Rom Kristo-yab 3

1L gii tie nnyan, Suif mɔg bɛ nyuad i g cie nilieb i ? Lann i kaa, Suif‑nba kɔnd mɔg bɛ nyuad i ? 2Nyuad nuan be g yab hal bonciɛnn. Yenm, Yendu bo tie Suif‑nba i u mɔbona. 3B ninŋ siɛb gii ŋaa g g tie Yendu n yed k ban gii tie yal nba mɔno, l po ji bu te g Yendu mɔ kan tien wan bo puon yal nba ii ? 4Kai, lann g be. L bual g Yendu nuan ń gii tie mamɔnmaad i, g nifosaal kul tie faaɔgdaan. Nyan lan diɛn Yendu Kadaaɔg n nand nyan: « L bual k a maam n ninŋ, sua kul ń bann k a tie mamɔnmaad i, buud buol mɔ ŋan di mɔni. » 5To, k t tuonbiid gii te g nil kul nyuan g Yendu tie mamɔnmaad i, t ji bu yed g bɛ ? T bu fid g maad g Yendu g mɔg mɔni yen wan dad t tubl ii ? (N maad nifosaal n mali nand i). 6Palb, t kan fid g maad nnyan. G dugn, l gii tie nnyan, Yendu tan kan fid g bu ŋanduna buud. 7Sua bu fid g maad: « N faaɔg gii te g Yendu mamɔni yad kaannaa kul k u yudand pugd, bɛ po i g Yendu biɛ yen ji bu jalg’n k n tie biiddaan i ? » 8L tien nnyan i g ŋalaacidanm waa g tua k n maad g niib ń gii tie bonbiil, k lan baal yen bonŋann. Yendu mɔg mɔni yen wan dad l nibuolu tubl. 9I la nle ? Tinm Suif‑nba biɛ bu fid g maad k t cie nilieb ii ? Kai kai. N ŋɔn lann g gbenn o, mii tuonbiid yend Suif‑nba yen buolfanu yab kul o. 10Nyan lan diɛn Yendu Kadaaɔg n nand nyan: « Nimɔn g be, baa yend. 11Sua g be g gbiɛ bona niimn, baa sua g kpaan Yendu. 12Niib kul kpiɛd sɔnu u. B kul ji taan g be biid n i. Baa sua g be g tie ŋanm, baa yend. 13B kunkɔla tie nyan kakula nba yaa nyan i, b lani ban bɔndl kukua i, yal nba nya b mɔi n ninŋ biɛ nyan waalabl lɔbd nyan i. 14B mɔi gbie yen mɔpola yen matonm kukua i. 15Nikpinu nuan b kagi yenn. 16B gii tɔgn naan buol kul, b baad yen tuonbiidu yen fala kukua i. 17Laafiɛ sɔnu nuan, banm g ban lann. 18B g jie Yendu. » 19T yen ban g yiko n maad yal nba kul, l nyuan yab nba k l yiko ŋmagd b binbem i. L tien nnyan g sua ń daa la wan bu kal yal nba g ciɛl i, g buud daal Yendu ń la g nil kul tie biiddaan. 20L po n te g Yendu tan kan yed g sua tie nimɔn k l maa u sun yiko n yed k wan sun yal nba. Yiko nuan be k lan ŋɔn nil u biid i. 21To, mɔlane Yendu ji ŋɔn’ti yal nba bu te wan yiin’ti nimɔnm. Lann ji g tie yiko yal kaa. Mɔni, Yendu Mɔmaam kadaaɔg yen Yendu sogni‑nba kadaaɔg bo tuod g maad l maam. 22Yab nba dug Yiesu Kristo po i g Yendu yi’b nimɔnm. Nimɔnm tie yab nba kul l tug b kua g cab Yiesu Kristo g dug u po i, g dugn b siign ninŋ paadu g be, 23k l maa niib kul tien biid o. B kan fid g la Yendu yudand. 24Yendu ŋalbalg po i k u te k b ji tie nimɔnm u po. Yiesu Kristo n nyan’m biid n nyan, l tie paab i k u pii’b. 25Wano Yiesu i g Yendu bo tug’o g yid salg k u sɔm ń te g niib nba dug u po nyan biid ń piin. U tien nnyan k wan ŋɔn u mɔnkund i. G dugn u pasɔnŋl po n bo te k u ŋaa yab nba bo tien biid siɛnyoug nyan, g g dad b tubl. 26Mɔlane u ji bua n ŋɔn u mɔnkund k ban bann k u tie mamɔnmaad, k wan fid g te g yab nba dug Yiesu po kul ń gii tie nimɔnm wano Yendu nunŋ n. 27Nil biɛ mɔg wan bu fid gii pua jipaad yal nba po ii ? Palb, lann ji g be. Bɛ po i k l g be i ? L g be g dugn l ji g tie nil tuona po kaa, u dindann po i. 28G dugn, t ban g nil dindann po i g Yendu bu yiin’o nimɔn, l g tie Moyis yiko n ŋɔn k wan sun tuona nba po kaa. 29Bii Yendu tie Suif‑nba kukua yaa Yendu yaa aa ? U g tie buolfanu yab yaa Yendu uu ? U tie buolfanu yab mɔ yaa Yendu, 30k l maa Yenduyeno kukua n be, g bu te Suif‑nba yen yab nba g tie Suif‑nba kul ń te nimɔnm g dugn b dindann po. 31K tin maad nand ne i, l ji bua n maad k t dindann po, Moyis yiko ji g tie siɛl yaa aa ? N n, l g tie nnyan, t bua n ŋɔn g yiko l tie bonmɔnn i canyiin.

will be added

X\