Rom Kristo-yab 8

1To, mɔlane buud ji kan di yab nba be yen Yiesu Kristo. 2G dugn Foŋanm yikod nba tien miɛl Yiesu Kristo po nyan n fiel’a, g biid yen kuum ji g mɔg yikod a po. 3Moyis yiko n bo kan fid g tien yal nba, g dugn nifosaal gbalm po bo te k l yiko ji g mɔg paalu, Yendu nuan tien lann n nyan: U sun u Bija mɔno i k u baal g mɔ mɔg gbannand nba g biiddanm mɔg, g yid l gbannand salg biid po, g gbenn biid maam nil gbannand n ninŋ. 4U tien nnyan k tin fid gii suun yiko n bual k tin gii suun yal nba k l ŋan kul i, g dugn tinm nuan ji g bund g be nyan t yam n suol nand nyan kaa, t be nyan Foŋanm n bua nand i. 5Yen mɔni, yab nba bund g be nyan b yam n suol nand nyan nuan mali k ban sun b yanbuatuona kukua i, ama yab nba be nyan Foŋanm n bua nand nba n mali k ban sun Foŋanm n bua yal nba. 6Yua nba tug u maalm g tien u yanbuatuona n ninŋ nuan, l baad yen kuum i. Ama yua nba tug u maalm g tien Foŋanm n ninŋ, wano n bu la miɛl, u yam ń biɛ gii dua. 7Yab nba k b yanbuatuona yend b maalm, b tie Yendu ninnanda i, g dugn b g cɔln Yendu Mɔmaam, b biɛ kan l fid g cɔln mɔ. 8Yab nba k b yanbuatuona yend’b, b kan fid g manŋ Yendu pal. 9Ama yinm nuan, i yanbuatuona kaa yen’i, Foŋanm n yen’i, g dugn Yendu Fuom be i ninŋ. Yua nba g Kristo Fuom g be u ninŋ, u g tie Kristo‑yua. 10Kristo gii be i ninŋ, baa yen i gbannand n l tie yal nba g kuum bu di g dugn biid po mɔno, Foŋanm nba be i ninŋ nyan bu te’i miɛl g dugn i ji tie nimɔnm i Yendu po. 11Yendu Fuom nba te g Yiesu yied kpienm siign nyan gii be i ninŋ, wano nba yied Kristo kpienm siign nyan bu te k u Fuom nba be i ninŋ nyan ń guan g te k i gbannand ń gii fo. 12Lann, n naataani, t mɔg pann, ama l pann yen g tie k tin gii suun t yanbuatuona kaa. 13G dugn, i gii suun i yanbuatuona, i bu kpe i, ama Foŋanm gii tod’i k i tuo g lu i yanbuatuona, i baa fo. 14K l maa yab nba g Yendu Fuom ŋmagd’b kul tie Yendu bid i. 15Yendu g tie’i Fuom nba bu kuan’i yonmd n ninŋ yin biɛ ji gii jie jiwaani kaa, u tie’i Fuom nba bu te yin te Yendu bid i, gii yi’ug k « t Baa ». 16Wano Foŋanm mɔno n kun mɔni t pala n ninŋ k t tie Yendu bid. 17Tin tie Yendu bid nyan, lann tinm n bu yend u ŋalman, tinm yen Kristo n bu taan g yend. G dugn, t gii taan g gaal fala yen’o, t tan bu taan g gaal yudand mɔ nnyan i yen’o. 18N ban g fala nba k t laad mɔlane kan nand yen yudand nba k t tan bu la. 19Yendu n tag yal nba kul guu yen pakɔnn youg nba g Yendu bu ŋɔn yab tie u bid i. 20G dugn Yendu n tag yal nba te fam, l g tie l tagm yanbuam kaa, Yendu mɔno n bo bua k l tien nnyan, ama g dindann yen be g 21Yendu n tag yal nba tan bu nya yonmd n ninŋ, g yal u kua gii mɔg yudand nyan Yendu bid nyan. 22T ban g Yendu n tag yal nba kul biɛ daa l be fala n ninŋ g dun nyan puo n tu mɔ madyiɛlu nand nyan. 23Ama lann kukua kaa, tinm nba gaal Foŋanm k l tie Yendu cincinn paab mɔno, t mɔ l dun t tug n ninŋ i g guu g Yendu bu tug’ti k t te u bid k wan nyan t gbannand fala n ninŋ canyiin. 24G dugn t la fielu, ama l yen daa tie dindann n i. K l maa nil gii nyuan wan daan yal nba, lann dindann ji g be n nyan. Ŋmaa bu la bonn o g biɛ gii daan l bonn i ? 25Ama t gii daan tin g nyuan yal nba, lann i k t bu mind gii guu. 26L tie nnyan i g Foŋanm tod’ti, g dugn t g paa yen siɛl. T g ban tin bu jaand nand g miɛl Yendu bonn. Foŋanm nba miɛd Yendu t po mɔno tu dun i g sɔgnd maam nba g nil kan fid g yaad g maad. 27Yendu nba nyuan nil pal n ninŋ nyan ban Foŋanm n bua n miɛl yal nba, g dugn Foŋanm jaand Yendu niib po nyan Yendu mɔno n bua nand nyan i. 28T ban g Yendu suun tuonn bonn kul n ninŋ k lan ŋanm yab nba bua’ɔg u, yab nba k u bo tuod g yiin’m nyan wan bo sen nand nyan. 29Yendu n bo tuod g ban yab nba po nyan, u bo tuod g lugd banm i k ban gii tie nyan u Bija n tie nand nyan, k u Bija ń gii tie bijakpel g mɔg waali k b yab. 30Yendu bo yiin wan bo tuod g lugd yab nba nyan i. Banm nba k u bo yiin’m nyan, u biɛ bo te k banm n te nimɔnm u nunŋ n. Wan te g yab te nimɔnm nyan, u biɛ tie banm i u yudand. 31To, t biɛ ji bu yed g bɛ ? Yendu gii taa t po, ŋmaa bu fid g kɔn yen’ti nii ? 32Yendu bo g ŋaa baa u Bija mɔno. U bo tug’o g yid salg i t kul ne po. L ji bu tien nle i k u kan te’ti u Bija yen yal tenn kul yen bulcind i ? 33Ŋmaa n bu jalg yab nba g Yendu lugd’b i ? Yendu mɔno yen yed k b g mɔg biid. 34Ŋmaa n bu fid g jiɛl b buud g buud ń suol’b i ? Sua g be. G dugn Yiesu Kristo kpe g yied, g be Yendu jendu, g jaand t po. 35Bɛ n bu fid g paad’ti yen Kristo buam i ? Cicagm bii, yanyaɔg bii, fala nba k b ŋɔnŋ’ti bii, kom bii, taladm bii, yibild daa bii jad kuum i ? 36Nyan lan diɛn Yendu Kadaaɔg n nand nyan: « A yaa po i g yendu n yen nyiɛɔg k t be kuum fiɛl n, k b nyuan’ti nyan t tie pei i k b bu kod nyan. » 37Ama l kul ne ninŋ tinm n yen bu l paad, g dugn yua nba buad’ti nyan bu tod’ti. 38Yen mɔni, n l ban i canyiin, g siɛl kan fid g paad’ti yen u buam. L gii tie kuum ii, miɛl ii, malɛg‑nba ii, polu po yudanm ii, mɔlane yen youg nba baad ii, yal nba l mɔg paalu kul ii, 39yal nba be polu po ii, yal nba be tinpual n ninŋ ii, Yendu n l tag yal nba kul, baa siɛl g be g bu fid g paad’ti yen Yendu buam nba k u ŋɔn t Yonmdaan Yiesu Kristo n ninŋ.

will be added

X\