Dɔgdu 5

1Lann i k n biɛ la g yua nba kal badkog ŋann po diɛ kadaaɔg nne k l pin nyan dinduantiɛɔg nyan u nuujendu po, k l kadaaɔg mɔg diɛni l nunŋ po yen l puol po, k b donn cendl g tabn l mɔb po kaani yinlile. 2K n la malɛg nba mɔg paalu, k u tand yen paalu g tua: « Ŋmaa n dagd yen wan tabd l bontabnkaa g pɔbd l kadaaɔg u ? » 3Ama sua yen bo g be polu po g bual tinŋ po ne, g bual tinkpiiug n g bu fid g pɔbd l kadaaɔg g diid. 4K n buud hal bonciɛnn k l maa sua n bo g be g dagd yen wan pɔbd l kadaaɔg g diid nyan. 5Lann i g nikpela ŋann siign ninŋ yend maad’n k min daa buud. K min diid, g yua nba tie Suuda cugl n yanbɔl g biɛ tie bad Dafiid yaabuonn paad bonn kul o. K wano n bu fid g tabd l bontabnkaa ŋanlile g pɔbd l kadaaɔg. 6K n la g Pebig sie badkog buol, g bonfuoda banna ŋann yen nikpela ŋann kaan g lind’o. K l Pebig tie nyan b bo kpii’ug nyan, k u mɔg yina ŋanlile yen ninbina ŋanlile. L ninbina ŋanlile n tie Yendu fuom banlile nba k u sun’m tinŋ n kul po. 7G Pebig nagn g gaal kadaaɔg yua nba kal badkog po nyan nuujendu n ninŋ. 8Wan gaal l kadaaɔg yaa youg, g bonfuoda banna yen nikpela piinle yen banna ŋann baa g gbaan u nunŋ n ninŋ. G yua kul diɛ biɛɔg yen wula seni k l gbie yen ŋubl nba nu g man. L ŋubl n tie Yendu niib jaandi. 9K b yin yanpaanu g maad: « A dagd yen k a gaal kadaaɔg g tabd bontabnkaa. K l maa b bo tug fin’i g yid salg, k a tug a sɔm g fiel cuga kul n ninŋ niib, g fiel mabuoli kul n ninŋ niib, g fiel buoli kul n ninŋ niib, yen ŋanduna doi kul n ninŋ niib g tie Yendu. 10A te k l niib kul tie Yendu badbijanm, g biɛ tie t Yendu salg-yidkab. B baa tie batieb i tinŋ po ne. » 11Lann i k n biɛ la malɛg‑nba bonciɛnn g biɛ gbad b niɛlu, k b kaan g lind badkog yen bonfuoda yen nikpela ŋann. L malɛg‑nba bo yab hal bonciɛnn g g mɔg po, 12k b yiin yen paalu g tua: « Pebig nba k b bo kpii’ug nyan n dagd yen wan gaal paaciɛnu yen ŋalman yen yanfuom yen paalu yen sel yen yudand yen dondl ! » 13K n biɛ gbad tagm kul yigni, yab be polu po yen yab be tinŋ n yen yab be tinkpiiug n yen yab be mɔgl n k l bonfuoda kul taan g yign: « Dondl yen sel yen yudand yen paaciɛnu tie yua kal badkog po yal i yen Pebig yal youg ń tuu youg ! » 14G bonfuoda banna ŋann tu taan g maad: « Amɛnn ! » G nikpela ŋann gbaand g pug yua nba kal badkog po yen Pebig.

will be added

X\