Rom Kristo-yab 12

1N naataani, Yendu n yaan ŋɔn’ti k u jie’ti ninbaaɔg hal bonciɛnn nyan po n te k n mɔ balm’i, mii yin tug i kua g cab nyan salg nba fo, g ŋan g dagd Yendu po nyan. Jaandi nba tuag sɔnu n nyan. 2Daa ŋua man ŋanduna ne yab bontitied kaa. Ŋaa man g Yendu ń lebd i ninfanm g te’i ninfanpaanm, k yin fid g bann wan bua yal nba: lann n tie yal nba ŋan, g man g biɛ dagd u po. 3Yendu n yaan pii’n u paab nba po n te k n maad i kul ne: Daa senŋ man i kua yin g pund naan buol. Sua kul ń ŋanm g diid wan tie yua nba, g sen u kua Yendu n tie’og dindann k l dagd k wan sed naan buol. 4Nyan t gbannand n mɔg bɔga k l yab, k l bɔga yen g taa taa tuona nyan, 5l tie nnyan i, k t mɔ yab g yen taan Kristo n ninŋ g tie gbannanyend kua, g taan g tuug yen lieb nyan gbannand bɔga nyan. 6Yendu ŋalbalg po i k u pii t kul paab jiɛg jiɛg. Yua nba gaal Yendu paab k l tie k wan gii gaan Yendu maam g sɔgnd, l daan ń gii suun l tuonn nyan dindann n bual nand nyan. 7Yua nba gaal Yendu paab k l tie k wan gii suun lieb po, l daan ń gii suun nnyan. Yua nba k u paab tie tundl po mɔ, wan gii tund lieb. 8Yua nba paab tie k wan gii paand lieb pala, l daan ń gii tie nnyan. Yua nba g Yendu n pii’ug paab nba tie k wan gii piin lieb paab, l daan ń gii piin yen bulcind. Yua nba ŋmagd lieb ń gii ŋmagd lan bual nand. Yua nba tod tali mɔ ń gii tod’b yen pamann. 9I gii bua nil, yin gii bua’ɔg yen mɔni. Daa bua man bonbiil yaa maam palb. I kpaan man k yin gii tie ŋanm kukua. 10I bua man i lieb nyan nil yen u ninja n bua lieb nand nyan. Mɔnd man g cɔlunŋ ń gii be yinm yen i lieb siign. Ama k l cɔlunŋ n tu kpiɛ g nya i po. 11I suun man Yonmdaan po yen pakɔnn, g daa mɔg siɛl yaa gbannyagl. I pala ń gii kɔn youg kul k yin sun u tuonn. 12I pala ń gii man g dugn i daan k i bu la miɛl nba kan ban g gbenn. I mɔg man juunn fala youg, gii jaand youg kul. 13I bɔgd man yin mɔg yal nba gii tien i lieb nba be cicagm n ninŋ. Tu ŋanm g gaal man saanm nba caan’i. 14I miɛd man Yendu k wan yad u yedŋanm yab nba cagn’i po. I gbad a, yedŋanm i k i baa miɛd b po, l g tie k i baa jaand’b kaa. 15I kpanm man yen yab nba kpanm, gii buud yen yab nba buud. 16I mɔg man maalyenm i lieb kul po. Daa donŋ man i kua kaa, i dɔnn man yen yab nba g tie nigbenŋa mɔ, g daa mali k yinm n tie yanfodanm. 17Yua nba tien’i bonbiiug, yin daa kpaan k yin mɔ ń guan g ŋmiɛn’o l bonbiiug kaa, i kpaan man k yin tien yal nba ŋan niib po. 18L gii tie k l bu fid, g biɛ bu nya i po, yin mɔnd gii man yen niib kul. 19N naataani, daa kpaan man k yin tuu pann kaa, ŋaa man g Yendu mutuol ń sun tuonn, k l maa l diɛn Yendu Kadaaɔg n k nne: « Min n bu tuu pann, min n bu guan g pa yua kul pann. » Yonmdaan n maad nnyan. 20G biɛ pugn liel buol k nne: « Ama kom gii mɔg a ninnand, ŋan te’og jied k wan di, nyunnyuglu gii mɔg’o, ŋan te’og nyum k wan nyu, g dugn a gii tien nnyan, a pad muukuana i g dognd u yul po. » 21Daa ŋaa g biid ń paad’a. Mɔnd g tien ŋanm g paad biid.

will be added

X\