Rom Kristo-yab 7

1N naataani, i tuod g ban min bu maad yal nba ne, g dugn i ban yiko. I yen ban g yiko bu fid g suol nil yaa youg nba k u daa be g mɔg miɛl kukua i. 2L tie nyan puo n tu kun jua nyan i. Yiko po, l tie mabl i k wan gii be u sal nuu n ninŋ yaa youg nba k u sal daa be g mɔg miɛl. Ama u sal gii kpe, l yiko ji kan fid g mabn’o k wan biɛ l gii be u sal nuu n ninŋ. 3U sal daa gii be g mɔg miɛl, k wano puo yen kun jafan, b bu yiin’o cunconn i. Ama u sal gii kpe nuan, yiko ji g mɔg nuu l puo po, u ji bu fid g kun jafan k l g tie k u tien cunconm. 4N naataani, l tie nnyan i i mɔ yaa po. Yal tie yiko po nuan, i kpe l yaa kuum o, g dugn yinm yen Kristo n yaan taa gbannand nyan. I ji tie nifan yab i, yua nba yied kpienm siign k tin mɔ ń ji fid gii suun tuonmɔna Yendu po nyan. 5Yen mɔni, tin mɔ n daa bo be nyan t yam n suol k tin gii be nand nyan, yiko n yaan baad yen maalbiid nba kukua n bo yend t gbannand kul, g te k t suun tuona nba bu kuan’ti kuum n ninŋ. 6Ama mɔlane nuan, t nyiɛ yiko mabl n ninŋ o, g dugn t kpe yen yal nba bo diɛ’ti dansalg o. T ji bu fid gii suun Yendu po yen maalpaanm, g Foŋanm ŋmagd’ti. T ji kan gii suun yen maalkpelm kaa. Ban bo diɛn yal nba k l daa ŋmagd’ti n bo te k t suun nnyan. 7T ji bu yed g bɛ ? G yiko tie bonbiiug uu ? Palb, l g tie nnyan. Ama yiko bo gii g be, n bo kan bann biid n tie yal nba. N bo kan bann yal nba tie nunfufuug l bo gii sua g yiko g maad: « A nunŋ ń daa fu a lua bonn po ». 8Biid la sɔnu mɔmaam buol i g te k n nunŋ ji fu bonn kul po, k l maa yiko bo gii g be biid bo kan fid g tien siɛl. 9Siɛnyoug, min daa bo g ban yiko, n bo mɔg miɛl g fo, ama min yaan ji tan gbad mɔmaam yaa youg, g biid yend n binbem, 10k n kpe. Mɔmaam bo tie k lan baal yen miɛl i, ama k n yaa buol k l ji baal yen kuum. 11G dugn biid la sɔnu l buol i, g tug mɔmaam g bɔnd’n g te k n kpe l mɔmaam po. 12Lann yiko g mɔg siɛl yaa jɔgnd, mɔmaam mɔ biɛ g mɔg siɛl yaa jɔgnd. L tuag mamɔni sɔnu g biɛ ŋan. 13K nnyan i, yal nba ŋan nyan n tan baal yen n kuum ii ? Kai, lann kaa. Biid n baal yenn. Biid laan bonŋann n ninŋ i g baal yen n kuum. L tien nnyan g biid ń ŋɔn yen mɔni wan tie yal nba, g mɔmaam mɔ ń te g biid ń ŋanm g yabd g pend. 14T ban g yiko nyiɛ Yendu buol i, min nuan yen tie nifosaal i, k b kuad’n nyan yonm nyan g biid daa’n. 15N g ban min suun yal nba. Min bua k n sun yal nba, n g suun, ama yal nba k n g bua k n sun nyan, n suun lann i. 16L gii tie k n suun min g bua yal nba, n tuo g yiko ŋan. 17Lann, min mɔno kaa suun nnyan, biid nba be n ninŋ nyan n suun l tuonn. 18N ban g siɛl yaa bonŋann g be n ninŋ, n maad min tie nifosaal nyan po i. N bua bonŋann tienu nuan, n yen kan fid g tien i. 19N bua k n gii tie ŋanm i, g yen g fid g tie, ama biid nba k n g bua k n tien nyan, n biɛ ji tie lann i. 20K l gii tie k n suun min g bua k n sun yal nba, lann min kaa suun, biid nba be n ninŋ nyan n suun u tuonn. 21Min n ji tan la g yal nba be n ninŋ n ne: N gii kpaan k n tien ŋanm, n tu tan sua g bonbiiug kua i k n bu fid g tien. 22N pal n ninŋ, n bua yiko nba nyiɛ Yendu buol, 23ama n yen la g yiko liel biɛ be n ninŋ g kɔn yen n yam n yaan tuo yiko nba nyan, g te k n tie nyan dansalg nyan g cɔln biid yiko nba be n ninŋ. 24N tie cicagdaan i paaa. Ŋmaa bu fiel’n g nyan’n gbannand nba bua kuan’n kuum n ninŋ ne i ? 25Yendu ń gaal balg, wano kua n bu fid g fiel’n t Yonmdaan Yiesu Kristo po. Lann, n pal n ninŋ, n ŋua Yendu yiko i, ama k n gbannand n ninŋ k n ŋua biid yiko.

will be added

X\