Rom Kristo-yab 4

1To, k t ji bu maad bɛ i t yaaja Abraham po i ? U bo duo bɛ nyuad i ? 2L bo gii tie Abraham tuona po i g Yendu yiin’o nimɔn, u bo bu fid gii pua jipaad. Ama u yen kan fid g pua jipaad Yendu buol nuan. 3Yendu Kadaaɔg n diɛni maad bɛ i ? K Abraham bo dug Yendu po i, g Yendu yiin’o nimɔn. 4Nil gii sun tuonn, wan bu gaal yal nba g tie paab kaa k b pii’ug, l tie u tuonn paaɔg u. 5Ama yua nba g sun siɛl yaa tuonn, g nyaan yen dug Yendu po nyan, wano i g Yendu nba jie biiddaan ninbaaɔg bu yiin’o nimɔn k l maa u dug u po. 6Nnyan i g Dafiid mɔ bo maad, g daan nba g Yendu yiin’o nimɔn, k l g tie u tuona po kaa, g pamann tie l daan yal i. U bo maad: 7« Yab nba g Yendu dii sugl b tuonbiɛd po, g piin b biid, pamann tie b yal i. 8Daan nba g Yonmdaan g tiɛn u biid, pamann tie u yal i. » 9L pamann tie yab nba kɔnd Suif‑nba kɔnd kua yal bii l tie yab nba g kɔnd mɔ yaa yal i ? T maad mɔlane i k Abraham bo dug Yendu po i k u yiin’o nimɔn. 10Bɛ youg u k u bo yiin’o nimɔn i ? L bo sua k u kɔnd bii k u daa g kɔnd i ? L bo sua k u daa g kɔnd. 11Kɔnd nuan, u bo tan yuand i g gaal l banm, k l bil nyan tanpal nyan u po, g ŋɔnŋ k wan yaan bo dug Yendu po i k u yiin’o nimɔn. L sua k u daa g kɔnd mɔno. Lann, u tie yab nba g kɔnd g yen dug Yendu po kul yaaja i, g Yendu ń yiin’m nimɔnm g dugn b dug u po. 12Yab nba kɔnd mɔ, Abraham n biɛ tie b yaaja. L g tie yab nba ji bund g be g tua k b kɔnd kaa, l tie yab nba tuag t yaaja Abraham taabuod n ninŋ i, g dug Yendu po nyan wano mɔno n bo dug Yendu po nand g daa tie jol nyan. 13Abraham bo g cɔln yiko kaa g Yendu puon’o, k wano lann i kaa u yaabuona tan bu yend ŋanduna. Wan yaan bo dug Yendu po i k u bo puon’o l puoni. 14L bo gii tie g nil ń cɔln yiko i g yend Yendu puoni, lann dindann bo baa tie fam i, Yendu puoni mɔ bo kan gii mɔg siɛl yaa nyuad. 15G dugn yiko nuan fiind Yendu mutuol i. Ama naan buol g yiko g be, b kan fid g maad g nil miid yiko kual. 16Lann Abraham dindann po i, g Yendu bo puon l puoni, k l puoni ń gii tie paab Abraham yaabuona kul po. L g tie u yaabuona nba cɔln yiko yal kukua kaa, yab nba dug Yendu po nyan wano Abraham nyan, l tie b mɔ yaa yal i. G dugn Abraham tie t kul yaaja i. 17Nyan lan diɛn Yendu Kadaaɔg n g maad nand nyan: « N te k a tie buoli bonciɛnn yaaja. » Wano n tie t yaaja Yendu nunŋ n ninŋ. Yendu nba k u bo dug u po nyan n te g yab nba bo kpe guan g fo, g te g yal nba bo g be ji be. 18Abraham ji bo g mɔg wan nyii yal nba po g daan k u bu mal big, ama k u yen l dug Yendu po. Nnyan i k u bo tan te buoli bonciɛnn yaaja, nyan lan bo tuod g diɛn Yendu Kadaaɔg n ninŋ g maad nand nyan: « A yaabuona tan baa ja nne i. » 19Abraham ji bo mɔg nyan bina kobg nyan i, g tu diid u gbanu g sua k u nag kuum o, g diid u ŋaapuo Sara g sua k u mɔ ciɛnd yen madug o, ama yen l kul ne, u dindann bo g wad baa waam. 20Yal nba tie Yendu puoni po nuan, u bo g ban g mali munle-le l po. U dindann bo pugd’o paalu i, k u dond Yendu, 21k u pal paa g Yendu bu fid g tien wan puon yal nba kul. 22L po n te g « Yendu bo yiin’o nimɔn ». 23Ama lanbona nba maad g « Yendu yiin’o nimɔn » nyan bo g diɛn u po kukua kaa. 24L bo diɛn t mɔ yaa po i, Yendu tan bu yiin t mɔ nimɔnm k l maa t dug u po, wano nba yied t Yonmdaan Yiesu Kristo g nyan’o kpienm siign. 25T tuonbiid po i k u bo tug’o g tie, k b kpii’ug, k u yied’o g nyan’o kpienm siign, k wan te k tin mɔ ń te nimɔnm Yendu nunŋ n.

will be added

X\