Dɔgdu 6

1Lann i k n la g Pebig tabd kadaaɔg bontabnkaa ŋanlile ŋann n ninŋ yenn. L youg k n gbad bonfuoda banna ŋann n ninŋ yend niɛlu k l paa nyan tatintandi nyan g maad: « Baal ! » 2K n la g tanjapienn baal g sed, g yua jag’o muub talbann. K b tie’og feglg nba ŋɔnŋ k u kɔn g paad k u nyiɛ l buol g saa g biɛ daan bu l kɔn g paad. 3G Pebig biɛ tabd kadaaɔg bontabnkaliel munle po, k n gbad g bonfuodl nba tua munle po nyan yign g maad: « Baal ! » 4Lann i k n la g tanjaliel baal g sed, g mɔn nyan muu nyan, k b tie yua jag’o nyan yikod k wan baal yen tɔb tinŋ po ne, g te g niib ń gii kpi b lieb. K b biɛ tie’og jugfuaɔg nba yab. 5G Pebig biɛ tabd kadaaɔg bontabnkaliel muntaa po, k n gbad g bonfuodl nba tua muntaa po nyan yign g maad: « Baal ! » K n la g tanjabɔnn baal g sed, g yua nba jag’o nyan kub bonn nba k b diɛ g bigd bona kpiɛgu nyan u nuu n ninŋ. 6K n gbad k l tie nyan niɛlu nyan bonfuoda banna ŋann sinsiign, k l maad: « Yoi tadyenŋ tie yentunyenn tuonn ligli i, g nyaali tadi yintaa tie yentunyenn tuonn ligli, g nyaan, ŋaa g kpam yen dimɔunŋ nuan ń gii be lan bual nand. » 7G Pebig biɛ tabd kadaaɔg bontabnkaliel munna po, k n gbad g bonfuodl nba tua munna po nyan yign g maad: « Baal ! » 8Lann i k n la g tanjapupugl baal g sed, g yua nba jag’o nyan sann tie kuum, g tinkpiiug ŋua u puol po. K b tie’b yikod tinŋ bɔgdm munna po, k ban kpi niyenm yen jugi, g te g kom yen yiɛlu nba kpi g lalg yen bonkobbiid ń kpi lieb mɔ. 9G Pebig biɛ tabd kadaaɔg bontabnkaliel munmu po, k n la niib nalmi salg binbindl tinŋ po, ban bo kpii yab g dugn Yendu maam nba k b bo gaal g luand lieb nyan po. 10K b yign yen paalu g maad: « Canbaa, fin nba tie niŋan g biɛ tie mamɔnmaad, saa yen bɛ youg u k a bu jiɛl tinŋ po ne niib buud g dad b tuba g dugn ban kpii’ti nyan po i ? » 11Lann i k b tie b kul liɛdfagdpiend, g maad’b k ban mind g guul waam, g dugn b tuonsunlieb siign, yab nba tenn g mɔ bu kpe nyan banm nyan, daa g kpe b kul g gbenn. 12G Pebig tabd kadaaɔg bontabnkaliel munluob po, g tinŋ jeg hal bonciɛnn, g yendu bɔnn dig dig, g ŋmaalg mɔnn u kul nyan sɔm nyan. 13G ŋmaabid ciel polu po g baa baa tinŋ n ninŋ nyan faaciɛnu n tu mig kinkanŋ k u luana suod g baal nand nba nyan. 14G polu po pin pin nyan dinduantiɛɔg nyan g bod, g jɔa kul yen kpendega kul mɔ figd figd ban tu be naan nyan. 15Lann i g tinŋ n ne batieb yen l nigbenŋa yen sijeciɛnm yen ŋalmandanm yen yikodanm, yen yab nba tenn kul, yonmi yen yab g tie yonmi, k b kul san g wuon tanfiɛd n ninŋ yen tangband n ninŋ. 16G maad jɔa yen tangband ŋann k ban baa b po, g wuon’m g yua nba kal badkog po nyan ń daa nyuan’m, g Pebig mutuol ń daa lag b po. 17K l maa yua nba kal badkog po yen Pebig n bu ŋɔn b mutuol daal nba pund o. Ŋmaa n bu fid g sed b mutuol buol i ?

will be added

X\