Dɔgdu 7

1L puol po k n la g malɛg‑nba banna sie tinŋ po. G yend sie nintual, g lua sie puol, g lua sie yaanŋ, g lua mɔ sie yanbaɔnŋ. K b kul suol faalu nba nya l kaani nna kul po, g baa faalu ń daa pieb tinŋ po, g bual mɔgl po, g bual tisiɛg po. 2L youg k n la g malɛglua nyiɛ puol g duo, g diɛ bonn nne k b kub g tie banm Yendu nba fo niib po, k u yign yen paalu g maad malɛg‑nba banna nba g Yendu bo tie’b paalu k ban biil tinŋ yen mɔgl nyan, 3k nne: « Daa ŋaa man faalu ń biil tinŋ yen mɔgl yen tiidi saa yen youg nba g yab nba ŋua t Yendu nyan, t bu tien banm b yutuna po. » 4Lann i k n gbad k b maad niib nba k b tien b yutuna po banm nyan n ja nand, k b tie niib tuda kobg yen tuda piinna yen tuda ŋanna i, k b nyiɛ Israyɛl buolu cuga kul n ninŋ i. 5G Suuda cugl n mɔg niib tuda piig yen tuda ŋanle, g Rubɛnn cugl n mɔg niib tuda piig yen tuda ŋanle, g Gad cugl n mɔg niib tuda piig yen tuda ŋanle, 6k Asɛr cugl n mɔg niib tuda piig yen tuda ŋanle, g Nɛftali cugl n mɔg niib tuda piig yen tuda ŋanle, g Manase cugl n mɔg niib tuda piig yen tuda ŋanle, 7g Simeyɔn cugl n mɔg niib tuda piig yen tuda ŋanle, g Lefi cugl n mɔg niib tuda piig yen tuda ŋanle, k Isakar cugl n mɔg niib tuda piig yen tuda ŋanle, 8g Sabulɔnn cugl n mɔg niib tuda piig yen tuda ŋanle, g Sosɛf cugl n mɔg niib tuda piig yen tuda ŋanle, g Bɛnsamɛn cugl n mɔg niib tuda piig yen tuda ŋanle. 9L puol po k n la niwulug nba yab hal bonciɛnn, g sua kan fid g cɔd’b, k b tie ŋanduna ne doi kul n ninŋ niib yen cuga kul n ninŋ niib yen buoli kul n ninŋ niib yen mabuoli kul n ninŋ niib. B bo sie badkog nunŋ po yen Pebig nintual n, g liɛ liɛdfagdpiend g biɛ diɛ kaadi faad b nui n ninŋ, 10g yign yen paalu g tua: « T fielu nya t Yendu buol i, wano nba kal badkog po, l biɛ nya Pebig buol i. » 11G malɛg‑nba kul kaan g lind badkog yen nikpela yen bonfuoda banna ŋann, g baa g gbaan badkog nintual n, g tug nunŋ g pii yen tinŋ, g ji dond Yendu 12g tua: « Amɛnn ! Dondl yen yudand yen yanfuom yen balg yen sel yen paaciɛnu yen paalu tie t Yendu yal i youg ń tuu youg. Amɛnn ! » 13G nikpela ŋann siign ninŋ yend bual’n: « Niib nba liɛ liɛdfagdpiend ne tie b lɛ i ? B nyiɛ lɛ buol i ? » 14K n ŋmiɛn g maad’o: « N Yonmdaan, fin n ban. » Lann i k u maad’n k b tie danm nba nyiɛ cicagciɛnm nba g mɔg l liel nyan ninŋ i. K b ŋuul b liɛdfagd Pebig sɔm n ninŋ i k l penn. 15K l po n te k b sie Yendu badkog nintual n g suun u po yendu n yen nyiɛɔg u ŋaag n. Yua kal bal po nyan baa be yen’m g biɛ gii guu’b. 16G kom yen nyunnyuglu ji kan ban g suol’b, yendu yen tuntounŋ mɔ biɛ kan ban g gbad’b. 17K l maa Pebig nba be badkog sinsiign nyan baa tie b kpaatua. U bu kpaa’b g gad yen’m nyunbunbuna nba buol g miɛl nyum buni. Yendu bu fiɛl b ninsiid kul.

will be added

X\