Rom Kristo-yab 2

1Fin nba tie nifosaal, g jalg a lua k u tien biid nyan, a mɔ g mɔg ciɛlu. A gii bua ŋan gii tie yua nba kul, ŋan jalg a lieb nyan, a gɔ g jalg a kua i. G dugn fin nba jalg lieb nyan, a mɔ tie nyan banm nyan i. 2T yen ban g Yendu bu jiɛl yab nba suun l tuona nyan buud lan bual nand. 3K fin nifosaal nba jalg lieb l bontitied po, g mɔ yen suun nyan banm nyan i, a mali k a bu nya Yendu buud n ninŋ yaa aa ? 4Bii a yiin Yendu buaciɛnm yen u sugl yen u pasɔnŋl kul fam i ? A g ban g Yendu buam be k lan tod’a k a mɔ kua a biid po, g lebd a binbem ii ? 5Ama ŋan tie kangbadl, g biɛ yie k a kan lebd a binbem nyan, a taand mutuol nba yab i g kulg a kua g guu mutuol daal. L daal i g Yendu bu ŋɔn k u tie mɔnkundaan. 6L daal i k u bu pa nil kul u tuona paaɔg. 7Yab nba tie ŋanm youg kul, g kpaan Yendu yudand yen u sel yen miɛl nba g mɔg gbennu nyan, Yendu bu te banm i miɛl nba kan ban g gbenn. 8Ama yab nba bua b yal kua, g yie mamɔni sɔnu u, g ŋaa g bonbiil kukua ŋmagd b binbem nyan, Yendu mutuol yen u pabɔnn bu lag b po i. 9Nil nba suun bonbiil kul, fala yen cicagm n tan bu lag u po. L bu cil Suif‑nba i, g tuan buolfanu yab. 10Ama yab nba tie ŋanm nuan, Yendu bu te’b yudand, g seln’m, g te k b yam ń duan. U bu cil Suif‑nba i, g tuan buolfanu yab. 11G dugn Yendu yaa buol lugdm g be. 12Yab nba kul tien biid g daa g bann Yendu Mɔmaam, b bu biɛl, baa b gii g tug l Mɔmaam g jiɛl b buud. Ama yab nba kul bann l Mɔmaam o, g yen yuand g tien biid nyan, b bu tug l Mɔmaam i g bu’b. 13K l maa l g tie yab nba cenŋ Mɔmaam kaa tie nimɔnm Yendu nunŋ n, yab nba cɔln l Mɔmaam, Yendu bu yiin banm i nimɔnm. 14Buolfanu yab g mɔg Moyis n bo diɛn yiko nba. Ama b gii diɛ b yul po maalm g suun yen tuonn, k l tuag yen yiko n maad yal nba, yen ban g ban yiko nand kul, banm mɔno ji tie yiko i b kua po. 15L ŋɔn g yiko n maad yal nba diɛn g bil b pala n ninŋ i. B yam mɔ biɛ gad’b l po, g yenn youg b pala g man b kua po yen ban sun yal nba, g liel youg mɔ b kɔn b kua po g ban k b mɔg mɔni. 16Nyan Laabamann nba k n muand n maad nand nyan, l kul bu dɔgd yaa daal nba g Yendu bu te g Yiesu Kristo ń bu yua kul n wuod yal nba u pal n ninŋ. 17Fin nba yi a kua Suif, g nyii Moyis yiko po, g donŋ a kua g dugn a Yendu po, 18a ban Yendu n bua yal nba, g yiko ŋɔn’a yal nba tie bonmɔnn, 19a pal n ninŋ, a l diɛ k fin n ŋmagd juanm, k a tie yinyiem i yab nba be bunbɔnn n ninŋ po, 20a mali k fin n fand yanbɔndanm, g tund bid, k l maa a ban g yal nba tie banm yen mamɔni kul be yiko kadaaɔg n ninŋ i. 21A tund lieb, g bɛ n te k a g tund a kua i ? A muand g niib ń daa jaan, k fin mɔno yen jaan. 22A maad niib k ban daa conm, k l tien nle i k a conm i ? A g bua yennaankad maam, g yen jaan bona nba be lieb tingbandied n. 23A donŋ a kua g Yendu tie fin i u Mɔmaam, g biɛ yen ji kuand’o fai g dugn a g cɔln l Mɔmaam. 24Yendu Kadaaɔg maad lann n nyan: « Buolfanu yab biid Yendu sann g dugn i po i. » 25A gii kɔnd Suif‑nba kɔnd, g cɔln Moyis yiko, l kɔnd baa mɔg nyuad a po, ama a gii g cɔln yiko nuan, a daa g kɔnd. 26Yua nba g tie Suif, g g kɔnd palb g yen cɔln yiko, Yendu yaa po u kɔnd o. 27I mɔg yiko k l diɛn kadaaɔg n, k i biɛ kɔnd. Ama yin g cɔln l yiko nyan, yua nba g kɔnd palb, g yen cɔln yiko n tan bu jiɛl i buud. 28Yua nba tie Suif yen mɔni g tie yua nba g nil bu la u gbanu g bann kaa. Kɔnd mɔ biɛ g tie banm nba be nil gbannand po g niib nyuan kaa. 29Yua nba tie Suif yen mɔni, l be u pal n ninŋ i. Kɔnd mɔ biɛ tie pal n ninŋ yal i. Foŋanm n kɔnd yua nba, l daan n kɔnd yen mɔni, l g tie yua nba kɔnd nyan lan diɛn Moyis yiko kadaaɔg n ninŋ nand nyan kaa. Yua nba tie Suif yen mɔni yaa pinpagd g nya niib buol kaa, l nya Yendu buol i.

will be added

X\