Rom Kristo-yab 10

1N naataani, yal nba tie n pakɔnn k n jaand g miɛd Yendu tie g Suif‑nba ń la fielu i. 2N bu fid g kun mɔni b po, k l tie payiɛnu i paaa b po, k ban gii suun Yendu n bua yal, ama b g ban ban baa suun nand. 3G dugn b bo g bann Yendu n bua g nil ń tɔgn sɔnu nba k wan yed k u tie nimɔn u nunŋ n, b bo kpaan b yul po sɔnu i, g yie g g tɔgn sɔnu nba g niib tu tɔgn, Yendu ń yiin’m nimɔnm. 4Kristo n te g Moyis n bo diɛn yiko nba paalu po juab, g yua nba dug u po kul, wan te nimɔn Yendu nunŋ n. 5Moyis mɔno bo diɛn g ŋɔn nil n baa cɔln yiko nand gii tie nimɔn Yendu nunŋ n. U bo diɛn g maad k nne i: « Yua nba cɔln yiko, u baa mɔg miɛl g dugn l yiko po i. » 6Ama yal nba tie g Yendu ń yiin nil nimɔn g dugn u dindann po nuan, Yendu Kadaaɔg n diɛni maad l po k nne i: « Daa maad a pal n ninŋ g ŋmaa n bu do polu po i ? » (L niimn tie g ŋmaa n bu do polu po g jiid yen Kristo i ?) 7Lann i kaa « g ŋmaa n bu jiid tinkpiiug n ninŋ i ? » (L bua n maad g ŋmaa n bu yied Kristo kpienm siign g do yen’o i ?) 8Yendu Kadaaɔg biɛ maad bɛ i ? G « Yendu maam be a buol i, a mɔb n ninŋ yen a pal n ninŋ. » L maam n tie dindann laabaal nba k t muand. 9A gii yaad a mɔb g maad niib kul nunŋ n g Yiesu tie Yonmdaan, g biɛ tuo yen a pal kul g Yendu yied’o kpienm siign, Yendu bu fiel’a. 10Yen mɔni, a gii tuo yen a pal kul i, k a bu te nimɔn Yendu nunŋ n, a gii yaad a mɔb g maad niib kul nunŋ n k a tuo, Yendu bu fiel’a. 11Yendu Kadaaɔg n diɛni kon maad lann n nyan: « Yua nba dug u po kul kan di fai. » 12Lann paadu g be Suif‑nba yen yab nba g tie Suif‑nba siign ninŋ. B kul taa Yonmdaan yend i, k u piin yen bulcind yab nba miɛd’o kul. 13L kon tie mɔni i, « Yua nba taa Yonmdaan sann kul, u bu fiel’o. » 14G niib bu tien nle i g taa u sann g g dug u po i ? B bu tien nle i gii dug u po, g g ban g gbad u maam i ? B bu tien nle i g gbad u maam g sua g ban g muand’b i ? 15K b gii g sun sua mamuandu i, l bu tien nle i l maam ń muand i ? Nyan lan diɛn Yendu Kadaaɔg n nyan: « Yab nba waa g muand laabamann, b baalu tie pamanciɛnn i. » 16Ama b kul kaa tuo g gaal Laabamann. Esaayi bo maad lann n nyan: « Yonmdaan, ŋmaa tuo g gaal k t laabaal tie mɔni i ? » 17Nil tu cenŋ ban muand laabaal nba i gii mɔg dindann. Kristo maam n tie l laabaal. 18Lann i k n bual: B kan gii gbad l laabaal bii ii ? Bo, b gbad nuan: « B niɛli duo g ŋanduna munn kul gbad. B maam gad hal ne yen ŋanduna n juod naan buol. » 19K n biɛ guan g bual: Israyɛl yab bo g gbad yaa aa ? B bo gbad. Moyis n bo kpiɛ g maad Yendu lanbona ne: « N bu te yin gii nan buolu nba g tie siɛl mɔno. N bu te i pala ń gii ŋub buolu nba g mɔg yam po. » 20Esaayi nuan taan bo maad mɔno g Yendu yed k nne: « Yab nba bo g kpaan’n nyan, banm n ji tan la’n. N legd g ŋɔn n kua yab nba bo g bual n po. » 21Ama yal nba nyuan Israyɛl buolu po, Yendu pugn g maad: « N tund yentunmunn g tiɛn n nui i, k n manŋ yen l buolu, k b g cɔln, b biɛ g tuod n maam. »

will be added

X\