Rom Kristo-yab 6

1K l gii tie nnyan, t ji bu yed g bɛ ? K tin gii tie biid o g Yendu ŋalbalg ń gii pugd ii ? 2Palb, lann kan tien. Tinm kpe biid kuum o, l biɛ bu tien nle i tin gii tie biid i ? 3Bii i g ban k t kul nba wul nyum Yiesu Kristo sann po, k t nyunwulu n ninŋ t taan yen’o i g kpe i ? 4Lann t nyunwulu youg u k t bo taan g kpe yen’o, k b taan g pii’ti yen’o, k t mɔ yaa binbem ń ji pand gii tie binbepaanm nyan t Baa Yendu n yied Kristo kpienm siign yen u yudand nyan. 5G dugn, t kuum gii nand yen u kuum, k tinm yen wano kul ji taan g tie bonyenn, t tan bu taan yen’o nnyan i t yiedu youg mɔ. 6Tin ŋanm man g bann bonyenn: tin bo kpiɛ g mɔg yaa tɔgu nba nyan, b bo taan l tɔgu i yen Kristo g kpaa dapunpɔnn po, k t tɔgkpelu nba bo kuand’ti biid n nyan ń bod canyiin, g biid ń ji daa diɛ’ti nyan yonmi nyan. 7G dugn yua nba kpe nuan fuod yen biid n nyan. 8Tin yaan kpe yen Kristo nyan i k t dug k t baa fo yen’o mɔ. 9T yen ban g Kristo n yied kpienm siign nyan, u ji kan ban g kpe, kuum ji g mɔg nuu u po. 10Wan kpe yaa kubuolu nyan, u kpe biid kuum i taal yenm kua. Wan ji be binbem nba ne, u ji be Yendu po i. 11I mɔ ń ji tug g bil i pala n ninŋ, k i kpe biid kuum o, k i ji fo Yendu po i, yen Yiesu Kristo. 12Lann ji daa ŋaa man g biid ń yend i gbannand nba tan bu bed g te k yin gii suun i gbannand n bua yal nba. 13Biɛ ji daa tug man baa i gbannand bɔgyenn g cab biid, k lan gii tie nyan tuonsuntiɛɔg nyan g suun yal nba g ŋan. Tug man i munn kul g cab Yendu nyan i tie niib nba nyiɛ kuum n ninŋ, g guan g mɔg miɛl nyan, gii tie nyan tuonsuntiɛɔg nyan g suun yal nba ŋan. 14Biid ji kan fid g yend’i g dugn i g dug Moyis yiko po kaa g be, i dug Yendu ŋalbalg po i. 15K nle jig i ? T ji baa tie biid k t be Yendu ŋalbalg youg uu, g Moyis yiko g mɔg nuu t po ii ? Palb, lann kan tien. 16I g ban k i gii tug i kua g cab nil g te u yonmi g cɔlm’o, i ji baa l tie yin cɔln yua nba nyan yonmi yen mɔni ii ? I gii tug i kua g tien biid yonmi, l nyuad tie kuum i. I gii tug i kua g tien Yendu yonmi g cɔlm’o, l nyuad tie k i bu la binbem nba ŋan g dagd Yendu po. 17Ama t tiend Yendu balg, g dugn yinm nba bo tie biid yonmi siɛnyoug, mɔlane i ji cɔln yen i pal kul ban yaan tie’i tundl g ŋɔn’i k yin gii cɔln yal nba kul. 18I nyiɛ biid yonmd n ninŋ g ji tie yonmi nba be k ban gii suun yal nba ŋan g dagd Yendu po kukua. 19N maad nifuog n bu maad nand yin gbad i, g dugn i tie nifosaalb i, i g paa yen siɛl. Siɛnyoug, i bo tug i munn kul g cab nyan yonmi nyan i, g suun tuonjɔgna yen yal nba l kpiɛd kul, g ji be binbem nba g dagd Yendu po. Mɔlane, ji tug man i munn kul g cab nyan yonmi nyan, gii suun yal nba ŋan g dagd Yendu po, g siɛl yaa jɔgnd ń ji daa be i binbem n ninŋ. 20Yin bo tie biid yonmi yaa youg nba, siɛl bo g mabnd’i k yin gii suun yal nba ŋan g dagd Yendu po. 21Tuona nba k i bo suun k l ji mɔg i fai mɔlane nyan, i bo duo bɛ nyuad i l po i ? L tuonbuolu baad yen kuum i. 22Ama mɔlane nuan yin ji nyiɛ biid yonmd n ninŋ g te Yendu yonmi nyan, i nyuad tie g Yendu kukua n ji yen’i k i suun tuona nba ŋan g dagd u po, k i biɛ tan bu la miɛl nba kan ban g gbenn. 23G dugn biid paaɔg tie kuum i, ama Yendu n piin paab nba n tie miɛl nba kan ban g gbenn g dugn t Yonmdaan Yiesu Kristo po.

will be added

X\