1 Min Pɔl n da kadaaɔg ne. N tie Yiesu Kristo tuonsunn i, Yendu n yiin’n k n gii tie u sundu, g lugd’n k n gii muand u Laabamann. 2 Yendu bo tuod g puon l Laabamann hal siɛnyoug yo, g te k u sogni‑nba diɛn u kadaaɔg n ninŋ. 3 L Laabamann maad u Bija Yiesu Kristo, t Yonmdaan maam i. Wan yaan bo te nifosaal nyan po n te k b bo mal’o k u tie Dafiid yaabuonn. 4 Ama Yendu Fuom nba be u ninŋ, g ŋan g gbenn nyan po n te k u yied kpienm siign, g ŋɔn yen paalu k u tie Yendu Bija. 5 U yaa po i k n la ŋalbalg g te Yendu sundu, k u sann po, min te g buolfanu niib kul ń gii dug u po gii cɔlm’o. 6 I mɔ tie b ninŋ yenm n nyan, yinm nba g Yendu yiin’i k yin te Yiesu Kristo yab. 7 N da kadaaɔg ne g tien i kul nba be Rom, g Yendu bua’i, g yiin’i k yin gii tie u niib nyan i. N fuond’i. T Baa Yendu yen t Yonmdaan Yiesu Kristo ń yad yedŋanm i po g te k i yam ń gii dua. 8 N daa bu cind g tien n Yendu i balg. Yiesu Kristo po n te k n bu fid g tien’o balg i kul ne po, g dugn ŋanduna n munn kul, niib gbad k i dug Yiesu po. 9 Yendu tie n sieda, wano nba k n suun u tuonn yen payenn g muand u Bija Laabamann. U tie n sieda k n tiɛd i po youg kul, 10 min yaan l jaand yaa youg nba kul. N miɛd Yendu, k l gii tie u buam n ninŋ, wan ji cab’n sɔnu k n baal i buol. 11 L tie payiɛnu i n po, k min la’i, g pi’i paab nba k n gaal Foŋanm buol, k yin ŋanm gii sie k l paa. 12 Min bo bua n maad yal tie k tin yaan taan g dug yal nba po ń paan min yen yinm pala i. 13 N ninjanm, n bua k yin bann k n jag taal munŋaa kul k n baal i buol k l paad’n i. N bo bua g yab nba be i buol mɔ ń do nyuad n tuonn po, nyan lieb nba tenn g mɔ tie buolfanu yab n duo nyuad nand nyan i. 14 L tie mabl i n po, k n tod yab nba k b nuni luod yen yab nba g ban siɛl, g tod yanfodanm yen yanbɔndanm. 15 L po n te k n pal kɔn hal bonciɛnn, k min baal g muand yinm nba be Rom mɔ Laabamann. 16 Min g jie fai yen k n muand Laabamann, g dugn l tie Yendu paalu i, g be k lan fiel niib nba kul mɔg dindann, lan cil Suif‑nba saa yen yab nba tie buolfanu yab kul. 17 L Laabamann n ŋɔn nand nba g Yendu tu yiin nil k u tie nimɔn u nunŋ n ninŋ. Nil dindann kukua po n tu te Yendu ń yed k u tie nimɔn. Nyan lan diɛn Yendu Kadaaɔg n nand nyan: « Yua nba tie nimɔn Yendu nunŋ n ninŋ, u baa fo g dugn u dindann po. » 18 Yendu ŋɔn k u mutuol bu nya hal polu po yo, g jiid nil nba g cɔlm’o po lann i kaa nil nba suun tuonkpiɛdl kul po. Niib nba suun l tuonkpiɛda nyan n g bua g lieb bann mamɔni. 19 K l maa b ban nifosaal n bu fid g bann yal nba Yendu po kul, g dugn wano Yendu mɔno n ŋɔn’m g g wuon baa siɛl. 20 Yen mɔni, hal ŋanduna cilg youg yo, g Yendu nba g nil kan fid g la’ɔg yen u ninbina nyan bo te g niib la u tuona n ninŋ, g bann k u paalu g mɔg gbennu, g biɛ bann wano Yendu n tie yua nba. Lann, niib ji kan fid g kal k b g ban siɛl. 21 Yen ban yaan l ban Yendu nand kul, b yen g dond’o nyan u tie Yendu nyan, b biɛ g tiend’o balg mɔ. B ŋaa lann yo, g bund g diɛ maalm nba g mɔg niimn, k b yanjuanm po te k b ji be bunbɔnn n ninŋ. 22 B yi b kua yanfodanm i, g yen tie yankpiena. 23 B ŋaa Yendu nba mɔg yudand, g biɛ kan ban g kpe yo, g ji pug nifosaal nba bu kpe g bed yaa ninnaɔnŋ, yen bonyugda, yen bonkobd, yen bonbalnkaa ninnand. 24 L po n te g Yendu mɔ ŋaa’b k b suun b tuonjɔgna nyan b yam n suol k ban gii suun nand nyan. K b ji diɛ b gbannand g suun fai tuona g fiɛgd b kua. 25 B tug Yendu mamɔni g kpend g gaal faaɔg, g ji pug Yendu n tag yal nba, g nyaan ŋaa wano Yendu nba tie Tagtua, g dagd k ban gii dond’o youg kul. Amɛnn. 26 L po n te g Yendu ŋaa’b k b suun ban bua yal nba g fiɛgd b kua. K b puob ji ŋaa k ban gii dua yen jab o g dua yen b puolieb. 27 Nnyan i, g jab mɔ ŋaa puob o, g ji tug b niɛnŋ kul g tien b jalieb n ninŋ, g ŋua k ban gii dua yen’m nyan b tie puob nyan. G jab ji diɛ b jalieb g suun yal nba mɔg fai. L po n te k b gaan b gbannand n ninŋ b tudm paaɔg lan bual nand. 28 Nyan ban diid g sua k l g tie bonmɔnn b po yen ban gii diɛ Yendu n ŋɔn’m banm nba nyan, g Yendu mɔ ŋaa’b k b diɛ b yul po maalm, maalbiid kukua, g suun yal nba bo g dagd yen ban sun. 29 B gbie yen mɔnkunninkpind kua i, yen tonu, yen kunkuam, yen tuonbiɛd. B tug n gbie yen nanŋ i, k b mali nikpinu po kua. Kunkɔna yen bɔndl yen cibl yen tuali kua n gbie b tug n ninŋ. 30 B be yen ŋalkudm kua i b lieb po, b g bua Yendu nublu. B tie filkpaandanm i, jigbeldanm yen jipaadanm. B yam fo tuonbiid sunu n ninŋ kua i. B g cɔln b danm maam. 31 B tie yukpiena i, mɔi yinle danm. B pala g siɛd nil po, b biɛ g jie nil ninbaaɔg. 32 B ban g Yendu nyan yiko g maad g yab nba suun l tuonbuolu, b nyuad tie kuum i. Ama yen l kul ne, b yen l suun l tuonbiid i, g biɛ tua g yab nba mɔ suun nnyan, k b suun tuonŋann i.
