Rom Kristo-yab 14

1Tuo g gaal man yua nba k u dindann daa g yab, g daa nai yen’o wan mali yal nba po. 2Sua be g dug k l cab yen wan di jebuoli kul. G sua mɔ be g dindann pɔd’o, g kpinfaad kua i kaa u g ŋman nand. 3Yua nba di jebuoli kul ń daa nund yua nba g di. Yua nba g gbiɛ k u di jied kul mɔ ń daa jalg yua nba di, g dugn Yendu gaal’o o. 4A tie ŋmaa i g baa jalg sua yaa tuonsunn i ? U gii sie k l paa ii, u gii baa ii, lann la u canbaa i. U baa sie k l paa mɔ, g dugn Yonmdaan mɔg paalu g bu te wan gii sie. 5Sua be g mali g diyena ŋan g cie dilaa. G sua mɔ mali g daal kul l tie daal i. Yua kul n mali yal nba, wan gii diɛ u pal n ninŋ k l tie nnyan i. 6Yua nba nyuan g diyena ŋan g cie dilaa, u tie nnyan g seln Yonmdaan i. Yua nba di jebuoli kul, u seln Yonmdaan i, g dugn u tu tien Yendu i balg l jied po. Yua nba g gbiɛ k u di jied kul mɔ biɛ l seln Yonmdaan i, g tiend Yendu balg. 7Yen mɔni, t kul ne, sua g be g fo u yul po kukua. Sua biɛ g kpenn u yul po kukua kuum. 8T gii fo, t fo Yonmdaan po i. T biɛ gii kpe mɔ, t kpe Yonmdaan po i. Lann, tin fo i, tin kpe i, Yonmdaan n yen’ti. 9G dugn Kristo bo kpe g guan g fo k wan gii tie kpienm yen fuodb Yonmdaan i. 10K a mɔ i, bɛ po i k a jalg a ninja i ? K fin i, bɛ po i k a nund a ninja i ? T kul tan bu sed Yendu nunŋ n i, wan bu’ti. 11L diɛn Yendu Kadaaɔg n g maad k nne: « Min Yonmdaan, n fo, min n maad: Nil kul tan bu gbaan dunn n nintual n. Nil kul tan bu yaad u mɔb g maad k n tie Yendu. » 12Lann, t ninŋ ne, sua kul tan bu ŋɔn Yendu nunŋ n wan sun yal nba. 13Lann t ŋaa man g daa jalg t lieb. Yin bu tug yanjagl nba n ne: daa tien man i kua nyan tantuudkal nyan k i ninja tan bu tuud’i lann i kaa g jal’i g baa. 14Min nuan ban, g Yonmdaan Yiesu te k n bann g tond canyiin, g jied g be g tie kual. Ama yua nba mali g yaa jied ne nuan tie kual i, l baa l tie kual i u po. 15A gii di jied, g ban k l jied po bu te a ninja pal ń biil, lann a ji g sonm buam sɔnu n. Daa ŋaa g jied po ń te g Kristo n kpe yua nba po ń biɛl fam. 16Daa ŋaa man g yal nba ŋan i po ń te g lieb ń ji gii maad mabiid l po. 17K l maa Yendu diem g tie jied yen daam maam kaa. Yendu diem tie Foŋanm n baad yen yal nba nil po i, lan tie g nil ń gii suun yal ŋan Yendu po, u yam ń gii dua, k u pal man. 18Yua nba suun Kristo po nnyan, Yendu pal baa man u po g niib mɔ biɛ taa u po. 19Lann t gii kpaan man yal nba bu te g manu ń gii be tinm yen t lieb siign, yal nba bu te tin gii tod t lieb k t dindann ń ŋanm g pugn. 20Daa biid Yendu tuonn jied po. L tie mɔni i g jied kul ŋan g dagd g nil ń di, ama l g ŋan k ŋan gii di jied nba bu te g nil ń kua tudm n ninŋ. 21Yal nba ŋan tie k ŋan daa ŋman nand, g daa nyu daam, g daa l tie yal nba bu fid g te a ninja ń kua tudm n kul. 22A gii mali yal nba l po, ŋan gii diɛ a pal n ninŋ, lann tie fin yen Yendu yal i. Yua nba tug yanjagl k u bu tien bonn, g g jalg u kua l po, pamann tie u yal i. 23Ama yua nba di jied o, g yen mali munle-le l jied po nyan, l daan mɔg biid Yendu nunŋ n, g dugn u g tien u dindann n bual k wan tien nand. Yal nba g nil tie k l g tuag yen u dindann mɔ yen tie biid i.

will be added

X\