: «Ŋɑɑnt mɑn k t puot k sɑɑn mɔkgbenŋl nɑ gbingbɑnliel po.» K b sɑɑn. 23 Bɑɑ sɑɑ yuo nbɑ k Yiesu duɑl guɑn. K wonpɑɑluk tɑn fikt k dɑ mɔkgbenŋl mɑnŋ ni, k nyunpɑnɑ pil k kuɑ bulgbetl nɑ ni k tɑn yɑɑ lin gbie, k b ji din kuɑ ninbɔnŋ ni. 24 K u puolpoweitieb din bɑɑl k fiin’ɔ k yi ɑ: «Cɑnbɑɑ, cɑnbɑɑ, t be kuun ni e.» K u fiil k tiɑn wounŋ nɑn nyunpɑnɑ nɑ pɑɑk ɑ bin ŋmin, k l ji din fuɑ k ŋmin suon nnɑ. 25 K u jiɑnt boi u puolpoweitieb ɑ: «I yɑdɑ be lee?» K jɑŋmɑɑni din suol’b, k l biɑ yɑɑl lit’b, k b boi b lieb ɑ: «Jɑbuolbee e nɑ, k u tɑn yet mɔb k tul wounŋ nɑn nyunpɑnɑ k b sɑk u mɔb u?» 26 Yiesu nɑn u puolpoweitieb din puot mɔkgbenŋl k bɑɑl Gelɑɑsɑ tinŋ ni, k set, ŋɑɑn k Gɑɑliile tinŋ biɑl puolpo. 27 K Yiesu nbɑ din nyii bulgbetl nɑ ni, k Gelɑɑsɑ jɑsuɑ din cet’ɔ, k nɑlnbiit din be juɑ mɑnŋ ni, k u din k liɑ siɑl i k l wei hei. U biɑ din k sɑɑk kɑɑl ŋɑɑk ni, ŋɑɑn duɑ kɑɑt ni. 28 Wɑɑ din lɑ Yiesu yuo nbɑ, k u yikn sɑnpɑɑpo wɑɑ, ŋɑɑn gbɑɑn Yiesu tuɑnn k tiɑn yet ɑ: «Yiesu, fin nbɑ tie Yɑbnt Yennu Bijɑ, min nɑn fin, nlee mɑntk i? N bɑln’mɑ e, dɑɑ muksl’n.» 29 U din yet nnɑ k mɑɑn Yiesu ponŋ tiɑn u pɑɑk k yet’ɔ ɑ wun nyi juɑ mɑnŋ ni. Yuo kul, nɑlnbiiuk mɑnŋ din tuu fiil e, k b din tuu bɑɑn u nii nɑn u tɑɑ nɑn jɑlt k guu’u, ŋɑɑn k u tuu yɑn jɑlt nɑ, k nɑlnbiiuk mɑnŋ biel’ɔ k kuɑnt’ɔ muuk ni. 30 K Yiesu boi’ɔ, «A sɑnn ii?» K u jiin ɑ: «N sɑnn yi bul e,» k mɑɑn nɑlnbiit bonciɑnn din kuɑ juɑ mɑnŋ ni. 31 L yuo nɑ k nɑlnbiit mɑnŋ ji din bɑln Yiesu hei ɑ, u dɑɑ te k b sɑɑ buotsunsunŋ ni. 32 K duoli bonciɑnn din be kunkonn nɑ pɑɑk k di, k nɑlnbiit nɑ bɑln Yiesu ɑ wun cɑb’b bin sɑɑn kuɑ duoli mɑnŋ ni, k Yiesu cɑb’b sɔnu. 33 Ŋɑnn e k nɑlnbiit nɑ nyii juɑ nɑ ni k sɑɑn sɑɑ kuɑ duoli nɑ ni, k duoli nɑ kul din tin bulbulbul k nyii kunkonn nɑ pɑɑk k sik k sɑɑ bɑɑ mɔkgbenŋl nɑ ni, k dii nyun. 34 Duokpɑɑli nɑ nbɑ din lɑ lin nbɑ tien mɑnŋ, k b ciɑl l yuo nɑ, k sɑɑ muɑnt l lɑbɑɑl duo ni nɑn kpɑɑnt ni. 35 K niib bɑɑl ɑ bin lɑ lin nbɑ tun nɑ, k sɑɑ bɑɑl Yiesu buol, k suɑ juɑ nbɑ k nɑlnbiit ponŋ nyii u ni nɑ, k u kɑl Yiesu buol nɑn lɑɑfiɑ nɑn u dudukt kul ɑ fɑnu, k ji liɑ tiɑt, k jɑŋmɑɑni suol niib nɑ. 36 K bin nbɑ lɑ’l nɑn b nuni nɑ yet’b biɑnŋ nbɑ k Yiesu te k juɑ nbɑ mɔk nɑlnbiit nɑ pɑɑk. 37 Ŋɑnn e k Gelɑɑsɑ tinŋ tieb kul din bɑɑl Yiesu buol k bɑln’mɔ ɑ wun siet nnɑ kii sɑɑ, k mɑɑn jɑŋmɑɑni suol’b hei. K Yiesu ji din kuɑ bulgbetl nɑ ni ɑ wun ŋmɑt. 38 Juɑ nbɑ k nɑlnbiit nyii u ni nɑ bɑln’mɔ ɑ wun ŋɑɑn k wun ciɑn’ɔ. Ŋɑɑn Yiesu din te k u nyik ŋɑɑn yet’ɔ ɑ 39 «I ŋmɑt kii kun k sɑɑ muɑnt bɑktnɔunŋ tuonjɑɑnn nbɑ k Yennu tun k tul’ɑ nɑ.» K u ŋmɑt k lin duo nɑ kul k muɑntl bɑktnɔunŋ tuonjɑɑnn nbɑ k Yiesu tun k tul’ɔ nɑ. 40 Yuo nbɑ k Yiesu din ŋmɑt k sɑɑ puot mɔkgbenŋl nɑ, k suɑ k nibulciɑɔnŋ din tuok’ɔ nɑn pɑlpienn, k mɑɑn b kul ponŋ din guu u bɑɑlu e. 41 Jɑsuɑ nnɑ din bɑɑl lenŋ k b din yi’u Sɑilus, k u din tie Suifnbɑ jɑɑnti dieok sɑɑkuɑ, k u tɑn bɑɑl k gbɑɑn Yiesu tuɑnn k bɑln’mɔ ɑ wun bɑɑl u ŋɑɑk ni, 42 ɑ k mɑɑn u bonpoyenml nbɑ mɔk nɑn binɑ piik nɑn ŋɑnle nɑ yiɑl, k pel kuun ɑ. Yiesu nbɑ din sɑɑ nɑ k nibulciɑɔnŋ nɑ mun wɑɑ’u k gbin muk k tɑn tut’ɔ. 43 K puosuɑ nnɑ mun biɑ din be lenŋ, k siik fɑbounŋ k tɑn jɑnŋ binɑ piik nɑn ŋɑnle, k u din tɑn yɑt u bonɑ kul k tul tebtieb, ŋɑɑn b suɑ din k fit teb’ɔ k u pɑɑk, 44 k u tɑn bɑɑl Yiesu puol k sii u liɑtfuouk mɔgbɑnn k l tɑɑkpɑɑk ni, k u fɑbounŋ nɑ ji din jit. 45 K Yiesu boi ɑ: «Ŋmee sii’n i?» Suɑ kul nbɑ be lenŋ nɑ din noi, k Piɑl tɑn boi’ɔ ɑ: «Cɑnbɑɑ, ɑ k lɑ nibulciɑɔnŋ nbɑ muk’ɑ ni ii?» 46 Ŋɑɑn k Yiesu yet ɑ: «Suɑ sii’n ɑ, k mɑɑn n bɑnn nɑn pɑnsiɑk nyii n ni wɑɑ.» 47 Ŋɑnn e k puo nɑ ji din bɑnn nɑn u kɑn fit bɔl u mɔnŋ, k ji din nyii pɑɑnu ni k jekl, k tɑn gbɑɑn Yiesu tuɑnn, ŋɑɑn yet’ɔ suɑ kul nunm ni lin nbɑ pɑɑk k u sii’u, nɑn biɑnŋ nbɑ k u pɑɑk l tɑɑkpɑɑk ni. 48 K Yiesu yet’ɔ ɑ: «N bipuo, ɑ yɑdɑ nɑ pɑɑk e k ɑ pɑɑk. Ii sɑɑ nɑn mɑnu.» 49 Yuo nbɑ k Yiesu dɑɑ din sie k piɑk nɑ, k tuomi nyii Suifnbɑ jɑɑnti dieok sɑɑkuɑ mɑnŋ ŋɑɑk ni k tɑn bɑɑl yet’ɔ ɑ: «A bonpobik nɑ tɑɑn kpo wɑɑ, k ɑ ji dɑɑ bɑknt Wɑntuɑ nɑ.» 50 K Yiesu gbɑt nnɑ mɑnŋ k jiɑnt yet Yennu jɑɑnti dieok sɑɑkuɑ nɑ ɑ: «Dɑɑ tiin jɑŋmɑɑni. Tient yɑdɑ kuukuɑ, k u sɑɑ fiil ɑ.» 51 Yiesu nbɑ din bɑɑl ŋɑɑk mɑnŋ nɑn-yel ni yuo nbɑ, u din k sɑk k suɑ n kuɑ, l i kii tie Piɑl nɑn Sɑn nɑn Sɑɑk k pukn bik nɑ bɑɑ nɑn u nɑɑ. 52 K bin nbɑ kul be lenŋ mɔ kumɔni k fɑbn bik mɑnŋ pɑɑk. Ŋɑnn e k Yiesu yet’b ɑ: «I dɑɑ mɔ mɑn. Bik nɑ k kpo kɑɑ, ŋɑɑn u guɑnt e.» 53 K niib nɑ lɑɑ’u; k mɑɑn b mi nɑn bik nɑ set kpo wɑɑ. 54 K Yiesu suol bik nɑ nuu ŋɑɑn yiin ɑ: «N bik, fiit.» 55 K u jen u mɑnfuol ni k fiil yiɑn ɑ, k Yiesu yet’b ɑ bin tul bik nɑ jiet k wun di. 56 L din bɑkt bik nɑ bɑɑ nɑn u nɑɑ bonciɑnn; ŋɑɑn Yiesu din yet’b nɑn ninmɔnn ɑ bii mi k bin yet suɑ lin nbɑ tien nɑ.
