Tiit 1

1Min Pɔl, Yendu tuonsunn yen Yiesu Kristo sundu, Yendu lugd min i g sun’n u nigannkab buol. U sun’n k n ŋɔn’m dindann sɔnu i, g te ban bann mamɔni nba ŋɔnŋ Yendu sɔnu ; 2k b pala ń gii paa k b bu la miɛl nba g mɔg gbennu. Yendu nba g fa faaɔg bo puon’ti l miɛl i, g sua g ŋanduna daa g be. 3T Fietua Yendu pibd u maam g ŋɔn’ti wan bo sen yaa youg. U tie’n l maam i, g cab’n mɔb k n muand. 4Tiit, n da kadaaɔg ne g tien fin i, fin nba k n tug’a k a tie n big yen mɔni t dindann n. T Baa Yendu yen t Fietua Yiesu Kristo ń yad yedŋanm a po, g te k a yam ń gii dua. 5N daan ŋaa’a Krɛt doug n mii a ŋanm g ŋmagd yal nba daan tenn i, g gann doug n ninŋ kul Kristo‑yab nikpela, nyan min daan maad’a nand nyan. 6Nikpel baa tie nil nba g mɔg ban bu jalg’o yal nba po. U baa mɔg puoyend kua i, u bid ń gii tie yab nba ŋua Yendu, g sua kan fid g jalg’b k b mɔg bibiɛdm lann i kaa ninkuam. 7Yen mɔni, Kristo‑yab liig yua tuonn tie k wan gii nyuan Yendu tuona n ninŋ i. Lann u kan gii mɔg ban bu jalg’o yal nba po. U kan gii tie jipaadaan, lann i kaa mutodaan, lann i kaa dinyuul, lann i kaa filkpaandaan, lann i kaa yua nba kpaan k wan di jod g mɔgd. 8U baa tie nil nba ban saanm gaalu, g bua ŋanm, g tie bona kul g dagd, g tie nimɔn, g tie yua tug u kua g cab Yendu, g so u kua. 9U baa tie yua nba tug u munn g cab laabaal nba dagd g nil ń tuo k l tie mɔni, yal nba tuag t tundl sɔnu. Nnyan i, k u bu fid g paan lieb pala yen tundŋann, g biɛ ŋmagd yab nba g tuo l tundl. 10Min n maad’a, niib bonciɛnn be g tie kangbada nba yie tundŋann g diɛ mafinfam g bɔnd lieb. L niib ŋanm g yab Suif‑nba nba tie Kristo‑yab ninŋ i. 11Bel’b k ban daa tie nnyan. B bua ligli i, g tund niib yal nba g dagd yen ban tund’b. B tie nnyan i, g tu bɔnd ŋamunn niib g kuan’m muaɔg. 12Banm Krɛt yab siign ninŋ niyend, b ninnyuantua mɔno n bo maad: « Krɛt yaa niib kul l fa faaɔg u youg kul. B tie muaɔg n bonkobbiid i, b tie gbannyagdanm nba l mali b puol po kua i. » 13U kon maad mɔni i. L po n te k l tie mabl k a gii fu yen’m, k ban gii diɛ dindann nba tuag tundŋann sɔnu. 14Ban daa cenŋ Suif‑nba kpelug, g biɛ daa ŋua niib nba yie mamɔni nyan kɔa. 15Bonn kul ŋan i canyiin niib nba mɔg maalŋanm po, ama siɛl g ŋan yab nba mɔg maalbiid po, banm n yie Yendu. G dugn b maalm n yen b pala n ninŋ kul bi i. 16B yed k b ŋua Yendu i ama b bontitied yen ŋɔn k b yie’og. B tie nicala i, kangbada, b kan fid g sun siɛl yaa tuonŋann.

will be added

X\