Rom Kristo-yab 15

1L bual k tinm nba paa dindann n ninŋ i ń tod yab nba g paa, g gaal b tuga nba paad’b, g tug. T kan gii kpaan t yul po manu kaa. 2T kul ne, sua kul ń gii kpaan k wan tien yal nba bu manŋ u lua, yal bu ŋanm’o, g te k u dindann ń pugn. 3Yen mɔni, Kristo bo g kpaan yal nba bu manŋ wano mɔno kaa. U bo ŋaa g yal nba diɛn Yendu Kadaaɔg n n tien: « Sugd nba k b sugl’a kul juod n po i ». 4Yal nba bo diɛn siɛnyoug Yendu Kadaaɔg n kul, l bo diɛn k lan te’ti tundl i, k tin la l diɛni n ninŋ mindl yen papaal nba bu te k tin gii mɔg dindann. 5Yendu nba tien mindl yen papaal ń te k i gii taa mɔb nyan Yiesu Kristo n bua nand nyan. 6Nnyan i k i bu fid g taan mɔb g dond Yendu yen payenn, wano nba tie t Yonmdaan Yiesu Kristo Baa. 7I gaan man i lieb nyan Kristo n gaal’i nand nyan, g yudand ń te Yendu yal. 8Min n maad’i, Kristo bo tug u kua g tien Suif‑nba tuonsunn, k wan tien Yendu n bo puon b yaajanm yal nba i, k lan ŋɔn g Yendu kon tie mamɔnmaad. 9G buolfanu yab mɔ ń gii dond Yendu g dugn u ninbajienu po, nyan lan diɛn Yendu Kadaaɔg n nand nyan: « L po n te k n baa pag’a buolfanu yab buol, n baa yiin yani g donŋ a sann. » 10L biɛ diɛn k nne: « Buolfanu yab, i kpanm man yen Yendu buolu. » 11L biɛ diɛn liel buol mɔ k nne: « Yinm buolfanu yab, i kul ń gii dond Yonmdaan. Buoli kul ń ŋanm g dond’o. » 12Esaayi mɔ biɛ bo maad: « Big tan bu nya Sese yaabuona n ninŋ, wano n tan bu fiil gii mɔg nuu buoli kul po, b kul ń gii daan u ninŋ. » 13Yendu nba te g niib daan u ninŋ ń te k i pala ń gii man bonciɛnn, i yam ń gii dua g dugn yin dug u po nyan. G Foŋanm paalu ń te k i dindann ń ŋanm g pugn. 14N naataani, min mɔno ban n pal n ninŋ k i l tie nimɔnm i canyiin, k i ban bonn kul n sonm nand, k i biɛ bu fid g te i lieb cegli lan bual nand. 15Ama min diɛn’i kadaaɔg nba ne, yenn‑nba buol be k n pua pal g tiɛd’i yal nba k i tu tuod g ban. N diɛn nnyan g dugn Yendu pii’n u ŋalbalg, 16k n te Yiesu Kristo tuonsunn buolfanu yab buol. Wan tie’n tuonn nba tie nyan salg-yidkua tuonn nyan i, k n gii muand Yendu Laabamann, g buolfanu yab mɔ ń te salg nba g Foŋanm bu ŋanm k lan dagd Yendu po. 17Lann Yiesu Kristo po n te k n pal man n kua po g dugn tuonn nba k n suun Yendu po ne. 18Min kan fid g pua pal g maad siɛl po, l gii g tie Kristo n te k n tien yal nba i kaa. U te k n tod buolfanu yab k b mɔ ji cɔln Yendu. N maam yen n tuonn, 19palug yen yaalidug tuongbenŋa nba k n sun yen Foŋanm paalu n tod’b. Nnyan i k n fid g muand Kristo Laabamann lan bual nand kaannaa kul, lan cil Serusalɛm saa yen Iliiri dingbana n ninŋ. 20Ama n mɔnd g tien bonyenn, naan buol nba kul g niib daa bo g ban g gbad Kristo sann palb nyan, n muand Laabamann l buol kukua i. N tien nnyan k min daa baal g maa dieog lua fiɛgl po i. 21Lann, n tien yal nba tuag yen Yendu Kadaaɔg n diɛni n nyan: « Yab nba k b bo g maad’b u maam, b bu la’ɔg, yab nba bo g ban g gbad siɛl u po bu gbad. » 22L po n te k n bign taal munŋaa kul k n baal i buol k l paad’n. 23Ama mɔlane nuan, min yaan ji g mɔg tuonn l dingbana n ninŋ, k l biɛ tu tie payiɛnu bonciɛnn n po bina ŋanŋaa ne kul k n baal i buol nyan, 24n gii saa Ɛspany n bu tɔgn i buol. Yen mɔni, n mali k n tɔgn i buol k i tod’n k n gad l doug. N gii baal, n yen bu tien dana ŋanŋaa nuan yen’i yo, g fid g pend. 25Ama mɔlane nuan, n yen daa saa Serusalɛm i, g daan bu tod Kristo‑yab nba be l po, 26k l maa Maseduann yen Akaayi Kristo‑yab jag g suol k ban tod Kristo‑yab nba be Serusalɛm g tie tali nyan. 27Yen mɔni, banm mɔno n tug l yanjagl, ama l yen daan bual k ban tien nnyan i. G dugn Yendu yedŋanm nba g Serusalɛm Kristo‑yab gaal, b bɔgd yen banm buolfanu yab i. L po n te k l bual k b mɔ ń bɔgd ban mɔg ŋalman nba yen Serusalɛm Kristo‑yab. 28Lann, n gii gbenn l maam, g tug ban taan paab nba nyan g tie Serusalɛm yab, n bu tug Ɛspany sɔnu i g tɔgn i buol g pend gii saa. 29N yen ban k n bu baal i buol g gbie yen Kristo yedŋanm i. 30N naataani, n balm’i, t Yonmdaan Yiesu Kristo po, yen Foŋanm n tien’ti buam nba po, tod’n man gii jaand g miɛd Yendu n po, 31k wan nyan’n Suude kangbada ne janmi n ninŋ, g Serusalɛm Kristo‑yab mɔ ń biɛ gaal yen pamann todl nba k n saa yen b buol. 32Nnyan, Yendu gii bua, n bu fid g pund i buol yen pamann, g tien dana ŋanŋaa yen’i g fuod waam. 33Yendu nba te g niib be k l man ń gii be yen i kul. Amɛnn.

will be added

X\