Rom Kristo-yab 13

1Nil kul ń gii cɔln gobna yikodanm, g dugn yikod g be g g nyiɛ Yendu buol. Yikodanm nba be kul, Yendu n kaan’m. 2Lann yua nba yie yikodaan, u yie Yendu mɔno n sen g bona ń gii sonm nand i. Yab nba yie l sɔnu, banm mɔno n kpaan g buud ń lag b po. 3Yen mɔni, yab nba suun yal nba ŋan, b g jie yikodanm. Yab nba suun tuonbiid n jie’b. A gii bua k ŋan daa jie yikodaan, lann ŋan gii suun yal nba ŋan, yikodaan baa pag’a nii. 4G dugn yikodaan mɔ suun Yendu tuonn k lan ŋanm fin i. Ama a gii suun yal nba g ŋan, ŋan tuod gii jie, g dugn l g tie fam kaa k u mɔg yiko yen wan dad a tubl. U suun Yendu tuonn k wan dad yua nba suun tuonbiid g fiind Yendu mutuol nyan tubl i. 5L po n te k l dagd g nil ń gii cɔln yikodanm. L g tie tubdadu po kukua kaa, ama l baa tie nil yam n i k u cɔln. 6L po n biɛ te k i pa lonpo mɔ. Yab nba gaan lonpo mɔ suun Yendu tuonn i lan bual nand. 7Pa man yua kul yin bu pa’ɔg yal nba. Pa man lonpogaal u lonpo, g pa tigddaan mɔ u tigd po. Cɔln man yua dagd yen cɔlunŋ, g seln yua dagd yen sel. 8Daa mɔg man baa sua pann, l gii g tie k yin gii bua i lieb i kaa. G dugn yua nba bua u lua u cɔln yiko n bual yal nba kul n nyan. 9Yen mɔni, Yendu Mɔmaam nba maad k « a kan conm, a kan kpi nil, a kan jan, a kan gii bua a lua bonn », yen liel‑nba nba tenn kul nyan taan g maad bonyenn i: « I bua a lua nyan a kua nyan ». 10Yua nba bua u lua, u kan fid g tien’o bonbiiug. Lann yua nba bua u lua, u cɔln yiko n bual yal nba kul n nyan. 11I tie man nnyan g dugn i yen ban tin ji be yaa youg nba ne. Youg pund yen guam ń yand i po, yin find o. Yen mɔni, t fielu daal ji nag g cie yaa youg nba k t daa bo cind g dug Kristo po. 12Yɔugsiiug siid g pend, g siŋaaɔg nag o. Lann t lu man yal nba tie bunbɔnn n tuona kul, g tug yinyiem n jakɔntiɛd. 13T gii suun man papientuona nyan lan dagd k tin gii suun nand yensiig n nyan. T ŋaa man jediciɛnu yen dinyuciɛnu, g ŋaa cuncontuona yen jɔgntuona, g ŋaa kunkɔna yen nanŋ. 14Tug man Yonmdaan Yiesu Kristo k wan te i jakɔntiɛd k i liɛ, g ji daa kpaan k yin sun i yam n kuan’i tuonbiid nba n ninŋ.

will be added

X\