Tiit 2

1Fin nuan ń gii tund yal nba tuag tundŋann sɔnu. 2Maad janikpela k ban daa mɔg tubonm, k ban gii cɔln b kua, gii ceg, k ban ŋanm gii kub b dindann yen b buam yen b juunn k l paa. 3Maad puonikpela mɔ, k b binbem n ninŋ, ban ŋɔn k b tie papiendanm Yendu nunŋ n. Ban daa mɔg sanjounŋ g biɛ daa tug b kua g kun daam mɔ. Ban gii tien cegli nba ŋan, 4g puobid ń fid g bann ban bu tien nand gii bua b salb yen b bid, 5gii so b kua, gii tie papiendanm, g ŋanm gii kub b ŋai, gii tie nimɔnm, g daa kand b salb mɔi po. Nnyan i, g sua kan fid g maad mabiiug Yendu maam po. 6Te g naasenm ń mɔ ń gii tie bonn kul g dagd. 7Fin mɔno ń mɔnd k a binbem n ninŋ, ban la a buol g bann yal tie tuonŋana ; a tundl ń gii tie papienn tundl, g cɔlunŋ be l n. 8A maam ń gii tuag sɔnpienu g daa mɔg siɛl yaa jalgi. Lann i g yab nba kpaan k ban gii kɔn yen’ti kan la siɛl yaa mabiiug g maad t po. Fai ji bu kua’b i. 9Bonn kul n ninŋ, yonmi ń daa kand b yonmdanm mɔi po. Ban gii tie b yonmdanm n bua yal nba kul, g daa nai b maam, 10g daa jaan siɛl. Ban gii ŋɔnŋ youg kul k b tie niib nba dagd k ban gii dug b po. Nnyan i, k b bu te t Fietua Yendu tundl ń baal pinpagd bonn kul n ninŋ. 11Yen mɔni, Yendu ŋɔn u ŋalbalg. Niib kul fielu nya l buol i. 12L ŋalbalg ŋɔnŋ’ti k tin ŋaa binbebiiug yen ŋanduna ne manu. K t binbem n ninŋ, tin gii so t kua, gii tie bona lan bual nand, gii tuag Yendu sɔnu, 13g sua k tin guu pamann daal nba pund. L daal i k t Yenduciɛɔnŋ, t Fietua Yiesu Kristo yudand bu legd. 14Wano mɔno n gaal t po g kpe, k wan nyan’ti bonbiil kul n ninŋ, g penn t pala k tin gii tie buolu nba k wano kukua yen’ti ; k t pala kɔn tuonŋana po. 15Ŋan baa tund yal nba n nyan. I paand b pala, gii ŋmagd yab nba biil, yen a yikod kul. Daa ŋaa sua ń nund’a.

will be added

X\