Rom Kristo-yab 11

1N ji bual lann i, mii Yendu baa yie u buolu bii ii ? Kai, lann kaa. G dugn min mɔno tie Israyɛl buolu n nil i, n tie Abraham yaabuonn i, Bɛnsamɛn cugl n jua. 2Yendu g yie u buolu, u bo tuod g lugd’b k l wai. Bii, i g ban Yendu Kadaaɔg n ninŋ, lan diɛn g ŋɔn Israyɛl buolu n bo biil, k Eli jalg’b Yendu nunŋ n g maad yal ii ? 3« Yonmdaan, b kpii a sogni‑nba, g mud a salg binbinda o. Min kukua n tenn k b biɛ kpaan k ban junn n mɔ yaa miɛl. » 4Yendu bo guan g jiin’o bɛ ? « N tenn jab tuda ŋanlile i g guun n kua, yab nba daa g gbaan dunn Baal buol g pug’o. » 5Mɔlane mɔ l tie nnyan i. Niib tenn waam, g Yendu lugd’b g dugn u ŋalbalg po. 6U ŋalbalg po i k u lugd’b faa, l g tie b tuona po kaa. L bo gii tie b tuona po, lann Yendu ŋalbalg ji g tie ŋalbalg. 7L niimn ii ? Israyɛl yab g la ban bo kpaan yal nba. Yendu n lugd yab nba kukua n la. Yab nba tenn kul ji te kangbada i. 8Lan diɛn Yendu Kadaaɔg n nand n nyan: « Yendu te k b yam juan, g te k b ninbina g nyuan, k b tuba g gbiɛ saa yen dinne. » 9Dafiid mɔ biɛ bo maad g: « B jied ń te diɛɔg, lan te janbaaɔnŋ k ban baa l n ninŋ, k lan dad b tubl. 10B ninbina ń juan k ban ji daa laad baa siɛl. Ban gii bua youg kul g daa ban g yaad g sed. » 11K n ji bual lann i, mii Suif‑nba tuud k ban ji l baa, g daa ban g fiil yaa aa ? Kai, l g tie nnyan kaa. Ban tien biid nba nyan po n te g yab nba g tie Suif‑nba mɔ la fielu, k banm Israyɛl yab nunŋ ń ji gii fu b po. 12K l gii tie g Suif‑nba tuonbiid ŋanm ŋanduna bonciɛnn, b binbaag gii ŋanm buolfanu yab bonciɛnn, g Suif‑nba kul ji tan gii guan g la fielu i, l ji baa tie nle ? 13Mɔlane, n ji maad yen yinm buolfanu yab i. Min yaan tie Yiesu sundu buolfanu yab buol nyan, n tug l tuonn k l tie bulcintuonn i n po, 14k n daan k l g kua n buolu n yab nunŋ baa fu l po k b ninŋ siɛb ń mɔ ń la fielu. 15Yen mɔni, Yendu daa bo piɛn’m i g ŋanduna yab fid g manŋ yen’o, u ji tan gii guan g tuo’b nuan, kpienm mɔno la miɛl n nyan. 16Jekpiɛla gii ŋan Yendu po, jied nba tenn kul ji ŋan n nyan. Jiinn gii ŋan Yendu po, benda mɔ ŋan n nyan. 17Israyɛl buolu tie nyan oliif tiig nba k b bul’o ŋaag nyan i, g gbad bendyena l po. K fin nba tie buolfanu yua tie nyan muaɔg n oliif tibendl nyan, k b tug’a g tugn yen ban gbad g tenn yal nba nyan, k l tiig jiina ji tien a mɔ siim k a fo. 18Lann daa pua jipaad k fin n cie ban gbad benda nba nyan. A yen ji baa pua jipaad bɛ po i ? Fin kaa te g jiina be, jiina n te k a be. 19A bu fid g maad k b bo gbad l tiig benda k ban tugn’a b yiɛl n i. 20Lann tie mɔni i. B bo gbad’b g dugn b bo g mɔg dindann i, g tug’a g dugn a dindann po. Ama daa pua jipaad kaa, i jie jiwaani. 21G dugn, Yendu gii gbad benda nba bo be tibulkag po, ŋan gii ban k u kan ŋaa a mɔ. 22Lann, ŋanm g bann g Yendu mɔg pasiɛdug g biɛ mɔg nunkuoni. U mɔg nunkuoni yen yab nba tien biid, k u pal yen siɛd a yaa po. Mɔnd k wan l gii mɔg l pasiɛdug nnyan a po, lann i kaa u bu gbad a mɔ nnyan i. 23Ama banm Suif‑nba mɔ gii lebd maalm g guan g dug Yendu po, Yendu bu guan g tugn’m wan bo gbad’b tiig nba nyan po, g dugn u mɔg paalu g bu fid g guan g tugn’m. 24Fin nuan tie muaɔg n oliif tibendl i, k b cua’a g tugn’a ŋaag oliif tiig po, k l yen bo g dagd k lan tien nnyan. G Suif‑nba nba ji tie ŋaag oliif tibenda i, b gii bua n guan g tugn’m ban bo gbad’b tiig nba po, l kan gii tie faala kaa aa ? 25N naataani, n g bua g mamɔni nba tie ŋasiil ne ń gii duag’i. N gii g dɔgd g ŋɔn’i, i mɔ ji baa mali k i tie yanfodanm i. Israyɛl yab n ninŋ siɛb daa baa be yen b nangbanm i, saa yen yaa youg nba g buolfanu yab kul tan bu kua Yendu diem n. 26Nnyan i k Israyɛl yab kul ji bu la fielu, nyan lan diɛn Yendu Kadaaɔg n nand nyan: « Fietua bu nya Siyɔn i g baal g nyan Sakɔb yaabuona tuonbiid kul n ninŋ. 27Min yaan bu suol n dɔnnu nba yen’m n nyan, yaa youg nba k n bu piin b biid kul. » 28Yal nba tie Laabamann po nuan, b l yie i g te Yendu ninnanda, k yinm buolfanu yab duo nyuad l po. Ama Yendu n bo tuod g lugd’b k b tie u buolu nyan, u bua’b g dugn b yaajanm po. 29K l maa Yendu nuan gii pii nil paab u pii’ug u, u gii yiin nil mɔ u l yiin’o i, u g lebd u maalm. 30Yen mɔni, siɛnyoug i bo g cɔln Yendu. Ama mɔlane u jie’i ninbaaɔg g dugn Suif‑nba mɔ n g cɔlm’o nyan po. 31L tie nnyan i Suif‑nba mɔ yaa po mɔlane. B g cɔln Yendu, g Yendu ń jie’b ninbaaɔg nyan wan jie’i ninbaaɔg nand nyan i. 32Yendu te g nifoi kul ji g cɔln, k l ji tie nyan dansalg nyan b po, k wan fid g jie b kul ninbaaɔg u. 33Yendu ŋalman g mɔg lan ja yen yal nba, u yanfuom yen u banm kul yab hal bonciɛnn. Sua g ban u yanjagl, g ŋmaa ji baa ban u sɔni i ? 34Yendu Kadaaɔg kon maad lann n nyan: « Ŋmaa ban Yonmdaan maalm i ? Bii sua bu fid g te’og cegli yaa aa ? 35Ŋmaa ban g tie’og siɛl o g ji guu k wan guan g pa’ɔg u ? » 36Yen mɔni, bonn kul nyiɛ u buol i, wano n te g bonn kul be, bonn kul be u po i. Yudand tie u yal i, mɔlane saa yen youg nba g mɔg juog. Amɛnn.

will be added

X\